ខេត្តប៉ៃលិន ៖ បន្ទាប់ពីសមត្ថកិច្ចនគរបាលខេត្តប៉ៃលិន បានធ្វើការស៊ើបអង្កេតអស់រយៈពេលជាច្រើនថ្ងៃ ទើបដឹងថា មានជនសង្ស័យប្រើប្រាស់ និងជួញដូរគ្រឿងញៀន បាននាំគ្នាទៅជួលបន្ទប់ផ្ទះជួលមួយកន្លែង នៅក្នុងបុរីរតនៈ ស្ថិតនៅភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន ទើបនៅវេលាម៉ោង៣ និង៣០នាទីរសៀល ថ្ងៃទី២៦ ខែសីហា ឆ្នាំ២០២១នេះ រហូតដល់វេលាម៉ោង៥ និង៣០នាទីល្ងាច កម្លាំងសមត្ថកិច្ចនគរបាលស្នងការខេត្ត បានចុះទៅធ្វើការឆែកឆេរបន្ទប់ផ្ទះជួលចំនួន២កន្លែងនៅក្នុងបុរីខាងលើ។ តែជនសង្ស័យទាំងនោះបានដឹងខ្លួនទាន់ពេល ក៏នាំគ្នាគេចខ្លួនមុនពេលកងកម្លាំងទៅធ្វើការហ៊ុំព័ទ្ធបន្ទប់ផ្ទះបុរីខាងលើ។
ប្រភពព័ត៌មានបានឱ្យដឹងថា ៖ មុនពេលកើតហេតុ កម្លាំងនគរបាលអធិការក្រុងប៉ៃលិន បានសហការជាមួយនឹងកម្លាំងនគរបាលស្នងការខេត្ត ចុះដេញតាមជនសង្ស័យប្រើប្រាស់គ្រឿងញៀនម្នាក់ ខណៈចុះល្បាតឃើញមានការសង្ស័យ ទើបហៅឱ្យឈប់ តែជនសង្ស័យនៅបន្តធ្វើដំណើរទៅមុខទើបចាប់ផ្តើមដេញពីភូមិតាង៉ែនលើ សង្កាត់ប៉ៃលិន ក្រុងប៉ៃលិន រហូតដល់ភូមិអូររអិល ឃុំស្ទឹងកាច់ ស្រុកសាលាក្រៅ ដោយមានការផ្ទុះអាវុធ១គ្រាប់មកលើសមត្ថកិច្ច និងផ្តួលម៉ូតូរត់គេចខ្លួនថែមទៀតផង។ ប្រភពបន្តទៀតថា ក្រោយមកទើបទទួលបានព័ត៌មានថា ជនសង្ស័យទាំងនោះ បាននាំគ្នាទៅជួលបន្ទប់ផ្ទះក្នុងបុរីស្នាក់នៅប្រើប្រាស់ និងជួញដូរគ្រឿងញៀន ដោយនគរបាលពិនិត្យឃើញ ប្រដាប់ជក់ ឬប្រើប្រាស់ថង់ សម្រាប់ច្រកគ្រឿងញៀនជាច្រើនផងដែរ។
សមត្ថកិច្ចនគរបាលក៏បានប្រមូលសម្ភារប្រើប្រាស់គ្រឿងញៀន ថង់សម្រាប់ច្រកគ្រឿងញៀនមួយចំនួន ដោយឆែកឆេរបន្ទប់ផ្ទះជួលចំនួន២កន្លែង។ ទោះបីជាពួកគេរត់កម្លាំងនគរបាល កំពុងដុតដៃដុតជើងតាមប្រមាញ់ ពួកក្រុមប្រើប្រាស់គ្រឿងញៀនទាំងនោះ ព្រោះកំណត់មុខសញ្ញាអស់ហើយ។ ចំណែកប្រជាពលរដ្ឋរស់នៅក្នុងបុរីបានឱ្យដឹងថា ៖ ជនសង្ស័យគ្រឿងញៀនទាំងនោះ ទើបតែនាំគ្នាទៅជួលបន្ទប់ផ្ទះក្នុងបុរីខាងលើ អស់រយៈពេល២ថ្ងៃប៉ុណ្ណោះ ហើយក៏នាំគ្នាផឹកស៊ីច្រៀងឡូឡា នាំឱ្យរំខានដល់ការដេករបស់អ្នកជិតខាង គឺដេកមិនលក់នោះឡើយ ព្រោះពួកគេនាំគ្នាផឹកស៊ីច្រៀងលេងតាំងពីល្ងាចរហូតដល់ជិតភ្លឺទើបនាំគ្នាឈប់ ជាហេតុធ្វើឱ្យគេដេកពួនមិនកើត ក៏ប្តឹងឱ្យនគរបាល។ ទោះបីជាយ៉ាងណា ជនសង្ស័យទាំងអស់ ដែលនាំគ្នាទៅជួលផ្ទះស្នាក់នៅបណ្តោះអាសន្នបានគេចខ្លួន តែនគរបាលនឹងបន្តតាមប្រមាញ់រហូតដល់ចាប់ឃាត់ខ្លួនយកមកផ្តន្ទាទោស តាមផ្លូវច្បាប់៕ ដោយ ៖ នីយ៉ា
ចែករំលែកព័តមាននេះ