រាជធានីភ្នំពេញ ៖ កម្មករ-កម្មការិនីរោងចក្រកាត់សម្លៀកបំពាក់យីហោវីនកូ ដែលថៅកែជនជាតិតួកគីមិនព្រមបើកប្រាក់ខែឱ្យ បានធ្វើបាតុកម្មបិទផ្លូវច្រកចេញចូលតំបន់សេដ្ឋកិច្ចពិសេសភ្នំពេញកាលពីវេលាព្រឹកថ្ងៃទី១៤ មករា ស្ថិតក្នុងភូមិត្រពាំងគល់
រាជធានីភ្នំពេញ ៖ កម្មករ-កម្មការិនីរោងចក្រកាត់សម្លៀកបំពាក់យីហោវីនកូ ដែលថៅកែជនជាតិតួកគីមិនព្រមបើកប្រាក់ខែឱ្យ បានធ្វើបាតុកម្មបិទផ្លូវច្រកចេញចូលតំបន់សេដ្ឋកិច្ចពិសេសភ្នំពេញកាលពីវេលាព្រឹកថ្ងៃទី១៤ មករា ស្ថិតក្នុងភូមិត្រពាំងគល់ សង្កាត់កន្ទោក ខណ្ឌពោធិ៍សែនជ័យ បន្ទាប់ពីការតវ៉ានោះមានរយៈពេលជិត១អាទិត្យមកហើយនៅតែគ្មានដំណោះស្រាយនោះ ។ ការតវ៉ានោះមិនមានអំពើហិង្សាណាមួយកើតឡើងទេ ។
តាមប្រភពព័ត៌មានឱ្យដឹងថា រោងចក្រកាត់ដេរសម្លៀកបំពាក់យីហោវិកូនមានទីតាំងស្ថិតនៅតំបន់សេដ្ឋកិច្ចពិសេសភ្នំពេញក្នុងភូមិព្រៃបឹង សង្កាត់កន្ទោក ខណ្ឌពោធិ៍សែនជ័យ ដែលមានកម្មករ កម្មការិនីបម្រើការងារសរុបជាង១២០០នាក់ ដែលមជ្ឈដ្ឋាននានា សង្ស័យថារោងចក្រជួបបញ្ហាក្ស័យធុន ទើបគ្មានលុយបើកឱ្យកម្មករបែបនេះ ។ កម្មករបានធ្វើកូដកម្មរយៈពេលជិត១អាទិត្យកន្លងមកហើយ បន្ទាប់ពីថៅកែមិនបើកប្រាក់ខែឱ្យ ហើយកម្មករទាំងនោះបានសម្តែងការព្រួយបារម្ភខ្លាចថៅកែវេចបង្វេចរត់ចោលថែមទៀតផង ។ ពួកគេបានទាមទារឱ្យមានដំណោះស្រាយ២ចំណុច គឺ៖ទី១-សូមឱ្យថៅកែជនជាតិតួកគីបើកប្រាក់ឈ្នួលដែលពួកគេធ្វើការនៅក្នុងខែធ្នូ ឆ្នាំ ២០១៥ ។ ប៉ុន្តែក្រោយពេលមានការពិភាក្សាគ្នារកដំណោះស្រាយរវាងតំណាងកម្មករ និងថៅកែរោងចក្រទើបកម្មករ ព្រមបើកផ្លូវវិញរង់ចាំស្តាប់លទ្ធផលនៃការដោះស្រាយនោះសិន ។
ក្រុមកម្មករអះអាងថា ប្រាក់ឈ្នួលដែលពួកគេម្នាក់ត្រូវទទួលបាន ហើយថៅកែមិនព្រមបើកឱ្យនោះ ចាប់ពី១២៥ដុល្លារឡើងទៅ ហើយពួកគេត្រូវការចំណាយទៅលើការជួលផ្ទះស្នាក់នៅ ការធ្វើដំណើរ និងការហូបចុក ផ្សេងៗទៀត មិនតែប៉ុណ្ណោះម្ចាស់ផ្ទះបានទារលុយហើយ ដែលជាហេតុធ្វើឱ្យមានការលំបាកខ្លាំងណាស់ ព្រោះថៅកែមិនព្រមបើកឱ្យបែបនេះ ។ ទី២-សូមឱ្យថៅកែកំណត់គោលការណ៍ឱ្យបានច្បាស់លាស់ថាតើត្រូវបិទទ្វាររោងចក្រ ឬក៏បើកទ្វារបន្តទៀត ។ បើបិទទ្វាររោងចក្រលែងដំណើរការហើយ ថៅកែត្រូវតែគិតគូរទូទាត់ប្រាក់ឈ្នួលនិងប្រាក់ដំណាច់ឆ្នាំ ប្រាក់រង្វាន់ផ្សេងៗទៅតាមច្បាប់ការងារជូនពួកគេ ។
ប្រភពដដែលឱ្យដឹងថា រោងចក្រខាងលើនោះ ត្រូវក្ស័យធនទើបថៅកែគ្មានលុយសម្រាប់បើកឱ្យកម្មករ បង្កឱ្យមានការផ្ទុះជាកូដកម្ម បាតុកម្មបែបនេះឡើង ប៉ុន្តែកម្មករបាននិយាយថា ពួកខ្លួនមិនបានដឹងថា តើរោងចក្រត្រូវក្ស័យធនមែន ឬបែបណានោះឡើយ ។ កន្លងមកមិនមានសញ្ញាណាមួយដែលគួរឱ្យសង្ស័យថា រោងចក្រក្ស័យធននោះទេ ព្រោះការងារមានធ្វើមិនដែលខាន មិនដែលមានពេលឈប់សម្រាក១ថ្ងៃណាឡើយ ហើយកន្លងមកពេលដល់ដាច់ខែគឺថៅកែបើកលុយឱ្យហើយ។ ប៉ុន្តែពេលនេះ ដល់ពេលកំណត់បើកប្រាក់ឈ្នួលហើយ ស្រាប់តែថៅកែគ្មានលុយបើកឱ្យ និងម្តងថា ថ្ងៃនេះ ម្តងថាថ្ងៃនោះ ទើបពួកគេនាំគ្នាបះបោរ ។ ពីដំបូងតវ៉ានៅមុខរោងចក្រប៉ុណ្ណោះ ប៉ុន្តែដោយសារអស់រយៈពេលជិត១អាទិត្យហើយ គ្មានដំណោះស្រាយណាមួយទាល់តែសោះនោះ ទើបនាំគ្នាចេញពីមុខរោងចក្រ រួចតវ៉ាបិទផ្លូវនៅខាងមុខតំបន់សេដ្ឋកិច្ចពិសេសបែបនេះវិញ ដើម្បីពន្លឿនការដោះស្រាយ ។
ដោយឡែករោងចក្រមួយទៀត យីហោហុីយ៉ងជីន មានកម្មករប្រមាណ២៥០នាក់ ជារោងចក្រផលិតគ្រឿងអេឡិចត្រូនិកមានថៅកែជាជនជាតិចិនក៏បានផ្ទុះការតវ៉ាដែរនៅពេលចេញហូបបាយថ្ងៃត្រង់ ។ មូលហេតុបណ្តាលមកពីថៅកែមិនព្រមបើកប្រាក់ឈ្នួលនៅក្នុងខែធ្នូ ឆ្នាំ២០១៥ ឱ្យដូចគ្នាទៅនឹងរោងចក្រកាត់ដេរសម្លៀកបំពាក់វីកូដែរ ។
កម្មករ-កម្មការិនីទាំងនោះបាននាំគ្នាចាកចេញពីរោងចក្រ ទាំងអស់បោះចោលការងារ ហើយមួយចំនួនត្រឡប់ទៅផ្ទះ និងមួយចំនួនទៀតបាននាំគ្នាប្រមូលផ្តុំនៅមុខរោងចក្រ ទាមទាររកដំណោះស្រាយពីថៅកែ និងអាជ្ញាធរពាក់ព័ន្ធនានា ។ រោងចក្រនោះក៏ត្រូវបានសង្ស័យថា ក្ស័យធនដែរ ៕
ចែករំលែកព័តមាននេះ