- ភ្នំពេញ
ភ្នំពេញ៖ ក្នុងសង្គមយើងសព្វថ្ងៃ ជម្លោះជាច្រើនកើតឡើង ដោយសារតែរឿងតូចតាច តែមនុស្សយើង ចូលចិត្តធ្វើរឿងតូច ក្លាយជាធំ រហូតឈ្លោះគ្នា ឈានដល់វាយតប់ និងបំផ្លាញទ្រព្យសម្បត្តិថែមទៀត។…
ភ្នំពេញ៖ ក្នុងសង្គមយើងសព្វថ្ងៃ ជម្លោះជាច្រើនកើតឡើង ដោយសារតែរឿងតូចតាច តែមនុស្សយើង ចូលចិត្តធ្វើរឿងតូច ក្លាយជាធំ រហូតឈ្លោះគ្នា ឈានដល់វាយតប់ និងបំផ្លាញទ្រព្យសម្បត្តិថែមទៀត។…
ភ្នំពេញ៖ ក្នុងសង្គមយើងសព្វថ្ងៃ ជម្លោះជាច្រើនកើតឡើង ដោយសារតែរឿងតូចតាច តែមនុស្សយើង ចូលចិត្តធ្វើរឿងតូច ក្លាយជាធំ រហូតឈ្លោះគ្នា ឈានដល់វាយតប់ និងបំផ្លាញទ្រព្យសម្បត្តិថែមទៀត។ ជម្លោះទាំងនោះ កើតចេញពីការផឹកស្រាគ្រឿងស្រវឹង និងសីលធម៌ រួមទាំងការមិនចេះអត់ធ្មត់ អត់អោន អធ្យាស្រ័យគ្នា។
កាលពីវេលាម៉ោង ៨យប់ ថ្ងៃទី១ ខែកញ្ញា ឆ្នាំ២០២១ នៅក្បែរភ្លើងស្តុបណតប្រ៊ីត តាមបណ្ដោយផ្លូវ២០០៤ ស្ថិតក្នុងសង្កាត់អូរបែកក្អម ខណ្ឌសែនសុខ រាជធានីភ្នំពេញ មានជម្លោះវាយតប់គ្នា ដោយសារតែរឿងជិះម៉ូតូសាចទឹកភ្លៀង ដែលដក់នៅលើចិញ្ចើមផ្លូវ រវាងអ្នកបើកបរម៉ូតូកង់បី និងអ្នកបើកបរម៉ូតូ។ ជម្លោះនោះ ដំបូងត្រឹមតែប្រកែកគ្នា តែក៏ក្លាយទៅជាការប្រើប្រាស់អំពើហិង្សា វ៉ៃគ្នា ផ្អើលពេញផ្លូវ រហូតដល់សមត្ថកិច្ចមូលដ្ឋាន ទៅអន្តរាគមន៍ សម្របសម្រួល នាំទៅប៉ុស្តិ៍ប៉ូលិស។
នៅមុនពេលកើតហេតុ គឺបន្ទាប់ពីភ្លៀងធ្លាក់មួយមេរួច ទឹកលិចផ្លូវ២០០៤ នៅចំណុចភ្លើងស្តុបណតប្រ៊ីត ហើយបុរសម្នាក់ អ្នកបើកបរម៉ូតូកង់បី មួយគ្រឿង ដោយមានស្ត្រីម្នាក់ រួមដំណើរជាមួយ។ លុះដល់ចំណុចកើតហេតុ ដែលកកស្ទះចរាចរណ៍ផង ស្របពេលដែលមានម៉ូតូមួយគ្រឿង ម៉ាក XR ពណ៌ស បើកបរដោយបុរសម្នាក់ ក្នុងស្ថានភាពស្រវឹង បានធ្វើដំណើរស្របទិសដៅគ្នា តាមពីក្រោយម៉ូតូកង់បី។ អ្នកបើកបរម៉ូតូនោះ ក៏បានព្យាយាម ជិះវ៉ាជែងខាងស្តាំម៉ូតូកង់បី ធ្វើឲ្យសាចទឹកភ្លៀង ដែលដក់នៅលើចិញ្ចើមផ្លូវ ទៅត្រូវលើអ្នកបើកបរម៉ូតូកង់បី។ បុរសទាំងពីរនាក់ ក៏ទាស់សម្តី ឈ្លោះប្រកែកគ្នាយ៉ាងតឹងសរសៃក រហូតឈានដល់ការប្រើប្រាស់អំពើហិង្សា ឈានដល់វាយកញ្ចក់ម៉ូតូកង់បី និងកុងទ័រម៉ូតូ XR បណ្ដាលឲ្យបែក ខូចខាតរៀងៗខ្លួន។
បុរសជាម្ចាស់ម៉ូតូ XR ជាភាគីជម្លោះម្ខាងទៀត បានទទួលស្គាល់ថា មុនកើតហេតុនេះ ខ្លួនបានផឹកស្រាបៀរអស់ ៦កំប៉ុង គ្នា ៣នាក់ ហើយពេលដែលគាត់ជិះម៉ូតូ ដល់ចំណុចកើតហេតុ គាត់ក៏បានជិះវ៉ាជែងម៉ូតូកង់បី ដោយក្នុងល្បឿនយឺតៗ។ ប៉ុន្តែស្រាប់តែបុរសជាអ្នកបើកបរម៉ូតូកង់បី ស្រែកជេរប្រមាទ មកលើរូបគាត់ ទើបគាត់ឈប់ម៉ូតូ ចុះទៅសួរនាំ ក៏ក្លាយជារឿងរាវ វាយតប់គ្នា ដួលនៅក្នុងទឹក បែកកញ្ចក់ទូរស័ព្ទ ដែលនៅក្នុងហោប៉ៅខោរបស់គាត់។ អ្នកបើកបរម៉ូតូកង់បី ក៏បានវាយបំបែកកញ្ចក់កុងទ័រម៉ូតូរបស់គាត់ បណ្តាលឲ្យបែក ខូចខាតបន្ថែមទៀត។
យ៉ាងណាក៏ដោយ សមត្ថកិច្ចមូលដ្ឋាន បានមកសម្របសម្រួល អន្តរាគមន៍ និងនាំភាគីទាំងពីរ ទៅកាន់ប៉ុស្តិ៍នគរបាលរដ្ឋបាលអូរបែកក្អម ដើម្បីដោះស្រាយគ្នា។ បន្ទាប់ពីមានសមត្ថកិច្ច ជួយសម្របសម្រួល ភាគីទាំងពីរ ក៏ព្រមបញ្ចប់រឿង នៅនឹងប៉ុស្តិ៍នគរបាលរដ្ឋបាលអូរបែកក្អម ដោយសុំទោសគ្នា ទៅវិញទៅមក និងយកម៉ូតូ និងកង់បី ទៅជួសជុលរៀងៗខ្លួន។
ករណីជម្លោះនេះ អាចផ្តើមចេញពីភ្លៀង និងការផឹកស្រា។ ដោយសារតែភ្លៀង ធ្វើឲ្យដក់ទឹកលើផ្លូវ ហើយបុរសអ្នកបើកបរម៉ូតូ XR បានផឹកស្រា រាងស្រឿងៗផង ក៏ក្លាហាន ក្លាយជាជម្លោះតែម្តង។ ម្យ៉ាងបើសិនជាបុរសអ្នកបើកបរម៉ូតូ XR បើកជែង កុំឲ្យសាចទឹកដាក់កង់បី ក៏មិនមានរឿងរ៉ាវវែងឆ្ងាយ រហូតដល់វាយតប់ បែកកញ្ចក់ទូរស័ព្ទ បែកកញ្ចក់ម៉ូតូកង់បី និងបែកកុងទ័រម៉ូតូនោះទេ។
ព្រះសម្មាសម្ពុទ្ធ បានលើកឡើងថា ការផឹកស្រា ឬគ្រឿងស្រវឹង នាំមកនូវវិនាស ៦ប្រការ គឺ១-វិនាសទ្រព្យ ២-បង្កជម្លោះ ៣-កើតរោគក្នុងខ្លួន ៤-ខូចឈ្មោះ ៥-បង្ហាញកេរ្តិ៍ខ្មាស់ទាំងរស់ និង៦-បាត់បង់បញ្ញា។ សព្វថ្ងៃ អ្នកផឹកស្រា ក៏បង្កគ្រោះថ្នាក់ចរាចរណ៍ រហូតដល់របួស និងស្លាប់រៀងរាល់ថ្ងៃថែមទៀត។
មួយវិញទៀត ករណីជម្លោះនោះ ក៏ផ្តើមពីរឿងតូចមួយ គឺសាចទឹកដាក់គ្នា ក៏ក្លាយជារឿងរ៉ាវ វ៉ៃគ្នា និងបំផ្លាញទ្រព្យសម្បត្តិរៀងៗខ្លួនថែមទៀត។ នេះសំណាងហើយ មិនបង្ករបួសស្នាមធ្ងន់ធ្ងរ ត្រូវចូលដេកពេទ្យ។ ចូរកុំភ្លេចថា «បើខឹង រឿងតូច នឹងក្លាយជារឿងធំ»។ ម្យ៉ាងទៀត «បើ ត នឹងវែង»។
ជម្លោះ កើតចេញពីភាគីទាំងសង្ខាង ដូចពាក្យចាស់ថា ទះដៃម្ខាង មិនលឺទេ។ តែបើអ្នកបើកម៉ូតូ XR បើថាប្រញាប់ណាស់ ព្រោះត្រូវបើកវ៉ាជែងគេខាងស្តាំដៃ ដែលខុសនឹងច្បាប់ចរាចរណ៍ ហើយវ៉ាផុតហើយ មិនព្រមជិះសំរុកទៅមុខទេ តែនៅមិនអស់ចិត្ត នឹងគេស្រែកជេរ។ រីឯអ្នកបើកកង់បី ក៏គួរតែគិតថា ស្រែកជេរគេ បានអីមកវិញ? បើសាចទឹកទទឹកអស់ហើយ។ ទោះជាជេរគេ ក៏ទឹកដែលសាចទទឹក ប្រឡាក់កង់បី និងខ្លួននោះ មិនស្ងួតវិញឯណា!។
ដោយសារតែមិនមានការអត់ធ្មត់រៀងៗខ្លួន ក៏កើតជាជម្លោះ បង្កការរំខានដល់គេឯង ជាអ្នកធ្វើដំណើរតាមផ្លូវ ហើយត្រូវខាតពេលផង បាត់ម៉ូយកំពុងជិះផង។ ទាំងពីរនាក់ ក៏ត្រូវឈឺខ្លួន ដោយសារតែវាយតប់គ្នា និងខូចកញ្ចក់ម៉ូតូ ទូរស័ព្ទថែមទៀត។ ករណីនេះ ក៏ចាត់ទុកជាសំណាងហើយ ដែលមិនបង្កគ្រោះថ្នាក់របួសធ្ងន់ធ្ងរ ដល់ភាគីជម្លោះ។ បើសិនជាវាយគ្នា រហូតដល់របួសធ្ងន់ធ្ងរ បែកក្បាល ឬបាក់ដៃ បាក់ជើង រហូតដល់ស្លាប់ផងនោះ គឺភាគីអ្នកចាញ់ ត្រូវចូលពេទ្យ ហើយអ្នកឈ្នះ ច្បាស់ជាត្រូវដេកគុកជាមិនខាន។
រឿងនេះ ជាការដាស់ស្មារតីខ្មែរយើងមួយចំនួន ដែលឆាប់ខឹង ហើយមិនចេះយោគយល់អធ្យាស្រ័យគ្នានោះឡើយ។ រឿងតូចតាចសោះ ក៏ខំប្រឹងបំប៉ោង រហូតដល់ក្លាយជាជម្លោះរឿងធំ។ បើមានភាគីម្ខាង មិនឈ្លោះ មិនឆ្លង មិនឆ្លើយ នោះក៏មិនកើតរឿងរ៉ាវវែងឆ្ងាយឡើយ ព្រោះការឈ្លោះគ្នា ជារឿងមិនមានប្រយោជន៍សោះឡើយ។ ខាតពេលផង ខូចឈ្មោះផង ហើយបើរហូតក្លាយជាអំពើហិង្សា វាយតប់គ្នា គឺឈឺខ្លួន របួសរៀងខ្លួន និងអាចក្លាយជារឿងល្មើសច្បាប់ ដែលត្រូវជាប់គុកថែមទៀត បើសិនជាបង្កឲ្យភាគីម្ខាង របួស ពិការ ឬក៏រហូតដល់ស្លាប់នោះ។ ល្មមៗ កុំឈ្លោះគ្នាអី។
ចូររៀនអត់អោន ហើយប្រកាន់នូវព្រហ្មវិហារធម៌ ៤ គឺ ១-មេត្តា (ស្រឡាញ់ រាប់អាន ការមិនប្រើអំពើហិង្សាដាក់គ្នា) ២-ករុណា ( សេចក្តីអាណិតអាសូរដាក់គ្នា) ៣-មុទិតា (ការមិនច្រណែនឈ្នានិសគ្នា ការត្រេកអរនឹងអ្នកដទៃបានសុខ) និងឧបេក្ខា (ការតាំងចិត្តជាកណ្តាល ប្រកបដោយភាពយុត្តិធម៌) នោះយើងម្នាក់ៗ នឹងបានសុខ ហើយអ្នកដទៃ ក៏បានសុខ ព្រោះជីវិតយើងម្នាក់ៗនេះ កើតមក មិនមែនសម្រាប់តែឈ្លោះទាស់ទែងគ្នានោះទេ នៅមានរឿងជីវិតច្រើនទៀត ដែលយើងម្នាក់ៗ ត្រូវប្រឈម និងដោះស្រាយ ជួបប្រទះរៀងរាល់ថ្ងៃ៕
ចែករំលែកព័តមាននេះ