រាជធានីភ្នំពេញ ៖ បន្ទាប់ពីកោះសន្តិភាពបានផ្សាយព័ត៌មានពីនាងក្រមុំដ៏អភ័ព្វម្នាក់ជាកម្មការិនីរោងចក្រកិនជ័រក្រែប ជួបគ្រោះអកុសលសក់ចូលម៉ាស៊ីននិងស្រូបបកអស់សល់តែលលាដ៍ក្បាលធ្វើឱ្យមានការអាណិតអាសូរជាខ្លាំងពីសំណាក់សប្បុរសជននានាទាំងក្នុងនិងក្រៅប្រទេស។ នៅព្រឹកថ្ងៃទី៧ ខែធ្នូ ព្រះតេជគុណគឹម ជាកុសល គង់នៅវត្តសាមគ្គីធរារាម ក្រុងខេមឌិន រដ្ឋញូវចឺស៊ី សហរដ្ឋអាមេរិក បានជួយឧបត្ថម្ភនូវទឹកប្រាក់ចំនួន១០០ដុល្លារ តាមរយៈកោះសន្តិភាព ហើយនៅព្រឹកនោះដែរ ភ្នាក់ងារកោះសន្តិភាពក៏បាននាំយកអំណោយនោះទៅប្រគល់ជូនម្តាយកម្មការិនីរូបនេះដល់មន្ទីរពេទ្យព្រះកុសុមៈ រាជធានីភ្នំពេញ ។ នាងក្រមុំដ៏អភ័ព្វរូបនេះឈ្មោះភី ស្រីណេត អាយុ១៧ឆ្នាំ មានទីលំនៅភូមិហួចលិច ឃុំក្រែក ស្រុកពញាក្រែក ខេត្តកំពង់ចាម ហើយបានរងគ្រោះថ្នាក់សក់ចូលក្នុងម៉ាស៊ីនកិនជ័រក្រែប កាលពីវេលាម៉ោង៦និង៣០នាទីល្ងាចថ្ងៃទី១៩ ខែវិច្ឆិកា ឆ្នាំ២០១០ នៅក្នុងរោងចក្រក្បែរទីបញ្ជាការសឹករងស្រុកពញាក្រែក ខេត្តកំពង់ចាម ពេលកំពុងធ្វើការ ។
តាមព្រះតេជគុណគឹម ជាកុសល បានមានថេរដីកាតាមទូរស័ព្ទថា បន្ទាប់ពីអានវ៉េបសាយកោះសន្តិភាពឃើញក្មេងស្រីរូបនេះរងគ្រោះថ្នាក់ដោយម៉ាស៊ីនស្រូបយកសក់អស់ ព្រះអង្គមានការអាណិតអាសូរជាខ្លាំងហើយបានផ្តល់ថវិកាចំនួន១០០ដុល្លារតាមរយៈកោះសន្តិភាពដើម្បីជួយឧបត្ថម្ភដល់ក្មេងស្រីដែលកំពុងជួបការលំបាក ។ ទោះបីព្រះអង្គស្ថិតនៅសហរដ្ឋអាមេរិកក៏ដោយ ក៏ព្រះអង្គតែងតែនឹកដល់ប្រទេសកម្ពុជា និងតែងតែផ្តល់ថវិកាជួយឧបត្ថម្ភដល់ជនរងគ្រោះដោយប្រការផ្សេងៗ ជាការចូលរួមជួយផ្នែកមនុស្សធម៌ ដូចជាចូលរួមជួយជនរងគ្រោះក្នុងឧទ្ទវហេតុនៅលើស្ពានពេជ្រជាដើម ។ អ្នកមីងសុខ សារ៉ាត់ អាយុ៤៧ឆ្នាំ ត្រូវជាម្តាយនាងភី ស្រីណេត បន្ទាប់ពីទទួលបានអំណោយនេះក៏បានថ្លែងអំណរគុណរកអ្វីប្រៀបផ្ទឹមមិនបាន នៅក្នុងស្ថានភាពដែលគាត់កំពុងជួបការលំបាកបានព្រឹកខ្វះល្ងាចបានល្ងាចខ្វះព្រឹកហើយកំពុងបន្តព្យាបាលកូនស្រីក្នុងរយៈពេលដ៏វែងទៀត ។ តាមគ្រូពេទ្យឱ្យដឹងថា ក្មេងស្រីរងគ្រោះត្រូវការសំរាកព្យាបាលក្នុងរយៈពេលយ៉ាងយូរ និងត្រូវធ្វើការវះកាត់យកស្បែកគ្របពីលើលលាដ៍ក្បាល ៕
ចែករំលែកព័តមាននេះ