កម្ពុជាបានបញ្ជាក់ជាថ្មីនូវតួនាទីជាអ្នកដឹកនាំកាន់តែខ្លាំងឡើងរបស់ខ្លួន នៅក្នុងការទូតក្នុងតំបន់ ខណៈដែលខ្លួនកំពុងទទួលតួនាទី ជាប្រទេសសម្របសម្រួលប្រទេស សម្រាប់ទំនាក់ទំនងសន្ទនាអាស៊ាន-សហរដ្ឋអាមេរិកនា អាណត្តិឆ្នាំ ២០២៤-២០២៧ ដោយគូសបញ្ជាក់ពីការប្តេជ្ញាចិត្តរបស់ខ្លួនក្នុងការជំរុញសន្តិភាព ស្ថិរភាព និងវិបុលភាពនៅទូទាំងអាស៊ីអាគ្នេយ៍…
កម្ពុជាបានបញ្ជាក់ជាថ្មីនូវតួនាទីជាអ្នកដឹកនាំកាន់តែខ្លាំងឡើងរបស់ខ្លួន នៅក្នុងការទូតក្នុងតំបន់ ខណៈដែលខ្លួនកំពុងទទួលតួនាទី ជាប្រទេសសម្របសម្រួលប្រទេស សម្រាប់ទំនាក់ទំនងសន្ទនាអាស៊ាន-សហរដ្ឋអាមេរិកនា អាណត្តិឆ្នាំ ២០២៤-២០២៧ ដោយគូសបញ្ជាក់ពីការប្តេជ្ញាចិត្តរបស់ខ្លួនក្នុងការជំរុញសន្តិភាព ស្ថិរភាព និងវិបុលភាពនៅទូទាំងអាស៊ីអាគ្នេយ៍ ។
ក្នុងអំឡុងកិច្ចប្រជុំកំពូល អាស៊ាន-អាមេរិកលើកទី១៣ ថ្នាក់ដឹកនាំអាស៊ានដោយមានកម្ពុជាជាប្រទេសសម្របសម្រួល បានពិនិត្យឡើងវិញនូវវឌ្ឍនភាពនៃទំនាក់ទំនងសន្ទនាក្នុងរយៈពេលមួយឆ្នាំកន្លងមក និងបានអនុម័តសេចក្តីថ្លែងការណ៍ចក្ខុវិស័យរួម ដើម្បីលើកកម្ពស់អាស៊ាន និងអាមេរិកឱ្យកាន់តែរឹងមាំ មានសុវត្ថិភាព និងវិបុលភាព។ នេះបើតាមសេចក្តីប្រកាសរបស់ក្រសូងការបរទេស ។
នៅក្នុងកិច្ចប្រជុំកំពូលនោះ សម្តេចធិបតី ហ៊ុន ម៉ាណែត បានបញ្ជាក់ជាថ្មីអំពីការប្តេជ្ញាចិត្តរបស់កម្ពុជា ក្នុងការរក្សាសន្ទុះវិជ្ជមាននៃទំនាក់ទំនងអាស៊ាន-សហរដ្ឋអាមេរិក ។ សម្តេចធិបតីបានសន្យាថា កម្ពុជានឹងធ្វើការយ៉ាងជិតស្និទ្ធិជាមួយសហរដ្ឋអាមេរិក និងរដ្ឋសមាជិកអាស៊ានទាំងអស់ ដើម្បីពង្រឹងកិច្ចសហប្រតិបត្តិការក្នុងតំបន់បន្ថែមទៀត ជាពិសេស នៅក្នុងវិស័យសំខាន់ៗដូចជា ការផ្លាស់ប្តូរឌីជីថល នវានុវត្តន៍ និងការអភិវឌ្ឍប្រកបដោយចីរភាព។
សម្តេចធិបតីបានមានប្រសាសន៍ថា «ក្នុងនាមជាប្រទេសសម្របសម្រួលទំនាក់ទំនងសន្ទនាអាស៊ាន-សហរដ្ឋអាមេរិក ពីឆ្នាំ២០២៤ ដល់ឆ្នាំ២០២៧ កម្ពុជាប្តេជ្ញាក្នុងការរក្សាសន្ទុះវិជ្ជមានបច្ចុប្បន្ន និងធ្វើការយ៉ាងជិតស្និទ្ធិជាមួយសហរដ្ឋអាមេរិកនិងប្រទេសអាស៊ានទាំងអស់ដើម្បីពង្រឹងសន្តិភាព ស្ថិរភាព និងវិបុលភាពក្នុងតំបន់» ។
សម្តេចធិបតីបានគូសបញ្ជាក់ពីតួនាទីរបស់សហរដ្ឋអាមេរិក ក្នុងនាមជាអ្នកដឹកនាំសកលក្នុងវិស័យបច្ចេកវិទ្យា និងនវានុវត្តន៍ ហើយបានអំពាវនាវឱ្យមានការគាំទ្រកាន់តែខ្លាំងឡើងក្នុងការជំរុញការធ្វើសមាហរណកម្មឌីជីថលរបស់អាស៊ាន ជាពិសេស តាមរយៈកិច្ចព្រមព្រៀងក្របខណ្ឌសេដ្ឋកិច្ចឌីជីថលអាស៊ាន ។
សម្តេចធិបតីក៏បានសង្កត់ធ្ងន់លើតម្រូវការសម្រាប់កិច្ចសហការកាន់តែប្រសើរឡើងលើបញ្ហាប្រឈមឆ្លងដែន និងគំនិតផ្តួចផ្តើមកសាងសមត្ថភាព។ ក្នុងអំឡុងពេលនៃកិច្ចប្រជុំកំពូលនោះ លោកប្រធានាធិបតី ដូណាល់ ត្រាំ បានសរសើរភាពជាដៃគូដែលកំពុងកើនឡើងរវាងសហរដ្ឋអាមេរិក និងអាស៊ាន ដោយបានសម្តែងនូវ «សេចក្តីរីករាយ និងកិត្តិយស» របស់លោកក្នុងការធ្វើជាសាក្សីនៃសេចក្តីប្រកាសរួមរវាងនាយករដ្ឋមន្ត្រីកម្ពុជា និងថៃ ដែលលោកបានពិពណ៌នាថាជា
«ជំហានប្រវត្តិសាស្ត្រឆ្ពោះទៅរកសន្តិភាពយូរអង្វែង»។
លោកប្រធានាធិបតីត្រាំ បានបញ្ជាក់ជាថ្មីនូវការប្តេជ្ញាចិត្តយ៉ាងមុតមាំរបស់សហរដ្ឋអាមេរិកក្នុងការជំរុញភាពជាដៃគូរបស់ខ្លួនជាមួយអាស៊ាន និងពង្រឹងមិត្តភាព និងកិច្ចសហប្រតិបត្តិការរយៈពេលវែងនៅក្នុងតំបន់ឥណ្ឌូ-ប៉ាស៊ីហ្វិក។
នាឱកាសនោះ សម្តេចធិបតីក៏បានសម្តែងការកោតសរសើរយ៉ាងជ្រាលជ្រៅជូនលោកប្រធានាធិបតី ត្រាំ ចំពោះភាពជាអ្នកដឹកនាំដ៏ម៉ឺងម៉ាត់របស់លោកក្នុងការសម្របសម្រួលកិច្ចព្រមព្រៀងឈប់បាញ់ថ្មីៗរវាងកម្ពុជា និងថៃ ដោយកត់សម្គាល់ថាការចូលរួមជាបន្តបន្ទាប់របស់លោកឆ្លុះបញ្ចាំងពីការប្តេជ្ញាចិត្តពិតប្រាកដចំពោះសន្តិភាព និងស្ថិរភាពនៅក្នុងតំបន់ ។
ចែករំលែកព័តមាននេះ