ចក់ សាវិន និងធន់ អៀនឡៃ ឈ្នះគូប្រកួតទាំងប្រផិតប្រផើយដូចគ្នា
- ភ្នំពេញ
រាជធានីភ្នំពេញ ៖ កីឡាករចក់ សាវិន មកពីក្លិបនាយកដ្ឋានអង្គរក្ស និងកីឡាករធន់ អៀនឡៃ មកពីសមាគមកីឡាប្រដាល់កង
រាជធានីភ្នំពេញ ៖ កីឡាករចក់ សាវិន មកពីក្លិបនាយកដ្ឋានអង្គរក្ស និងកីឡាករធន់ អៀនឡៃ មកពីសមាគមកីឡាប្រដាល់កងយោធពលខេមរភូមិន្ទ ដែលជាអ្នកដណ្ដើមបានតំណែងជាម្ចាស់ប្រាក់លានខារ៉ាបាវ នៅលើសង្វៀនស៊ីអិនស៊ី កាលពីថ្ងៃសៅរ៍ ទី១១កញ្ញា កន្លងមកនេះបានយកឈ្នះគូប្រកួតទាំងប្រផិតប្រផើយបំផុត។
កីឡាករចក់ សាវិន គេបានយកឈ្នះលើកីឡាករ សោម វិឆ័យ មកពីក្លិបកីឡាប្រដាល់វិបុលដារិទ្ធខណ្ឌពោធិសែនជ័យ ដោយពិន្ទុប៉ុណ្ណោះ ។
តាមពិតការប្រកួតរវាងគូនេះស្វិតស្វាញខ្លាំងណាស់ តាំងពីទឹកទី១ដល់ទឹកទី៥គេបានប្ដូរកណ្ដាប់ដៃគ្នាយ៉ាងសាហាវបំផុត ។ ប៉ុន្តែចក់ សាវិន បានបញ្ចេញស្នៀតកែងនិងជង្គង់បុកទៅលើសោម វិឆ័យ ដូចព្យុះ ប៉ុន្តែសោម វិឆ័យ ដែលជាអ្នកប្រដាល់ចាស់វស្សាមួយរូបដែរនោះ មិនបណ្ដោយឱ្យចក់ សាវិន វាយតាមតែអំពើរចិត្តនោះទេ គេក៏បានប្រើស្នៀតជើងទាត់សំដៅកណ្ដៀតក្អមពេញៗ ព្រមទាំងបានម៉ាត់សំដៅផ្ទៃមុខផ្ទួនៗជាច្រើនដៃថែមទៀត។
ទោះជាយ៉ាងណា សោម វិឆ័យ ដែលមានវ័យរាងចំណាស់បន្តិចទៅហើយនោះ រាងស្រុតកម្លាំងបន្តិចចូលដល់ទឹកទី៤និងទី៥ ធ្វើឱ្យចក់ សាវិន មានឱកាសបង្កើនការវាយសម្រុកកាន់តែខ្លាំងលើសដើម បង្ខំឱ្យសោម វិឆ័យ ដកថយទាំងព្រលឹងចុងសក់ ។ ប៉ុន្តែទោះបីជាចក់ សាវិន មានប្រៀបដាច់នៅទឹកទី៥ក៏ដោយ ចប់ការប្រកួតគេបានត្រឹមតែឈ្នះដោយពិន្ទុប៉ុណ្ណោះ។
ដោយឡែកសម្រាប់កីឡាករធន់ អៀនឡៃ វិញនោះកាលពីប្រកាសដំបូងគេត្រូវប៉ះជាមួយកីឡាកររិន ដេវិត មកពីក្លិបនាគរាជចតុមុខឯណោះវិញទេ ប៉ុន្តែដោយសាតែ ដេវិត មានបញ្ហាសុខភាពមិនបានមកប្រកួត ត្រូវប្ដូរភ្លាមៗដាក់កីឡាករ ខេម ចាន់ ក្លិបកីឡាប្រដាល់បញ្ជាការដ្ឋានទ័ពពិសេសប្រកួតជំនួសវិញ ។ ដោយសាការមិនបានត្រៀមខ្លួនទុកជាមុនបែបនេះហើយ ទើបធ្វើឱ្យ ខេម ចាន់ មិនអាចមានឱកាសក្លាយជាម្ចាស់ប្រាក់លាន តែទោះជាយ៉ាងណា ខេម ចាន់បានធ្វើឱ្យ ធន់ អៀនឡៃ មិនសូវស្រួលខ្លួនប៉ុន្មានឡើយ ។ គូនេះពិតជាមិនធ្វើឱ្យអ្នកតាមដានការប្រកួតខកចិត្តនោះទេ គឺចាប់តាំងពីបើកឆាកប្រកួតទឹកទី១មកម៉្លេះ បានប្រើសុទ្ធតែក្បាច់ពិសេសៗវាយសម្ររុករកគ្នាយ៉ាងសាហាវបំផុត។
កីឡាករធន់ អៀនឡៃ ដែលជាអ្នកដណ្ដើមបានប្រាក់លានលើកនេះគេមានការសប្បាយចិត្តយ៉ាងខ្លាំង ហើយក៏មិននឹកស្មានដល់ទៀតផង។ព្រោះអីការប្រកួតគ្នា៥ទឹកពេញមកនេះ គឺប្រហាក់ប្រហែលគ្នាតាំងពីកម្លាំងស៊ុហ្វឡើងទៅ។ម្យ៉ាវិញទៀត សូម្បីអ្នកតាមដានការប្រកួតមួយចំនួនគេគិតថាគូនេះ បើឱ្យស្មើពិន្ទុគ្នាប្រហែលជាសមរម្យជាង ។ ប៉ុន្តែចប់ការប្រកួតទឹកទី៥ចៅក្រមទាំង៥រូបបានផ្ដល់ពិន្ទុឱ្យធន់ អៀនឡៃឈ្នះដោយមិនឯកច្ឆ័ន្ទ៣-២ ៕
ចែករំលែកព័តមាននេះ