ខេត្តស្វាយរៀង ៖ បើតាមសេចក្តីរាយការណ៍បានឱ្យដឹងថា មានករណីក្មេងៗឈ្លោះប្រវាយប្រតប់គ្នារហូតធ្វើឲ្យក្មេងស្រីម្នាក់អាយុ៤ឆ្នាំស្លា.ប់បាត់បង់ជីវិត បង្កឲ្យមានការភ្ញាក់ផ្អើលដល់អ្នកភូមិមកចោមរោមមើល ហើយដាក់ការសង្ស័យថា ជាអំពើឃាត.កម្ម តែតាមពិតគឺក្មេងៗជាបងប្អូនជីដូនមួយបង្កើតនឹងគ្នារស់នៅក្នុងដំបូលផ្ទះតែមួយនោះបានឈ្លោះរហូតវាយតប់គ្នា ហើយគ្មានឪពុកម្តាយរស់នៅជាមួយ ទើបធ្វើឲ្យក្មេងស្រីរងគ្រោះមានអាការៈគ្រុនក្តៅរហូត១៦ម៉ោង (គឺចាប់ពីម៉ោង៧យប់ ថ្ងៃទី៣០ ខែសីហា ដល់ម៉ោង១០និង១៥នាទីព្រឹកថ្ងៃទី៣១ ខែសីហា ឆ្នាំ២០២១) ទើបម្តាយមកដល់ តែជាអកុសលកុមារីរងគ្រោះបានស្លា.ប់បាត់បង់ជីវិតគួរឲ្យសង្វេគទៅហើយ។
សេចក្តីរាយការណ៍បន្តថា ក្មេងស្រីរងគ្រោះមានឈ្មោះ រិន ពិសី អាយុ០៤ឆ្នាំ មានទីលំនៅភូមិឈូកសរ ឃុំឈើទាលស្រុកស្វាយជ្រំ។
បើតាមម្តាយក្មេងរងគ្រោះឈ្មោះ យឹម សារ៉ែន អាយុ២៣ឆ្នាំ ជាស្ត្រីមេម៉ាយ មុខរបរកម្មការិនីរោងចក្រ នៅក្រុងបាវិត បានរៀបរាប់ទាំងទឹកភ្នែកថា រូបគាត់ជាស្ត្រីមេម៉ាយ បានចែកផ្លូវគ្នាជាមួយប្តីតាំងពីកូនស្រីនៅក្នុងផ្ទៃបាន០៦ខែមកម្ល៉េះ ។ រូបគាត់បានតស៊ូខំពពោះរហូតកូនស្រីកើតមក ហើយកូនស្រីរបស់គាត់មានឈ្មោះរិន ពិសី អាយុ០៤ឆ្នាំ ។
ម្តាយក្មេងស្រីរងគ្រោះបន្តថា ក្រោយមកនាងក៏បានយកកូនស្រីមកផ្ញើបងស្រីឲ្យជួយមើលថែ ដោយខ្លួនទៅធ្វើការជាកម្មការិនីរោងចក្រ ហើយដេកនៅផ្ទះជួលជិតរោងចក្រ ស្ថិតនៅក្រុងបាវិតនោះ ដោយមិនបានមកថែកូននោះទេ ។ តែមិនគួរណាកូនស្រីមកជួបរឿងបែបនេះទេ តើអ្នកណាសម្លា.ប់កូនស្រីនាង? សូមឲ្យសមត្ថកិច្ចជួយតាមចាប់ឃាត.ករមកផ្តន្ទាទោសតាមច្បាប់។
ទាក់ទិនករណីខាងលើនេះដែរ លោកវរសេនីយ៍ឯក ពិន សំអាន អធិការនៃអធិការដ្ឋាននគបាលស្រុកស្វាយជ្រំ បានឲ្យដឹងថា ករណីខាងលើនេះ គឺជាករណីក្មេងៗឈ្លោះគ្នាបងប្អូនដែលរស់នៅជាមួយគ្នា។ ហើយបើតាមការស្រាវជ្រាវរបស់សមត្ថកិច្ចជាមួយអាជ្ញាធរ និងការធ្វើកោសល្យវិច្ច័យរបស់គ្រូពេទ្យ ជាលទ្ធផលគឺជាអំពើហិ.ង្សាដោយចេតនា ដែលបានកើតឡើងដោយសារក្មេងរងគ្រោះជាមួយបងប្អូនជីដូនមួយ ជាជនសង្ស័យដែលមានអាយុ៩ឆ្នាំ។
លោកវរសេនីយ៍ឯក ពិន សំអាន បន្តថា ដំណើររឿង គឺស្ត្រីឈ្មោះ យឹម សារ៉ែន ជាម្តាយក្មេងស្រីរងគ្រោះបានយកកូនស្រីមកផ្ញើនឹងផ្ទះបងស្រី ដោយខ្លួនទៅធ្វើការជាកម្មការិនីរោងចក្រនៅក្រុងបាវិត ហើយស្នាក់នៅក្រុងបាវិត ។ លុះនៅឆ្នាំ២០២០-២០២១ បងស្រី២នាក់ប្តីប្រពន្ធ ដោយមានជីវភាពក្រីក្រ ក៏បាននាំគ្នាទាំង២នាក់ប្តីប្រពន្ធទៅធ្វើការនៅរាជធានីភ្នំពេញ ហើយទុកឲ្យកូនៗប្រុសស្រីចំនួន០៣នាក់ និងក្មួយស្រីនៅផ្ទះ គឺមានគ្នា០៤នាក់បងប្អូន ដោយកូនប្រុសច្បងមានអាយុ១៤ឆ្នាំ, កូនប្រុសទី២ មានអាយុ០៩ឆ្នាំ និងកូនស្រីទី៣ អាយុ០៧ឆ្នាំ ចំណែកក្មួយស្រីអាយុ៤ឆ្នាំ (ក្មេងស្រីរងគ្រោះ) នៅផ្ទះដោយគ្មានចាស់ទុំគ្រប់គ្រងឡើយ។
សមត្ថកិច្ចបានឲ្យដឹងទៀតថា មុនពេលកើតហេតុ ក្មេងស្រីរងគ្រោះអាយុ៤ឆ្នាំ រួមទាំងបងប្អូនជីដូនមួយចំនួន៣នាក់ទៀតបាននាំគ្នាទៅឃ្វាលគោ និងច្រូតស្មៅនៅឯវាលស្រែ ហើយក៏បានឈ្លោះប្រកែកគ្នានៅទីនោះ ខណៈពេលដែលក្មេងស្រីរងគ្រោះជាមួយបងប្រុសអាយុ៩ឆ្នាំលេងទឹក តែក៏ត្រូវបានបងប្រុសអាយុ១៤ឆ្នាំឃាត់ ហើយក៏ហៅមកផ្ទះវិញ ។
ប្រភពដដែលបន្តថា លុះម៉ោង០៦ល្ងាច បងប្រុសអាយុ១៤ឆ្នាំបានឡើងទៅដាំបាយញ៉ាំ ចំណែកឯប្អូនៗក៏នាំគ្នាលេង ហើយក៏ឈ្លោះវាយគ្នានៅក្រោមផ្ទះម្តងទៀត ខណៈពេលនោះក្មេងប្រុសអាយុ០៩ឆ្នាំ (ជនសង្ស័យ) បានយកខ្សែភ្លើងរឹត.កក្មេងស្រីរងគ្រោះរហូតស្រែកយំតែម្តង ។ ចំណែកបងប្រុសពេលឮសំឡេងប្អូនស្រីយំ ក៏បានចុះមកឃាត់ ហើយក៏បានចាប់ចេញពីគ្នាកុំឱ្យឈ្លោះប្រកែកគ្នាតទៅទៀត។
ប្រភពដដែលបន្តថា រហូតដល់យប់បងប្អូនទាំង០៤នាក់បាននាំគ្នាញ៉ាំបាយ ក្រោយពីញ៉ាំបាយរួច ក្មេងស្រីរងគ្រោះអាយុ០៤ឆ្នាំក៏ចាប់ផ្តើមមានអាការៈក្តៅខ្លួនតែម្តង លុះរហូតដល់ព្រឹកឡើងថ្ងៃទី៣១ ខែសីហា ឆ្នាំ២០២១ ក្មេងស្រីរងគ្រោះក្តៅខ្លួនកាន់តែខ្លាំងឡើង ទើបទូរស័ព្ទហៅស្ត្រីជាម្តាយក្មេងស្រីរងគ្រោះឲ្យមកផ្ទះ ដើម្បីយកកូនទៅពេទ្យ ។ លុះរហូតដល់ម៉ោង១០ព្រឹក ទើបម្តាយក្មេងរងគ្រោះមកដល់ ប៉ុន្តែជាអកុសលដោយសារតែក្មេងស្រីរងគ្រោះក្តៅខ្លួនខ្លាំងពេក ក៏បានស្លា.ប់នៅវេលាម៉ោង១០និង១៥នាទីព្រឹកនោះតែម្តងទៅ។
ប្រភពដដែលបន្តថា ក្រោយមកម្តាយក្មេងស្រីរងគ្រោះមិនទាន់បានដឹងរឿង ក៏បានមកប្តឹងសមត្ថកិច្ចថា ជាករណីព្រួតវាយសម្លា.ប់ ហើយសុំឲ្យសមត្ថកិច្ចចាប់ឃាត.ករយកមកផ្តន្ទាទោសតាមច្បាប់។
ប៉ុន្តែក្រោយពីសមត្ថកិច្ចធ្វើការត្រួតពិនិត្យ និងធ្វើការស្រាវជ្រាវ ទើបរកឃើញថា ជារឿងក្មេងៗឈ្លោះគ្នាជាមួយបងប្អូនជីដូនមួយ ដោយគ្មានមនុស្សចាស់នៅមើលថែ ហើយក្រោយកើតហេតុ ទុកឱ្យក្មេងស្រីរងគ្រោះក្តៅខ្លួនខ្លាំងរហូតដល់១៦ម៉ោង ទើបជ្រុលពេលបណ្តាលឱ្យក្មេងស្រីរងគ្រោះស្លា.ប់បែបនេះតែម្តង តែបើសិនជាមានមនុស្សចាស់នៅក្បែរ ហើយនាំយកទៅសង្គ្រោះនៅមន្ទីរពេទ្យ គឺអាចសង្គ្រោះបានហើយ។ ហើយណាមួយដោយសារក្មេងដែលជាជនសង្ស័យទើបតែអាយុ៩ឆ្នាំ ទើបសមត្ថកិច្ចមិនបានចាប់ខ្លួនទេ តែបានកោះហៅម្តាយឪពុកក្មេងឲ្យមកផ្ទះដើម្បីធ្វើការអប់រំ និងប្រគល់ស.ពឲ្យក្រុមគ្រួសារយកទៅធ្វើបុណ្យតាមប្រពៃណី៕
ចែករំលែកព័តមាននេះ