រាជធានីភ្នំពេញ ៖ ករណីបុរសម្នាក់ (សុំមិនបង្ហាញអត្តសញ្ញាណ) បានលោតពីលើជាន់ទី៣ នៃអគារផ្សារទំនើបអ៊ីអន៣ ហើយបានស្លាប់បាត់បង់ជីវិតនៅនឹងកន្លែង ត្រូវបានក្រុមហ៊ុន អ៊ីអន ម៉ល…
រាជធានីភ្នំពេញ ៖ ករណីបុរសម្នាក់ (សុំមិនបង្ហាញអត្តសញ្ញាណ) បានលោតពីលើជាន់ទី៣ នៃអគារផ្សារទំនើបអ៊ីអន៣ ហើយបានស្លាប់បាត់បង់ជីវិតនៅនឹងកន្លែង ត្រូវបានក្រុមហ៊ុន អ៊ីអន ម៉ល (ខេមបូឌា) ឯ.ក ចេញសេចក្តីថ្លែងការណ៍នៅល្ងាចថ្ងៃទី២៧ ខែតុលា ឆ្នាំ២០២៥ ពាក់ព័ន្ធនឹងឧបទ្ទវហេតុកើតឡើងនៅផ្សារទំនើប អ៊ីអន ម៉ល មានជ័យ ។
ឧបទ្ទវហេតុនេះ បង្កឲ្យមានការភ្ញាក់ផ្អើលនៅវេលាម៉ោង០១និង៣១នាទីរសៀលថ្ងៃចន្ទ ទី២៧ តុលានេះ នៅចំណុចផ្សារទំនើប AEON ទី៣ ស្ថិតនៅផ្លូវ៦០ម៉ែត្រ សង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ។
យោងតាមសេចក្តីថ្លែងការណ៍របស់ក្រុមហ៊ុន អ៊ីអន ម៉ល (ខេមបូឌា) ឯ.ក បានឲ្យដឹងថា ក្រុមហ៊ុនមានការសោកស្ដាយដោយទទួលបានដំណឹងអំពីឧបទ្ទវហេតុ ដ៏រន្ធត់មួយបានកើតឡើងនៅរសៀលថ្ងៃចន្ទ ទី២៧ ខែ តុលា ឆ្នាំ២០២៥នេះ នៅបរិវេណ ផ្សារទំនើប អ៊ីអន ម៉ល មានជ័យ។ នៅប្រមាណជាម៉ោង១ និង៣១នាទីរសៀល មានជនបរទេសម្នាក់បានលោត ពីលើអគារ ជាន់ទី៣ នៃផ្សារទំនើប។ ហេតុការណ៍នេះបានធ្វើអោយមានការភ្ញាក់ផ្អើលទៅដល់ ក្រុមហ៊ុន អ្នកជួលទីតាំង ក្នុងផ្សារទំនើប និង អតិថិជន ។
ក្រោយពេលកើតហេតុភ្លាមៗ ក្រុមការងារគ្រប់គ្រងផ្សារទំនើប បានអនុវត្តវិធានការបន្ទាន់ស្របទៅតាម នីតិវិធីប្រតិបត្តិចំពោះឧបទ្ទវហេតុ។ អាជ្ញាធរមូលដ្ឋាន រួមទាំងមន្ត្រីនគរបាល ត្រូវបានទាក់ទងយ៉ាងឆាប់ រហ័ស និងបានមកដល់កន្លែងកើតហេតុ ដើម្បីហ៊ុំព័ទ្ធទីតាំង និងចាប់ផ្ដើមការងារស៊ើបអង្កេតដែលចាំបាច់ ។
វីឌីអូក្នុងកាមេរ៉ាសុវត្ថិភាពរបស់យើង ព្រមទាំងការបំភ្លឺពីអ្នកឃើញហេតុការណ៍ផ្ទាល់ បានបញ្ជាក់ថា បុគ្គលដែលបានស្លាប់ មានវត្តមាននៅទីតាំងកើតហេតុតែម្នាក់ឯង មុនពេលដែលហេតុការណ៍នោះបាន កើតឡើង ហើយគ្មានភស្តុតាងណាមួយ ដែលបង្ហាញថាមានការបង្កជម្លោះ ឬ ការជាប់ពាក់ព័ន្ធនឹង បុគ្គលណាមួយផ្សេងទៀតឡើយ។ តាមរយៈសក្ខីកម្មទាំងនេះ មន្ត្រីនគរបាលបានសន្និដ្ឋានជាបឋមថា ឧបទ្ទវហេតុខាងលើនេះ គឺជាករណី “ការធ្វើអត្តឃា.តសម្លា.ប់ខ្លួន“។ យើងខ្ញុំកំពុងតែសហការយ៉ាងសកម្ម ជាមួយនឹងអាជ្ញាធរ នៅក្នុងដំណើរការនៃការស៊ើបអង្កេត ។
យើងខ្ញុំសូមសម្តែងនូវការសោកស្ដាយ និង រំលែកទុក្ខយ៉ាងក្រៀមក្រំ ដល់គ្រួសារនៃសពជនដែលបានស្លាប់ ចំពោះការបាត់បង់សមាជិកគ្រួសាររបស់ពួកគេ។
ក្រុមហ៊ុន អ៊ីអន ម៉ល (ខេមបូឌា) ឯ.ក យកចិត្តទុកដាក់ចំពោះសុវត្ថិភាព និងសន្តិសុខ របស់ក្រុមហ៊ុន អ្នកជួលទីតាំង និង អតិថិជនរបស់យើង ដោយចាត់ទុកវាជាអាទិភាពដ៏ចម្បងបំផុត។ យើងខ្ញុំប្តេជ្ញារក្សា នូវបរិយាកាសសន្តិសុខ នៅផ្សារទំនើបទាំងអស់របស់យើង។ យើងខ្ញុំនឹងបន្តពិនិត្យ និងពង្រឹងវិធានការ សន្តិសុខ ដើម្បីធានាដល់សុខសុវត្ថិភាពរបស់អតិថិជនគ្រប់រូប។
យើងខ្ញុំសូមថ្លែងអំណរគុណដល់អាជ្ញាធរមានសមត្ថកិច្ច ចំពោះការចាត់វិធានការបន្ទាន់ភ្លាមៗ និងដោយ វិជ្ជាជីវៈខ្ពស់។ យើងខ្ញុំក៏សូមអរគុណផងដែរ ដល់ក្រុមហ៊ុនអ្នកជួលទីតាំង និងអតិថិជនទាំងអស់ សម្រាប់ ការយោគយល់ និងសហការចំពោះឧបទ្ទវហេតុដ៏រន្ធត់មួយនេះ ៕
ចែករំលែកព័តមាននេះ