- ភ្នំពេញ
ភ្នំពេញ៖ រហូតមកដល់ថ្ងៃទី១៦ ខែសីហា ឆ្នាំ២០២១ គឺរាជធានីខេត្តទាំង ២៥ នៅទូទាំងប្រទេស ត្រូវបានកំណត់ឲ្យប្រជាពលរដ្ឋគ្រប់រូប ជាប់កាតព្វកិច្ច ត្រូវពាក់ម៉ាស…
ភ្នំពេញ៖ រហូតមកដល់ថ្ងៃទី១៦ ខែសីហា ឆ្នាំ២០២១ គឺរាជធានីខេត្តទាំង ២៥ នៅទូទាំងប្រទេស ត្រូវបានកំណត់ឲ្យប្រជាពលរដ្ឋគ្រប់រូប ជាប់កាតព្វកិច្ច ត្រូវពាក់ម៉ាស និងរក្សាគម្លាតសុវត្ថិភាព។ កាតព្វកិច្ចនេះ ជាវិធានការបង្ការ និងទប់ស្កាត់ការឆ្លងរាលដាលជំងឺកូវីដ១៩ ពិសេសមេរោគថ្មី ដែលតា ដែលកំពុងឆ្លងរាលដាលខ្លាំង ក្នុងសហគមន៍យើង។
កាលពីថ្ងៃទី១៦ ខែសីហា ឆ្នាំ២០២១ ក្រសួងសុខាភិបាល បានប្រកាសដាក់ឲ្យអនុវត្តកាតព្វកិច្ចពាក់ម៉ាស និងកាតព្វកិច្ចរក្សាគម្លាតសុវត្ថិភាព នៅ ១៥ខេត្តទៀត រួមមាន៖ ខេត្តពោធិ៍សាត់ បាត់ដំបង មណ្ឌលគិរី ក្រចេះ ស្ទឹងត្រែង កំពត កែប កំពង់ធំ ព្រះវិហារ ប៉ៃលិន កោះកុង កំពង់ឆ្នាំង ត្បូងឃ្មុំ និងខេត្តឧត្តរមានជ័យ។ ខេត្តទាំង ១៥នេះ ត្រូវបានកំណត់យកជាភូមិសាស្ត្រ ដែលមានការឆ្លងរាលដាលនៃជំងឺកូវីដ១៩ ក្នុងព្រឹត្តិការណ៍សហគមន៍ ២០កុម្ភៈ។
កាលពីថ្ងៃទី២២ ខែមីនា ឆ្នាំ២០២១ ក្រសួងសុខាភិបាល បានចេញប្រកាស ស្តីពី កាតព្វកិច្ចពាក់ម៉ាស និងកាតព្វកិច្ចរក្សាគម្លាតសុវត្ថិភាព។ ការកំណត់នេះ បានធ្វើឡើង ក្នុងពេលជំងឺកូវីដ១៩ បានបន្តឆ្លងរាលដាលខ្លាំង នៅកម្ពុជា។ ពោលគឺចាប់ពី ២នាក់ឡើងទៅ នៅទីសាធារណៈ ឬនៅទីកន្លែង ដែលតម្រូវឲ្យពាក់ម៉ាស និងរក្សាគម្លាត បើប្រជាពលរដ្ឋណាម្នាក់ មិនពាក់ម៉ាស់ ឬក៏មិនរក្សាគម្លាតសុវត្ថិភាព យ៉ាងតិច ១,៥ម៉ែត្រពីគ្នា ត្រូវផាកពិន័យពី ២០ម៉ឺនរៀល ទៅ ១លានរៀល។
កាលពីថ្ងៃទី២៤ ខែមីនា ឆ្នាំ២០២១ ក្រសួងសុខាភិបាល បានកំណត់ជាលើកដំបូងនូវភូមិសាស្ត្រ ដែលត្រូវតែអនុវត្តកាតព្វកិច្ចពាក់ម៉ាស និងកាតព្វកិច្ចរក្សាគម្លាតសុវត្ថិភាព នៅ ៥រាជធានីខេត្ត រួមមាន៖ រាជធានីភ្នំពេញ ខេត្តព្រះសីហនុ ខេត្តកណ្តាល ខេត្តព្រៃវែង និងខេត្តសៀមរាប។
បន្ទាប់មក កាលពីថ្ងៃទី១៤ ខែមេសា ឆ្នាំ២០២១ ក្រសួងសុខាភិបាល បានដាក់ខេត្តស្វាយរៀង ជាតំបន់ឆ្លងរាលដាលជំងឺកូវីដ-១៩ ដែលតម្រូវឱ្យអនុវត្តនូវកាតព្វកិច្ចពាក់ម៉ាស និងរក្សាគម្លាតសុវត្ថិភាព ដើម្បីទប់ស្កាត់ជំងឺឆ្លងកូវីដ១៩។
នៅថ្ងៃទី៥ ខែឧសភា ឆ្នាំ២០២១ ក្រសួងសុខាភិបាល ក៏មានកំណត់យកខេត្ត ៣ទៀត គឺតាកែវ កំពង់ចាម និងខេត្តកំពង់ស្ពឺ ត្រូវអនុវត្តកាតព្វកិច្ចពាក់ម៉ាស និងកាតព្វកិច្ចរក្សាគម្លាតសុវត្ថិភាព ខណៈដែលនៅថ្ងៃទី៦ ខែឧសភា ឆ្នាំ២០២១ ខេត្តបន្ទាយមានជ័យ ក៏បានប្រកាស ដាក់ចេញនូវកាតព្វកិច្ចពាក់ម៉ាស់ និងរក្សាគម្លាតសុវត្ថិភាព ដើម្បីទប់ស្កាត់ការឆ្លងរាលដាល ជំងឺកូវីដ១៩។
ដូច្នេះ គិតត្រឹមថ្ងៃទី១៦ ខែសីហា ឆ្នាំ២០២១ គឺរាជធានីខេត្តទាំង ២៥ នៅទូទាំងប្រទេស ត្រូវបានកំណត់ឲ្យប្រជាពលរដ្ឋគ្រប់រូប ជាប់កាតព្វកិច្ច ត្រូវពាក់ម៉ាស និងរក្សាគម្លាតសុវត្ថិភាព។ ជាវិធានការបន្ទាន់ និងសាមញ្ញ ដើម្បីបង្ការ និងទប់ស្កាត់ការឆ្លងរាលដាលជំងឺកូវីដ១៩ ពិសេសមេរោគកូវីដ បំប្លែងថ្មី ដែលកំពុងឆ្លងរាតត្បាត នៅក្នុងសហគមន៍យើងជាច្រើន នាពេលនេះ។
មកដល់ពេលនេះ ប្រជាពលរដ្ឋយើងមួយចំនួន ហាក់ដូចជាស៊ាំនឹងកូវីដ។ ប៉ុន្តែភាពស៊ាំនេះ ត្រូវតែជាការស៊ាំនឹងការរស់នៅតាមគន្លងថ្មី ក្នុងបរិបទកូវីដ។ ពោលគឺវិធានការ ៣កុំ និង៣ការពារ នៅតែបន្តអនុវត្ត រួមទាំងការផ្លាស់ប្តូរទម្លាប់ក្នុងជីវិតប្រចាំថ្ងៃ ពិសេសកាត់បន្ថយការចេញក្រៅផ្ទះ ដែលមិនចាំបាច់ ពិសេសគឺការជួបជុំផឹកស៊ីគ្រឿងស្រវឹង និងផឹកកាហ្វេ មិនថា បងប្អូន មិត្តភក្តិ អ្នកធ្វើការងារ ឬក៏អ្នកជិតខាងនោះទេ។
ចូរកុំភ្លេចថា កូវីដ១៩ នៅឆ្ងាយពីទីបញ្ចប់ បើទោះបីជាប្រទេសកម្ពុជាយើង មានសញ្ញានៃការថយចុះនូវការចម្លង និងការស្លាប់ក្តី តែហានិភ័យនៃការកើនឡើងនៃករណីជំងឺកូវីដ១៩ ដោយសារតែវីរុសកូវីដ១៩ ប្រភេទដែលតា ត្រូវបានក្រសួងសុខាភិបាល ប្រកាសកាលពីថ្ងៃទី១៦ ខែសីហាថា មានខ្ពស់ណាស់។
របាយការណ៍របស់ក្រសួងសុខាភិបាល បង្ហាញថា ចាប់ពីថ្ងៃទី៣១ ខែមីនា ឆ្នាំ២០២១ ដល់ថ្ងៃទី១៣សីហា ឆ្នាំ២០២១ កម្ពុជាបានរកឃើញអ្នកមានវិជ្ជមានវីរុសកូវីដ១៩ ប្រភេទ ដែលតា លើពលករត្រលប់ពីប្រទេសថៃ ពលករមកពីប្រទេសវៀតណាម អ្នកដំណើរមកតាមជើងហោះហើរ បុគ្គលិកសុខាភិបាល មន្ត្រីរាជការ និងអ្នកភូមិនៅក្នុងសហគមន៍ សរុបទាំងអស់ ចំនួន ៤៩៤នាក់ ( ស្ត្រី ២៤៣នាក់ ) និងបានប៉ះពាល់ដល់បណ្តារាជធានីខេត្ត ចំនួន ២២ រួចទៅហើយ លើកលែងតែខេត្តចំនួន ៣ប៉ុណ្ណោះ គឺខេត្តកែប ខេត្តតាកែវ និងខេត្តក្រចេះ ដែលនៅមិនទាន់មានរបាយការណ៍ពីករណី ដែលតា នេះនៅឡើយ។
ដោយឡែក ក្នុងរយៈពេល ២៤ម៉ោងចុងក្រោយ ក្រសួងសុខាភិបាល ប្រកាសថា មានអ្នកឆ្លងកូវីដ១៩ថ្មី ចំនួន ៥៥៦នាក់ ជាសះស្បើយ ៧១៦នាក់ និងស្លាប់ថ្មី ១៤នាក់ កាលពីថ្ងៃទី១៦ ខែសីហា ឆ្នាំ២០២១។ ក្នុងចំណោមអ្នកឆ្លងថ្មីទាំង ៥៥៦នាក់ កាលពីថ្ងៃទី១៦ ខែសីហា គឺមាន ១៦៧នាក់ ជាករណីនាំចូលពីក្រៅប្រទេស ដែលសំដៅលើអ្នកដំណើរតាមយន្តហោះ និងពលករខ្មែរ ឆ្លងដែនមកពីប្រទេសថៃ។ គិតត្រឹមថ្ងៃទី១៧ ខែសីហា នៅទូទាំងប្រទេស រកឃើញអ្នកឆ្លងកូវីដ សរុបចំនួន ៨៦៥៩៧នាក់។ ជាសះស្បើយ ៨១៩១៨នាក់ និងករណីស្លាប់សរុប ចំនួន ១៧១៨នាក់។
ដូច្នេះបើត្រូវចេញក្រៅផ្ទះ គ្រប់គ្នាក៏ត្រូវតែពាក់ម៉ាស និងរក្សាគម្លាតសុវត្ថិភាព។ បើមិនពាក់ម៉ាស និងមិនរក្សាគម្លាតសុវត្ថិភាព អាចមានហានិភ័យឆ្លងកូវីដផង ហើយក៏អាចត្រូវផាកពិន័យចន្លោះពី ២០ម៉ឺនរៀល ទៅដល់ ១លានរៀលទៀត ក្នុងម្នាក់ៗ។ ហេតុនេះ បើមិនចង់អស់លុយ ហើយជាពិសេសបើមិនចង់ឆ្លងកូវីដ ត្រូវតែពាក់ម៉ាស់ និងរក្សាគម្លាតសុវត្ថិភាព។ វិធានការ ៣កុំ និង៣ការពារ ក៏នៅតែចាំបាច់ សម្រាប់គ្រប់គ្នា និងគ្រប់កាលៈទេសៈ។
សូមពាក់ម៉ាស និងសូមរក្សាគម្លាតសុវត្ថិភាព ឲ្យដូចយើងពាក់មួកសុវត្ថិភាព នៅពេលបើកបរ និងធ្វើដំណើរតាមម៉ូតូ។ តែមិនមែនពាក់ម៉ាស រក្សាគម្លាតសុវត្ថិភាព និងពាក់មួកសុវត្ថិភាព ដោយសារតែដើម្បីកុំឲ្យប៉ូលិសចាប់ផាកលុយនោះទេ។ សំខាន់បំផុត ទាំងអស់គ្នា ត្រូវយល់ថា ដើម្បីសុវត្ថិភាពជាចម្បង និងមុនគេរបស់បុគ្គលអ្នកពាក់ម៉ាស អ្នករក្សាគម្លាត និងសម្រាប់អ្នកពាក់មួកសុវត្ថិភាពនោះឯង៕ មុត ស្រីពៅ
ចែករំលែកព័តមាននេះ