រាជធានីភ្នំពេញ ៖ ក្រសួងសុខាភិបាល នៃព្រះរាជាណាចក្រកម្ពុជា កាលពីថ្ងៃទី២៥ សីហា ម្សិលមិញនេះ បានប្រកាសជូនដល់សាធារណជនទាំងអស់ឲ្យបានជ្រាប អំពីប្រភេទវ៉ាក់សាំងកូវីដ-១៩ ដែលអាចប្រើសម្រាប់ចាក់ជាដូសជំរុញ…
រាជធានីភ្នំពេញ ៖ ក្រសួងសុខាភិបាល នៃព្រះរាជាណាចក្រកម្ពុជា កាលពីថ្ងៃទី២៥ សីហា ម្សិលមិញនេះ បានប្រកាសជូនដល់សាធារណជនទាំងអស់ឲ្យបានជ្រាប អំពីប្រភេទវ៉ាក់សាំងកូវីដ-១៩ ដែលអាចប្រើសម្រាប់ចាក់ជាដូសជំរុញ ឫដូសទី៣ មិនបង្កផលរំខានខ្លាំងឡើយ ។
ក្រសួងសុខាភិបាល បានពន្យល់ថា ចំពោះការចាក់វ៉ាក់សាំងកូវីដ-១៩ ដូសជំរុញនេះ ទោះបី ប្រើប្រាស់វ៉ាក់សាំងប្រភេទដូចគ្នា ឬវ៉ាក់សាំងប្រភេទខុសគ្នា ក៏ដោយ មិនបង្កឲ្យមានផលរំខានច្រើន លើសពីផលរំខាន ដែលបង្កឡើងដោយវ៉ាក់សាំងនីមួយៗ ជាធម្មតានោះទេ ប៉ុន្តែការចាក់វ៉ាក់សាំងកូវីដ-១៩ ដូសជំរុញនេះ ថែមទាំងអាចបង្កើនបាននូវប្រព័ន្ធការពារ រាងកាយកាន់តែរឹងមាំ ក្នុងការទប់ទល់នឹងមេរោគកូវីដ-១៩ ប្រភេទដែលតា និងប្រភេទបំប្លែងខ្លួនថ្មី ផ្សេងទៀត ។
មានការលើកឡើងក្នុងបណ្តាញសង្គមថា ចាក់វ៉ាក់សាំងកូវីដ-១៩ ដូសទី៣ ដែលជាដូសជំរុញ មានផលរំខានមួយចំនួន ខុសគ្នាពីការចាក់ដូសទី១ និងទី២ ។ ក្រោយពេលចាក់ វ៉ាក់សាំង (អាស្រ្តាហ្សេនីកា) ដែលជាវ៉ាក់សាំងចាក់ដូសទី៣ អាការលេចចេញដូចជា ៖ ឈឺចាប់នៅកន្លែងចាក់ថ្នាំ, ឈឺក្បាល, អស់កម្លាំង, ឈឺសាច់ដុំ, គ្រុនក្តៅនិងញាក់, ឈឺសន្លាក់និងចង្អោរ, ហើម ឡើងក្រហម និងឡើងកំដៅនៅកន្លែងចាក់ថ្នាំ, ចេញស្នាមជាំស្រាល, ចេញកន្ទួលស្រាល, មានអារម្មណ៍មិនស្រួលខ្លួន, រោគសញ្ញាដូចជាផ្តាសាយ, ឈឺបំពង់ក, ក្អួតមិនលើសពី ៥ដង (ករណីកម្រ) ។
លោក វាសនា ដែលជាបុគ្គលិកក្រុមហ៊ុនមួយនៅភ្នំពេញ បានរៀបរាបថា «ក្រោយចាក់រួចអាការក្តៅខ្លួន ញ៉ាក់ និងឈឺក្បាលពេញមួយយប់ ក្នុងនោះក៏មានការចុករោយដៃជើង និងនៅក្នុងបរិវេណដៃដែលបានចាក់នោះផងដែរ ។ ប៉ុន្តែអាការនេះបានបាត់ទៅវិញ ក្រោយពេលចាក់បានមួយថ្ងៃ ខណៈខ្ញុំក៏បានប្រើប្រាស់ថ្នាំ ប៉ារ៉ាសេតាម៉ុល រួមទាំងថ្នាំបន្ថយកំដៅ និងឈឺក្បាលមួយចំនួនទៀត» ។
ចំណែកលោករិទ្ធ ក៏បានរៀបរាប់ស្រដៀងនេះថា បងប្អូនលោក ដែលភាគច្រើនជាគ្រូបង្រៀន បានចាក់ដូសទី៣ រួចរាល់ និងមានអាការក្តៅគ្រុន ជាដើម និងខ្លះរាគ ។
លោកបន្តថា «សម្រាប់ខ្ញុំ ការចាក់វ៉ាក់សាំងដូសទី៣ ឬដូសជំរុញតាំងពីថ្ងៃទី២៤ខែសីហា អាការដំបូងមិនមានអ្វីប្លែកនោះទេ ប៉ុន្តែនៅយប់ថ្ងៃដដែល វេលាម៉ោងប្រហែល២ភ្លឺ មានសភាពក្តៅខ្លួន រងា ញ៉ាក់ឈឺក្បាលម្តងៗ និងឈឺត្រង់កន្លែងចាក់ម្ជុល ចុកដៃជើង ប៉ុន្តែនៅពេលដែលខ្ញុំហូប ថ្នាំប៉ាណាឌូល មួយគ្រាប់សភាពឈឺក៏បានថយចុះបន្តិចៗ ទាំងកម្តៅ និងការស្រៀវរងា និងឈឺក្បាល ។ នៅពេលព្រឹក ខ្ញុំងូតទឹកក្តៅអ៊ុនៗ និងហូបថ្នាំ អាហារដូចធម្មតា ។ អ្វីដែលសំខាន់ ខ្ញុំសូមបងប្អូន ដែលមិនទាន់ចាក់ដូសទី៣ សូមកុំមានការភ័យខ្លាច ក្នុងការចាក់ដូសជំរុញនេះ ដោយសារ វាបាត់វិញ នៅរយៈពេលថ្ងៃបន្ទាប់ ។ ចំពោះការដូសទី៣នេះដែល បើព្រៀបធៀបនឹងការដូសទី១ ខ្ញុំអាការសុខគ្នា ពោលគឺដូសទី១ មានភាពតឹងទ្រូង ពិបាកដង្ហើម ក្តៅខ្លួន ប៉ុន្តែក្រោយពេល២ ឬ៣ថ្ងៃ មកក៏មក សភាធម្មតា» ។
ស្រាយចម្ងល់ខាងលើនេះ លោកជំទាវ ឱ វណ្ណឌីន ប្រធានគណៈកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេសធ្លាប់បានធ្វើការពន្យល់ថា ការចាក់វ៉ាក់សាំងកូវីដ-១៩ ដូសទី៣ គឺចាក់វ៉ាក់សាំង (អាស្រ្តាហ្សេនីកា) ដែលផលិតនៅប្រទេសអង់គ្លេស និងជប៉ុន ដោយវ៉ាក់សាំងទាំងនេះ ប្រើប្រាស់វីរុស ដើម្បីផលិតចេញជាវ៉ាក់សាំង ។ ជាទូទៅការចាក់វ៉ាក់សាំងតែងមានប្រតិកម្មឆ្លើយតប ដូចជា ក្តៅខ្លួន ឈឺក្បាល ឈឺសាច់ដុំ ចង្អោរ ក្អួត អស់កម្លាំងជាដើម ហើយប្រតិកម្មឆ្លើយតប ឬផលរំខាននោះក៏ខុសគ្នាទៅតាមប្រភេទវ៉ាក់សាំងនីមួយៗដែរ ។
បើមានផលរំខានទាំងអស់នោះ ក្រោយចាក់វ៉ាក់សាំងកូវីដ-១៩ រួច លោកជំទាវ បញ្ជាក់ថា កុំមានការព្រួយបារម្ភអ្វី ដោយសារតែវ៉ាក់សាំង ធ្វើការជាមួយសរីរាង្គ ហើយសរីរាង្គ ធ្វើការជាមួយវ៉ាក់សាំងវិញ ដោយផលរំខានទាំងនោះ នឹងបាត់ទៅវិញ ក្នុងរយៈពេលពេលយ៉ាងយូរ ៣ថ្ងៃប៉ុណ្ណោះ (២៤ម៉ោង ទៅ៧២ម៉ោង) ។
លោកជំទាវ បានបន្តថា “មានន័យថា ២៤ម៉ោងដំបូង ជាពេលវេលា ដែលកំពុងតែយូកយ៉ាក់ក្រឡុកក្រឡាក់គ្នា ធ្វើការជាមួយគ្នា បែកញើសផង អីផង ធ្វើឲ្យប្រតិកម្ម ប៉ុន្តែបន្ទាន់ពី១ថ្ងៃហ្នឹង ទៅស្ថានភាពមានការថយចុះហើយ ចាប់ពីថ្ងៃទី២ ទៅស្រួលឡើងវិញ យ៉ាងច្រើន នៅអស់កម្លាំងអីតិចតួចប៉ុណ្ណឹងឯង” ។
ទោះជាយ៉ាងនេះក្តី លោកជំទាវ ឱ វណ្ណឌីន ណែនាំឲ្យអ្នកចាក់វ៉ាក់សាំង ប្រញាប់ទៅជួបគ្រូពេទ្យជាបន្ទាន់ កុំសំងំនៅផ្ទះ ប្រសិនបើមានអាការៈថប់ដង្ហើម ឬដកដង្ហើមខ្លីៗ ៕
ចែករំលែកព័តមាននេះ