- ភ្នំពេញ
ភ្នំពេញ៖ ក្នុងពេលកូវីដ ពិសេសមេរោគបំប្លែងថ្មី អាល់ហ្វា និងដែលតា កំពុងឆ្លងរាតត្បាតក្នុងសហគមន៍តាមរាជធានីខេត្ត ពិសេសប៉ុន្មានថ្ងៃនេះ នៅភ្នំពេញ ឈានដល់ការបិទខ្ទប់តំបន់ និងផ្សារជាច្រើន…
ភ្នំពេញ៖ ក្នុងពេលកូវីដ ពិសេសមេរោគបំប្លែងថ្មី អាល់ហ្វា និងដែលតា កំពុងឆ្លងរាតត្បាតក្នុងសហគមន៍តាមរាជធានីខេត្ត ពិសេសប៉ុន្មានថ្ងៃនេះ នៅភ្នំពេញ ឈានដល់ការបិទខ្ទប់តំបន់ និងផ្សារជាច្រើន…
ភ្នំពេញ៖ ក្នុងពេលកូវីដ ពិសេសមេរោគបំប្លែងថ្មី អាល់ហ្វា និងដែលតា កំពុងឆ្លងរាតត្បាតក្នុងសហគមន៍តាមរាជធានីខេត្ត ពិសេសប៉ុន្មានថ្ងៃនេះ នៅភ្នំពេញ ឈានដល់ការបិទខ្ទប់តំបន់ និងផ្សារជាច្រើន ដោយសារតែពាក់ព័ន្ធមេរោគកូវីដ បំប្លែងថ្មី គឺយុទ្ធនាការចាក់វ៉ាក់សាំងបង្ការជំងឺកូវីដ ដូសទី៣ ឬដូសជំរុញ ក៏ត្រូវបានធ្វើឡើងជាបន្តបន្ទាប់។ ចាប់ផ្តើមមុនគេ នៅខេត្តជាប់ព្រំដែនថៃ តាំងពីថ្ងៃទី៨ ខែសីហា។
យុទ្ធនាការចាក់វ៉ាក់សាំងដូសទី៣ ឬដូសជំរុញនេះ ត្រូវបានធ្វើឡើង លើមន្ត្រីជួរមុខ និងកងកម្លាំងប្រដាប់អាវុធ ហើយមកដល់ថ្ងៃទី១៩ ខែសីហា គឺបានពង្រីកដល់រាជធានីខេត្ត នៅទូទាំងប្រទេសហើយ។ ចំណែកការចាក់វ៉ាក់សាំង ដូសទី៣ ដល់ប្រជាពលរដ្ឋសាមញ្ញ ត្រូវបានប្រជុំសិក្សា កាលពីថ្ងៃទី១៨ ខែសីហារួចហើយ តែលោក ម៉ម ប៊ុនហេង រដ្ឋមន្ត្រីក្រសួងសុខាភិបាល បានប្រាប់អ្នកកាសែត នៅព្រឹកថ្ងៃទី១៩ ខែសីហាថា នៅមិនទាន់មានការសម្រេចពីសម្តេចតេជោនាយករដ្ឋមន្ត្រី ហ៊ុន សែន ដើម្បីបើកឲ្យដំណើរការចាក់ នៅពេលណានៅឡើយទេ។
វ៉ាក់សាំងបង្ការជំងឺកូវីដ១៩ ដូសទី៣ ឬដូសជំរុញ ដែលកម្ពុជា ប្រើប្រាស់នាពេលនេះ ជាវ៉ាក់សាំង ប្រភេទ AstraZeneca ផលិតនៅជប៉ុន និងនៅប្រទេសអង់គ្លេស។
អ្នកជំនាញ លើកឡើងថា ជាទូទៅ វ៉ាក់សាំង តែងតែមានប្រតិកម្មឆ្លើយតប ហើយក៏អាស្រ័យទៅតាមប្រភេទនៃវ៉ាក់សាំងនីមួយៗផងដែរ។ ខ្លះចាក់ទៅក្ដៅខ្លួន ឈឺមួយចំហៀងខ្លួន ឈឺក្បាល ក្អួត និងឈឺពោះ ជាដើម។ នេះជាប្រតិកម្ម ជាធម្មតារបស់វ៉ាក់សាំងតែប៉ុណ្ណោះ។ ដូច្នេះសូមប្រជាពលរដ្ឋ កុំមានការព្រួយបារម្ដ ហើយការចេញនូវសញ្ញានេះ មានន័យថា វ៉ាក់សាំង កំពុងតែធ្វើការជាមួយសរីរាង្គរបស់យើង។ រោគសញ្ញាខាងលើនេះ នឹងអាចបាត់ទៅវិញ ក្នុងរយៈពេល ២៤ម៉ោង ៤៨ម៉ោង។ អ្នកខ្លះ ដល់ ៧២ម៉ោង ឬ៣ថ្ងៃប៉ុណ្ណោះ។
យ៉ាងណាក៏ដោយ អ្នកជំនាញសុខាភិបាល បានអំពាវនាវឲ្យប្រជាពលរដ្ឋយើង ត្រូវមានការប្រយ័ត្នប្រយែង ប្រសិនបើថប់ដង្ហើម ក្រោយចាក់វ៉ាក់សាំងដូសទី៣រួច សូមប្រញាប់ ជួបជាមួយគ្រូពេទ្យ កុំសំងំនៅផ្ទះ។ ប៉ុន្ដែអ្នកជំនាញ អះអាងថា ចាប់តាំងពីចាក់វ៉ាក់សាំង ដូសទី៣ មកទល់នឹងពេលនេះ នៅកម្ពុជាយើង មិនទាន់មានបងប្អូនណាម្នាក់ មានបញ្ហានេះ នៅឡើយទេ។
ការចាក់វ៉ាក់សាំង ដូសទី៣ ឬដូសជំរុញ ត្រូវបានធ្វើឡើង ដើម្បីបង្កើនប្រសិទ្ធភាពប្រឆាំងនឹងជំងឺកូវីដ១៩។ នៅប្រទេសថៃ ឥណ្ឌូនេស៊ី និងប្រទេសកាណាដា ជាដើម ក៏បានអនុវត្តនូវការចាក់វ៉ាក់សាំង ដូសទី៣ ដែលមិនមានបញ្ហាអ្វីកើតឡើងដល់សុខភាពនោះទេ។ ការចាក់វ៉ាក់សាំងដូសទី៣ នៅកម្ពុជា ត្រូវគេរំពឹងថា ដើម្បីឲ្យអ្វីៗ វិលមកសភាពធម្មតាវិញឆាប់ៗ ពោលគឺបញ្ឈប់ការឆ្លង ការចូលសម្រាកពេទ្យ និងបញ្ចប់ការស្លាប់ដោយសារកូវីដតទៅទៀត។
ការចាក់វ៉ាក់សាំងនៅកម្ពុជា មកដល់ពេលនេះ ត្រូវបានចាត់ទុកថា ជាជោគជ័យដ៏ធំ១។ ពោលគឺចាប់តាំងពីចាក់វ៉ាក់សាំងកូវីដ កាលពីថ្ងៃទី១០កុម្ភៈ ឆ្នាំ២០២១ មកដល់ថ្ងៃទី១៩ ខែសីហា ឆ្នាំ២០២១ នៅទូទាំងប្រទេស បានចំនួន ៩ ៣៨៨ ៧៣៥នាក់ ស្មើនឹង ៥៨,៦៨% នៃចំនួនប្រជាជនកម្ពុជាសរុប ១៦លាននាក់។ ក្នុងនោះ មនុស្សពេញវ័យអាយុចាប់ពី ១៨ឆ្នាំឡើងទៅ ចាក់វ៉ាក់សាំង បានចំនួន ៨ ៦១២ ១៣៧នាក់។ រីឯកុមារ និងយុវវ័យ អាយុចាប់ពី ១២ឆ្នាំ ដល់ក្រោម ១៨ឆ្នាំ ចាក់វ៉ាក់សាំង បានចំនួន ៧៧៦ ៥៩៨នាក់ គិតត្រឹមថ្ងៃទី១៩ ខែសីហា។ ដោយឡែក អ្នកចាក់វ៉ាក់សាំង ដូសទី៣ គិតត្រឹមថ្ងៃទី១៩ សីហា នៅទូទាំងប្រទេស ចាក់បានចំនួន ៣៩១ ៤០១នាក់។
អ្នកជំនាញ លើកឡើងរួចមកហើយថា ការចាក់វ៉ាក់សាំង មិនមែនជាវិធានការទិព្វ ដើម្បីទប់ស្កាត់ កុំឲ្យឆ្លងកូវីដ១៩ នោះទេ។ ប៉ុន្តែវ៉ាក់សាំង អាចជួយមិនឲ្យអ្នកឆ្លងកូវីដ ចូលសម្រាកពេទ្យ ឬក៏ឈានដល់គ្រោះថ្នាក់ដល់អាយុជីវិតច្រើនពេកនោះឡើយ។ មិនថា នៅកម្ពុជាយើងទេ នៅប្រទេសនានា លើពិភពលោក នៅអាមេរិក នៅប្រទេសអឺរ៉ុប ជាដើម អ្នកចាក់វ៉ាក់សាំងរួចហើយ ក៏នៅតែឆ្លងកូវីដ១៩ ឲ្យតែធ្វេសប្រហែស។
នៅពេលនេះ កំណើនអ្នកចាក់វ៉ាក់សាំង កាន់តែច្រើនឡើងៗ ហើយនៅពេលមន្ត្រីជួរមុខ និងកងកម្លាំងប្រដាប់អាវុធ បានចាក់វ៉ាក់សាំង ដូសទី៣ រួចរាល់ហើយ មិនថា នៅខេត្តជាប់ព្រំដែនថៃ ឬក៏នៅរាជធានីខេត្តនានា នៅទូទាំងប្រទេសនោះទេ គឺចំនួនអ្នកឆ្លងកូវីដ បានថយចុះថេរ មកត្រឹមជាង ៥០០នាក់ ក្នុង ១ថ្ងៃៗ ហើយអ្នកស្លាប់ដោយសារកូវីដ ប៉ុន្មានថ្ងៃនេះ ក៏ធ្លាក់មកត្រឹមជាង ១០នាក់។ ប៉ុន្តែកូវីដបំប្លែងថ្មី ដែលតា វាយលុកចូលសហគមន៍ ចូលផ្សារជាច្រើន នៅពេលនេះ ខណៈដែលប្រជាពលរដ្ឋទូទៅ ដែលបានចាក់វ៉ាក់សាំង ស៊ីណូវ៉ាក់ ឬស៊ីណូហ្វាម ២ដូសរួចមកហើយ មិនទាន់ទទួលបានវ៉ាក់សាំង ដូសទី៣ នៅឡើយ។
ដូច្នេះពេលនេះ បន្ទាប់ពីមន្ត្រីរាជការ កងកម្លាំងប្រដាប់អាវុធ នៅជួរមុខ ចាក់រួចរាល់ហើយ រាជរដ្ឋាភិបាល គួរតែសំរុកចាក់ដូសទី៣ ដល់ប្រជាពលរដ្ឋសាមញ្ញទូទៅ ហើយចាប់ផ្តើមមុនគេ នៅភ្នំពេញ ដែលកំពុងឆ្លងរាលដាលកូវីដ ប្រភេទបំប្លែងថ្មី ដែលតា និងអាល់ហ្វា។ បន្ទាប់មក ប្រើយុទ្ធសាស្ត្រផ្ការីក ចាក់ដូសទី៣ ចេញពីភ្នំពេញ ទៅកាន់បណ្តាខេត្តនានា ដូចយុទ្ធនាការចាក់វ៉ាក់សាំង ដូសទី១ កន្លងមក។
ទន្ទឹមនឹងការរង់ចាំចាក់វ៉ាក់សាំង ដូសទី៣ ដែលក្រសួងសុខាភិបាល បានប្រជុំរៀបចំ និងដាក់ជូនសម្តេចនាយករដ្ឋមន្ត្រី សម្រេចរួចហើយនេះ ប្រជាពលរដ្ឋយើងម្នាក់ៗ មិនថា នៅភ្នំពេញ ឬនៅតាមបណ្តាខេត្តនានានោះទេ អំឡុងពេលនេះ ត្រូវតែបន្តអនុវត្តវិធានការការពារខ្លួនពីកូវីដ ដោយអនុវត្តវិធានការសាមញ្ញៗ គឺ ៣កុំ និង៣ការពារ ឲ្យបានខ្ជាប់ខ្ជួនតទៅទៀត។ ចូរកុំភ្លេចថា ចាក់វ៉ាក់សាំងហើយ ក៏នៅតែអាចឆ្លងកូវីដដែរ បើសិនជាយើងធ្វេសប្រហែស៕
ចែករំលែកព័តមាននេះ