បំពេញទានគឺជាបារមីមួយក្នុងចំណោមបារមីទាំងសាមសិបដែលព្រះពុទ្ធទ្រង់បានធ្វើ និងទទួលផលរួចហើយ ។ ការធ្វើទានចេញពីបេះដូងដ៏បរិសុទ្ធបានធ្វើឱ្យយើងជាអ្នកបំពេញទានទទួលអារម្មណ៍ជ្រះថ្លានិងមានសេចក្តីសុខក្នុងចិត្តបំផុតដូចទទួលបានពរជ័យ លាភសំណាង សិរីសួស្តីអំពីទេវតាដូច្នោះដែរ ។
ការធ្វើទានដូចជា បរិច្ចាគសម្លៀកបំពាក់ ថវិកា អាហារ និងសម្ភារប្រើប្រាស់ផ្សេងៗដល់អ្នកក្រខ្សត់ ឬដល់អ្នកដែលកំពុងតែជោកជាំដោយសេចក្តីស្រេកឃ្លានក្នុងសម័យមហាទុរ្ភិក្សដោយជំងឺដ៏កាចសាហាវនេះជាទានដ៏មហាប្រសើរព្រោះជាកាលទានគឺធ្វើទានត្រូវតាមកាល ។
ក្នុងពេលធ្វើទានទៅកាន់ពួកគេ បើទោះជាត្រូវរក្សាគម្លាតក្តី ក៏អ្នកគួរតែផ្តល់ភាពស្និទ្ធស្នាលជាមួយនឹងវាចាផ្អែមល្ហែម កែវភ្នែកដ៏ស្រទន់ និងភាពកក់ក្តៅដែលធ្វើឱ្យពួកគេមានអារម្មណ៍ថាអ្នកជាចំណែកមួយនៃជីវិតពួកគេ ។
វេលានេះការធ្វើទានដល់អ្នកដែលកំពុងជួបប្រទះនឹងបញ្ហាជីវភាពរស់នៅដូចជា អ្នកកំពុងតែប៉ះពាល់ខ្វះស្បៀងអាហារធ្ងន់ធ្ងរព្រោះតែបញ្ហាកូវីដ គ្រោះធម្មជាតិ ភ្លើងឆេះផ្ទះជាដើម ពួកគេពិតជាត្រូវការជំនួយពីអ្នកយ៉ាងខ្លាំង ដូចនេះអ្នកគប្បីចូលរួមបរិច្ចាគជាជំនួយដូចជាអង្ករត្រឹមតែបួនដប់គីឡូក៏ពួកគេសប្បាយចិត្តបំផុត ពិសេសនៅពេលដែលអ្នកបានធ្វើទង្វើទាំងអស់នេះហើយនឹងធ្វើឱ្យអ្នកមានអារម្មណ៍ថាស្ងប់ក្នុងចិត្តរបស់អ្នក ដូចទទួលបានទឹកអម្រឹតអំពីទេវតាស្រោចស្រពរូបកាយដ៏ត្រជាក់ដូច្នោះដែរ ។
ទោះជាយ៉ាងណាចូរអ្នកកុំធ្វើទានដោយការប្រកាន់បក្សពួកឬដើម្បីទទួលបានមុខមាត់ឱ្យសោះ ព្រោះទង្វើបែបនេះនឹងធ្វើឱ្យអ្នកទទួលបានផលអាក្រក់ទៅថ្ងៃមុខវិញទេ ដែលអាចបញ្ជាក់បានថាអ្នកជាមនុស្សដែលមានពុតត្បុត ប្រៀបដូចពាក្យចាស់ពោលថា ធ្វើទានទាក់លាភនោះអី ។
ការធ្វើទានគ្រាន់តែដើម្បីឱ្យគេឃើញ ឱ្យគេសរសើរ ដើម្បីមុខមាត់នោះ ហាក់ដូចជាមិនបានធ្វើទានយ៉ាងដូច្នោះដែរ ព្រោះជាទានមិនបរិសុទ្ធ ។ ផ្ទុយទៅវិញពេលកំពុងធ្វើទាន បើអ្នកញុំាងចិត្តខ្លួនឯងឱ្យសប្បាយ ឱ្យជ្រះថ្លា បំភ្លេចរឿងរ៉ាវដែលមិនល្អទាំងឡាយចោលអស់ នោះការបរិច្ចាគទានរបស់អ្នកនឹងបានផលច្រើន ព្រោះចិត្តដ៏ស្អាតបរិសុទ្ធ ។
ការបំពេញទានដែលពិសេសបំផុតគឺការធ្វើទានដោយមិនទាមទារឬចង់បានការដឹងគុណ និងសំណងអ្វីមកវិញឡើយ ព្រោះពេលអ្នកធ្វើទានចំពោះនរណាម្នាក់មានន័យថាអ្នកបានស្ម័គ្រចិត្តជួយដល់អ្នកនោះដោយមិនគិតពីការសងអ្វីត្រឡប់មកវិញឡើយ ដូចនេះពេលធ្វើបុណ្យហើយពុំគួរគប្បីរំលើកឡើងប្រាប់គេទេ ទុកឱ្យអ្នកដទៃគេដឹង គេទទួលស្គាល់ដោយខ្លួនគេចុះទើបមានតម្លៃមហាសាល ។
ក្រោយពេលអ្នកបានបំពេញសេចក្តីល្អរួចហើយ នឹងធ្វើឱ្យអ្នកយល់ថារូបកាយរបស់អ្នកស្រាល ស្រឡះ ចិត្តស្ងប់ល្អ ហាក់ដូចជាទទួលបានពរជ័យ លាភសំណាង សិរីសួស្តី ជ័យលាភអំពីទេវតាប្រទានឱ្យ គឺមានសេចក្តីសុខតាំងពីលោកនេះរហូតដល់លោកខាងមុខ ៕ សាន សារិន
ចែករំលែកព័តមាននេះ