ប្រជាពលរដ្ឋជាច្រើនរយនាក់បានលើកគ្នាតវ៉ាផ្លូវបិទផ្លូវជាតិលេខ៥ ត្រង់ចំណុចភូមិក្បាលដំរី ឃុំត្រពាំងចាន់ ស្រុកបរិបូណ៌ ខេត្តកំពង់ឆ្នាំង ជាប់ព្រំប្រទល់ស្រុកក្រគរ ខេត្តពោធិ៍សាត់បណ្ដាលឲ្យស្ទះចរាចរណ៍ជាង២ម៉ោង
ខេត្តកំពង់ឆ្នាំង ៖ ប្រជាពលរដ្ឋជាច្រើនរយនាក់បានលើកគ្នាតវ៉ាផ្លូវបិទផ្លូវជាតិលេខ៥ ត្រង់ចំណុចភូមិក្បាលដំរី ឃុំត្រពាំងចាន់ ស្រុកបរិបូណ៌ ខេត្តកំពង់ឆ្នាំង ជាប់ព្រំប្រទល់ស្រុកក្រគរ ខេត្តពោធិ៍សាត់បណ្ដាលឲ្យស្ទះចរាចរណ៍ជាង២ម៉ោង ហេតុការណ៍នេះបានកើតឡើងនៅព្រឹកថ្ងៃទី១៩ ខែកញ្ញា ឆ្នាំ២០២១ ។ ទោះបីយ៉ាងណា ក្រោយពីមានការសម្របសម្រួល ប្រជាពលរដ្ឋក៏ព្រមបើកផ្លូវឲ្យដំណើរការវិញហើយ ។
បើតាមលោក ផល សុភាព អភិបាលរងស្រុកបរិបូណ៌ ខេត្តកំពង់ឆ្នាំង បានបញ្ជាក់ឲ្យដឹងថា វិវាទដីធ្លី រវាងប្រជាពលរដ្ឋចំនួន៤ឃុំ ស្ថិតក្នុងស្រុកបរិបូណ៌ ខេត្តកំពង់ឆ្នាំង ជាមួយរដ្ឋបាលសាលាខេត្តពោធិ៍សាត់នេះ បានអូសបន្លាយជាច្រើនឆ្នាំណាស់មកហើយ ដោយមានការសម្របសម្រួលដោះស្រាយជាច្រើនលើកច្រើនសារ ប៉ុន្តែមិនត្រូវគ្នា និងចុងក្រោយ ដោយមានការឈូសដីស្រែប្រាំងរបស់ពួកគាត់ទៀតផង ទើបមានការតវ៉ាបិទផ្លូវបែបនេះ។
អភិបាលរងស្រុកបរិបូណ៌បានបញ្ជាក់ពីប្រវត្តិនៃដីទំនាស់នេះថា ជាច្រើនឆ្នាំណាស់មកហើយ ប្រជាពលរដ្ឋចំនួន៤ឃុំ ក្នុងស្រុកបរិបូណ៌ ខេត្តកំពង់ឆ្នាំង បានទៅធ្វើស្រែប្រាំងនៅចំណុចចាន់ជ្វា ចាន់ត្រក ខ្មោចម៉ារាម និងទូកមាស ជាដើម ដែលជាទឹកដីឃុំអន្សាចំបក់ ស្រុកក្រគរ ខេត្តពោធិ៍សាត់។ ពួកគាត់ មានផ្ទៃដីស្រែប្រាំងក្នុងម្នាក់ៗចាប់ពី១ហិចតាឡើងដល់៣ទៅ៤ហិកតា ។ ប៉ុន្តែក្រោយមក រដ្ឋបាលខេត្ត ពោធិ៍សាត់ បានសម្រេចរឹបអូសយកដីទាំងនោះវិញ ព្រោះជាទឹកដីគ្រប់គ្រងដោយរដ្ឋបាលខេត្តពោធិ៍សាត់។
ប្រភពដដែលបន្តថា ប្រជាពលរដ្ឋដែលអាស្រ័យផលលើទឹកដីទាំងនោះក៏លើកឡើងថា ជីវិតរបស់ពួកគាត់រស់លើជង្រុកស្រូវស្រែប្រាំងនោះហើយ បើដកដីពីពួកគាត់ដូចឱ្យគាត់ស្លា.ប់យ៉ាងដូច្នេះដែរ ។ លុះក្រោយពីការតវ៉ាជាបន្តបន្ទាប់ជាច្រើនលើកច្រើនសារ និងលើកចុងក្រោយមករដ្ឋបាលសាលាខេត្តពោធិ៍សាត់ បានសម្រេចប្រគល់ដីចំនួនកន្លះហិកតាឲ្យពួកគាត់ក្នុងមួយគ្រួសារៗ គឺក្បាល៥០ និងបណ្ដោយ១០០ម៉ែត្រជាដីឡូតិ៍ ដែលពួកគាត់មិនអាចធ្វើស្រែប្រាំងបានឡើយ ។ មិនត្រឹមតែប៉ុណ្ណោះថ្មីៗ នេះ រដ្ឋបាលសាលាខេត្តពោធិ៍សាត់ ក៏បានដាក់គ្រឿងចក្រមកឈូសឆាយលើស្រែប្រាំងរបស់ពួកគាត់ ដោយលើកជាផ្លូវដាក់បង្គោលភ្លើងក្នុងគម្រោងអ្វីមួយមិនអាចយល់បាន ព្រោះជាទឹកដីរបស់រដ្ឋបាលសាលាខេត្តពោធិ៍សាត់ ។
ប្រភពដដែលបន្តទៀតថា ក្នុងនាមលោកជារដ្ឋបាលស្រុកបរិបូណ៌ ខេត្តកំពង់ឆ្នាំង បានត្រឹមតែចុះសម្របសម្រួលជាច្រើនលើកច្រើនសារតែប៉ុណ្ណោះមិនអាចដឹងអ្វីបានទេ ។
ដោយឡែកលោក ឃួន សៅរុំ ប្រធានក្រុមប្រឹក្សាស្រុកបរិបូណ៌ នៅរសៀលថ្ងៃទី១៩ ខែកញ្ញានេះដែរក៏បានបញ្ជាក់តាមទូរស័ព្ទឲ្យភ្នាក់ងារយើងដឹងថា ក្រោយពីមានការសម្របសម្រួល ប្រជាពលរដ្ឋព្រមដកថយ និងបើកផ្លូវឲ្យដំណើរការវិញ បន្ទាប់ពីបិទចរាចរណ៍ជាង២ម៉ោង ដែលធ្វើឱ្យស្ទះរថយន្តជាច្រើនរយគ្រឿង។ ពួកគាត់សម្រេចបើកផ្លូវឲ្យដំណើរការវិញ ក៏ដោយសារថ្ងៃស្អែក គឺថ្ងៃទី២០ ខែកញ្ញា ប្រជាពលរដ្ឋទាំងនោះនឹងមកជួបដោះស្រាយពិភាក្សាជាមួយអាជ្ញាធរខេត្តកំពង់ឆ្នាំង ដើម្បីរកច្រកចេញថា តើគួរមានវិធានការបែបណាដើម្បីទទួលយកបានទាំងអស់គ្នារវាងប្រជាពលរដ្ឋខេត្តកំពង់ឆ្នាំង និងរដ្ឋបាលខេត្តពោធិ៍សាត់ផងដែរ?។
យ៉ាងនេះក្តី ភ្នាក់ងារប្រចាំខេត្តកំពង់ឆ្នាំង មិនអាចទាក់ទងសុំការបំភ្លឺពីរដ្ឋបាលសាលាខេត្តពោធិ៍សាត់បានទេ ប៉ុន្តែគ្រាន់តែដឹងថា ដើមហេតុនៃសាច់រឿងបិទផ្លូវ គឺដោយសារវិវាទដីធ្លីរវាងប្រជាពលរដ្ឋអ្នកខេត្តកំពង់ឆ្នាំង ជាមួយរដ្ឋបាលខេត្តពោធិ៍សាត់៕
ចែករំលែកព័តមាននេះ