- ភ្នំពេញ
ភ្នំពេញ៖ មិនយូរទេ សាលារៀន ទាំងសាលារដ្ឋ និងសាលាឯកជន នឹងត្រូវបើកទ្វារឡើងវិញ ឆាប់ៗនេះ ខណៈដែលអត្រាអ្នកឆ្លង និងអ្នកស្លាប់ដោយកូវីដ១៩ នៅកម្ពុជាយើង…
ភ្នំពេញ៖ មិនយូរទេ សាលារៀន ទាំងសាលារដ្ឋ និងសាលាឯកជន នឹងត្រូវបើកទ្វារឡើងវិញ ឆាប់ៗនេះ ខណៈដែលអត្រាអ្នកឆ្លង និងអ្នកស្លាប់ដោយកូវីដ១៩ នៅកម្ពុជាយើង…
ភ្នំពេញ៖ មិនយូរទេ សាលារៀន ទាំងសាលារដ្ឋ និងសាលាឯកជន នឹងត្រូវបើកទ្វារឡើងវិញ ឆាប់ៗនេះ ខណៈដែលអត្រាអ្នកឆ្លង និងអ្នកស្លាប់ដោយកូវីដ១៩ នៅកម្ពុជាយើង ហាក់ដូចជាថយចុះ ខណៈដែលចំនួនអ្នកចាក់វ៉ាក់សាំងបង្ការជំងឺកូវីដ១៩ បានកាន់តែច្រើន។ ប៉ុន្តែទន្ទឹមនឹងការបើកឡើងវិញនូវសាលារៀន ខណៈអត្រាអ្នកឆ្លងកូវីដថយចុះនេះ ក៏នៅតែទាមទារឲ្យមានការប្រុងប្រយ័ត្នខ្ពស់ជាងមុន ព្រោះកូវីដ មិនទាន់ទៅណាឆ្ងាយឡើយ។
ក្នុងសារជាសំឡេងជូនទៅកាន់ជាពិសេសរដ្ឋមន្ត្រីក្រសួងអប់រំ យុវជន និងកីឡា កាលពីព្រឹកថ្ងៃទី៣១ ខែសីហា ឆ្នាំ២០២១ សម្តេចតេជោ នាយករដ្ឋមន្ត្រី ហ៊ុន សែន បានណែនាំដល់លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា ត្រូវពិភាក្សាជាមួយអភិបាលរាជធានីខេត្តទូទាំងប្រទេស ដើម្បីរៀបចំ និងពិនិត្យលទ្ធភាពបើកសាលារៀនឡើងវិញ ជាពិសេសនៅតំបន់ជនបទ ដែលមិនមានឆ្លងរាលដាលជំងឺកូវីដ១៩។
សម្តេចតេជោ ហ៊ុន សែន លើកឡើងថា ដោយសារតែស្ថានភាពកូវីដ១៩ ថមថយ ហើយកុមារ និងយុវវ័យ ចាក់វ៉ាក់សាំងក៏បានច្រើន រហូតដល់ជាង ១លាន ៥សែននាក់ហើយ។ ដូច្នេះក្រសួងអប់រំ ត្រូវពិភាក្សាជាមួយខេត្តរាជធានី ដើម្បីជ្រើសរើសសាលា ដែលត្រូវបើកឡើងវិញ ទាំងថ្នាក់បឋមសិក្សា មធ្យមសិក្សាកម្រិត១ និងកម្រិត២ នៅកន្លែង ដែលមិនមានឆ្លងកូវីដ ពិសេសនៅតំបន់ជនបទ។
សម្តេចតេជោ លើកឡើងថា ការសម្រេចបើកសាលារៀនឡើងវិញ តាមកន្លែង ដែលមិនមានឆ្លងកូវីដនេះ ត្រូវធ្វើឡើង ដោយមិនរង់ចាំ រហូតដល់បើកសាលារៀននៅទូទាំងប្រទេសនោះទេ គឺបើកសាលារៀន នៅភូមិឃុំ ដែលមិនមានឆ្លងរាលដាលកូវីដ១៩ ដោយត្រូវរក្សានូវវិធានការចាំបាច់នានា ដូចជា រក្សាគម្លាតសុវត្ថិភាព និងវិធានសុខាភិបាលនានា។
សម្តេចតេជោ ហ៊ុន សែន ក៏បានគូសបញ្ជាក់ថា បើសាលារៀន នៅបន្តបិទតទៅទៀត នឹងមានការលំបាកច្រើន ដោយអាចធ្វើឲ្យសិស្សានុសិស្ស ឈានទៅបោះបង់ការសិក្សា និងសិស្សមិនចេះអក្សរ ទោះជារៀនតាមអនឡាញ ដោយសារតែកុមារ និងសិស្សនៅជនបទ ពុំមានលទ្ធភាពរៀនតាមអនឡាញ ដូចសិស្សនៅទីក្រុង និងទីប្រជុំជននោះទេ។
សម្តេចតេជោ ហ៊ុន សែន ក៏បានលើកឡើងថា នៅតាមទីប្រជុំជន ដែលមានឆ្លងកូវីដ ឬក៏ឆ្លងតិច គឺអាចពិនិត្យលទ្ធភាពរៀនតាមអនឡាញ ឬរៀនតាមស្ថានភាពដោយផ្ទាល់ ដោយរក្សាគម្លាតសុវត្ថិភាព និងរៀបចំឲ្យសិស្សរៀនចម្រុះ។ តែនៅភូមិឃុំ ដែលមិនមានឆ្លងកូវីដ ត្រូវជ្រើសរើសបើកសាលារៀនឡើងវិញ។
សម្តេចតេជោ ហ៊ុន សែន ក៏បានលើកឡើងថា មកដល់ពេលនេះ ភាពស៊ាំ បានកើតឡើង នៅភ្នំពេញ និងខេត្តកណ្តាល ដោយនៅភ្នំពេញ ចំនួនអ្នកឆ្លងកូវីដ ធា្លក់ចុះ ហើយអ្នកឆ្លង ក៏មិនធ្ងន់ធ្ងរ ខណៈអ្នកស្លាប់ ក៏ថយចុះ។ ដូច្នេះ នេះជាចំណុចវិជ្ជមានមួយ ដែលឈានទៅបើកសង្គមសេដ្ឋកិច្ចទូទាំងប្រទេសឡើងវិញ ក្នុងនោះ ក៏មានវិស័យអប់រំ ផងដែរ។
ក្រសួងសុខាភិបាល ប្រកាសថា គិតត្រឹមថ្ងៃទី៣០ ខែសីហា ឆ្នាំ២០២១ នៅទូទាំងប្រទេស ចាក់វ៉ាក់សាំងកូវីដ សរុបបានចំនួនជាង ១០លាននាក់។ ក្នុងនោះ អ្នកចាក់វ៉ាក់សាំងអាយុចាប់ពី ១៨ឆ្នាំឡើងទៅ មានចំនួនជាង ៩លាន ១៧ម៉ឺននាក់។ ចំណែកកុមារ និងយុវវ័យ អាយុចាប់ពី ១២ឆ្នាំ រហូតដល់អាយុក្រោម ១៨ឆ្នាំ គិតត្រឹមថ្ងៃទី៣០ ខែសីហា ចាក់វ៉ាក់សាំង បានចំនួនជាង ១លាន ៥១ម៉ឺននាក់។ រីឯអ្នកចាក់វ៉ាក់សាំង ដូសទី៣ បានចំនួនជាង ៦១ម៉ឺននាក់។
ពាក់ព័ន្ធនឹងការរៀបចំបើកសាលារៀនឡើងវិញ កាលពីរសៀលថ្ងៃទី៣១ ខែសីហា ឆ្នាំ២០២១ ក្រសួងអប់រំ យុវជន និងកីឡា បានចេញសេចក្តីណែនាំ ស្តីពី ការបង្រៀន និងរៀនតាមបណ្តុំ សម្រាប់គ្រឹះស្ថានសិក្សាសាធារណៈ និងឯកជន នៅភូមិសាស្ត្រ ដែលមានហានិភ័យទាប។ ក្នុងនោះ សាលារៀនរដ្ឋ និងសាលាឯកជន ដែលត្រូវបើកបង្រៀនឡើងវិញ ត្រូវមានសិស្សចូលរៀន មិនឲ្យលើសពី ១៥នាក់ ក្នុង ១ថ្នាក់។ ប៉ុន្តែក្រសួងអប់រំ មិនទាន់ប្រកាសថា សាលារៀន ត្រូវបើកទ្វារឡើងវិញ នៅពេលណានោះទេ។
ក្នុងពេលឆ្លងកូវីដ១៩ តាមរយៈព្រឹត្តិការណ៍ឆ្លងសហគមន៍ ថ្ងៃ២០កុម្ភៈ ឆ្នាំ២០២១ សាលារៀន ទាំងសាលារៀនរដ្ឋ និងទាំងសាលាឯកជន បានផ្អាកដំណើរការ ហើយបើកបង្រៀន និងរៀនពីចម្ងាយតាមគ្រប់រូបភាព ដូចជា ការបង្រៀន និងរៀនតាមបណ្តុំ ដែលជាការមករៀនជុំគ្នា ក្នុងទ្រង់ទ្រាយតូច រវាងគ្រូបង្រៀន និងសិស្ស នៅទីកន្លែង ដែលមានសុវត្ថិភាព ដូចជា នៅសាលារៀន នៅតាមផ្ទះ តាមវត្តអារាម និងនៅកន្លែងសមស្រប ក្នុងភូមិសាស្ត្រ ដែលមិនមានឆ្លងកូវីដ ជាដើម។ នេះសម្រាប់នៅតំបន់ជនបទ ដែលសិស្សពុំមានលទ្ធភាពរៀនតាមអនឡាញ។
ដោយឡែក នៅរាជធានីភ្នំពេញ និងនៅទីប្រជុំជន ដែលគ្រូ និងសិស្ស មានលទ្ធភាពបង្រៀន និងរៀនតាមអនឡាញ ពីចម្ងាយ ពិសេសនៅសាលារៀនឯកជន គឺការបង្រៀន និងរៀន ធ្វើឡើងពីចម្ងាយតាមប្រព័ន្ធអនឡាញ ដូចជា តាមទូរទស្សន៍ជាតិ តាមតេឡេក្រាម តាម Zoom និងតាមប្រព័ន្ធ Microsoft team ជាដើម។
យ៉ាងណាក៏ដោយ សម្រាប់ការតៀមបើកសាលារៀនឡើងវិញ នាពេលឆាប់ៗនេះ ក្រសួងអបរំ បានផ្តល់អាទិភាពមុនគេ លើសិស្សថ្នាក់ទី៩ និងថ្នាក់ទី១២ ដើម្បីរៀបចំការប្រឡងសញ្ញាបត្រមធ្យមសិក្សាបឋមភូមិ ក្នុងខែវិច្ឆិកា និងមធ្យមសិក្សាទុតិយភូមិ ក្នុងខែធ្នូ ឆ្នាំ២០២១។ ក្រុមសិស្សនៅកម្រិតមធ្យមសិក្សា ដែលមានអាយុចាប់ពី ១២ឆ្នាំឡើង បានចាក់វ៉ាក់សាំងការពារជំងឺកូវីដ១៩ ដែលនៅភ្នំពេញ និងខេត្តមួយចំនួនចាក់បាន ២ដូសរួចរាល់ហើយ ខណៈដែលគ្រូបង្រៀន នៅទូទាំងប្រទេស ក៏ស្ថិតក្នុងក្រុមជួរមុខ បានចាក់វ៉ាក់សាំងការពារជំងឺកូវីដ១៩ ចំនួន ៣ដូសរួចហើយដែរ មកដល់ពេលនេះ។
តែយ៉ាងណាក៏ដោយចុះ អំឡុងពេលបើកសាលារៀនឡើងវិញ ឆាប់ៗនេះ ក៏នៅតែទាមទារឲ្យទាំងគ្រូ ទាំងសិស្ស និងនៅក្នុងបរិវេណសាលារៀន ទោះបីជាសិស្ស ១ថ្នាក់ មានយ៉ាងច្រើនបំផុតត្រឹមតែ ១៥នាក់ក្តី ក៏វិធានការការពារកូវីដ នៅតែជាវិធានការចាំបាច់ ពិសេសទាំងសិស្សទាំងគ្រូ ត្រូវពាក់ម៉ាស គ្រប់ពេល លាងសម្អាតដៃញឹកញាប់ និងរក្សាគម្លាតសុវត្ថិភាព។ សាលារៀន ត្រូវមានអនាម័យ ទ្វារបង្អួច បើកចំហរ ឲ្យមានខ្យល់អាកាសចេញចូល ហើយមុននឹងសិស្សចូលរៀន តាមសាលា ក៏ត្រូវបាញ់ថ្នាំសម្លាប់មេរោគ ហើយវាស់កម្តៅនៅច្រកចេញចូល។ បើយកល្អ ក៏ត្រូវធ្វើតេស្តរហ័ស ទាំងគ្រូ ទាំងសិស្ស មុនពេលចូលរៀន ដោយអាច ១សប្តាហ៍ ធ្វើតេស្តម្តង ក៏ល្អដែរ បើសិនជាសាលារៀន មានលទ្ធភាព ព្រោះឧបករណ៍ធ្វើតេស្ត ក៏ធូរថ្លៃដែរ នៅក្រសួងប្រៃសណីយ៍ និងទូរគមនាគមន៍។ ការធ្វើតេស្តនេះ គួរតែធ្វើលើអ្នកសង្ស័យ ទាំងគ្រូទាំងសិស្ស និងទាំងបុគ្គលិកសាលារៀន។
ក្រៅពីកំណត់ឈប់ឲ្យមានការលក់នំចំណីក្នុងសាលារៀន អំឡុងពេលសាលារៀនបើកទ្វារឡើងវិញ ទាំងសាលារៀន ទាំងក្រសួងអប់រំ ពិសេសនៅសាលាឯកជន ក៏គួរតែគិតគូរលើមធ្យោបាយធ្វើដំណើររួម គឺឡានដឹកសិស្ស តើត្រូវរៀបចំដូចម្តេច ដើម្បីឲ្យរក្សាគម្លាតសុវត្ថិភាព ដូចនៅក្នុងថ្នាក់រៀន ដែលកំណត់ចំនួនសិស្ស មិនឲ្យលើសពី ១៥នាក់ ក្នុង ១ថ្នាក់។ ការជួបជុំសិស្សពេលចេញលេង និងនៅក្រៅសាលារៀន ក៏ជារឿងមួយ ដែលសាលារៀន និងក្រសួងអប់រំ មិនត្រូវមើលរំលងឡើយ ព្រោះថា យើងគិតគូរតែពីសុវត្ថិភាពក្នុងថ្នាក់រៀន ហើយបើសិនសិស្សានុសិស្ស ពពាក់ពពួននៅម៉ោងចេញលេង ឬក៏តាមផ្លូវធ្វើដំណើរពីសាលារៀន ទៅផ្ទះ និងពេលនៅផ្ទះ សិស្សដើរលេង មិនគោរពវិធានការពារខ្លួន ៣កុំ និង ៣ការពារ នោះហានិភ័យនៃការឆ្លងកូវីដ ពិសេសមេរោគបំប្លែងថ្មី ដែល អាចនឹងកើតឡើង ហើយនាំចូលសាលារៀន ក៏ថាបាន។ ចូរកុំភ្លេចថា ទោះបីជាចាក់វ៉ាក់សាំង ២ដូស ឬក៏ ៣ដូសរួចហើយ ក៏ដោយ ក៏នៅតែឆ្លងកូវីដ និងក៏អាចឈានទៅស្លាប់ដែរ បើសិនជាធ្វេសប្រហែស៕
ចែករំលែកព័តមាននេះ