បន្ទាយមានជ័យ ៖ សាច់ និងគ្រឿងក្នុងជ្រូក១៥០០គីឡូក្រាម ត្រូវបានមន្ត្រីជំនាញការិយាល័យផលិតកម្ម និងបសុព្យាបាលនៃមន្ទីរកសិកម្មខេត្តសហការណ៍ជាមួយកម្លាំងយោធាសឹករង ស្រុកម៉ាឡៃ ចាប់បាននៅព្រឹកថ្ងៃទី១៤ សីហា ២០២១ លើដងផ្លូវលំមួយជិតបន្ទាត់ព្រំដែន ក្នុងភូមិសន្តិភាពឃុំទួលពង្រ ស្រុកម៉ាឡៃ ។
សាច់ និងគ្រឿងក្នុងជ្រូកចម្រុះនេះ មន្ត្រីជំនាញចាប់បានស្ថិតលើរថយន្តម៉ាកកូរ៉េ១គ្រឿង ពាក់ស្លាកលេខបាត់ដំបង ៣A.២៥៦១ ដោយក្នុងនោះមាន៣០កេះស្នោ ដែលក្នុង១កេះមានទម្ងន់៥០គីឡូក្រាម សរុប១៥០០គីឡូក្រាម ។
ប្រភពពីមន្ត្រីជំនាញថា ក្រោយឃាត់បានពុំមានជនណាម្នាក់ ចេញមុខទទួលខុសត្រូវថា ជាម្ចាស់ឡើយ ខណៈអ្នកបើកបររថយន្តដឹកសាច់ និងគ្រឿងក្នុងខាងលើឆ្លើយបែបដោះសារថា ខ្លួនគ្រាន់តែស៊ីឈ្នួលដឹកឲ្យ និងមិនស្គាល់ម្ចាស់នោះទេ ហើយថា សាច់ទាំងនេះគ្រោងដឹកទៅកាន់ខេត្តបាត់ដំបង ។
លោកហ៊ុយ ទូច ប្រធានការិយាផលិតកម្ម និងបសុព្យាបាលនៃមន្ទីរកសិកម្មខេត្តប្រាប់តាមទូរស័ព្ទថា ខាងលោកបានសហការណ៍ជាមួយកម្លាំងយោធាសឹករងស្រុកម៉ាឡៃពិតជាបានធ្វើការចាប់សាច់ និងគ្រឿងក្នុងជ្រូកខាងលើមែន ។
ប្រធានការិយាល័យរូបនេះបន្តថា ករណីចាប់សាច់ និងគ្រឿងក្នុងជ្រូកនេះ គឺឃាត់មនុស្ស២នាក់ផងដែរ (ម្នាក់ជាអ្នកបើកបររថយន្ត និងម្នាក់ជាអ្នករួមដំណើរ) ហើយយោងតាមការសាកសួរអ្នកបើកបររថយន្តដឹកសាច់ និងគ្រឿងក្នុងខាងលើហាក់និយាយដោះសារថា ខ្លួនមិនស្គាល់ម្ចាស់សាច់ទាំងនេះទេ ។
លោកហ៊ុយ ទូច បន្តថា សាច់ទាំងនេះ និងមនុស្សទាំង២នាក់ កំពុងនាំយកទៅសាកសួរបន្តនៅការិយាល័យ ។ លោកបញ្ជាក់ថា សាច់ទាំងនេះគ្មានលិខិតអនុញ្ញាតិពីក្រសួងឡើយ ហើយការវេចខ្ចប់នេះទៀតសោតក៏មិនត្រឹមត្រូវតាមស្តង់ដា ឬបទដ្ឋានបច្ចេកទេសនោះដែរ ។ លោកបន្តថា បើការដឹកជញ្ជូនមានលក្ខណៈស្តង់ដា ឬតាមបទដ្ឋានបច្ចេកទេសតែអត់ច្បាប់ខាងលោកគ្រាន់តែធ្វើកាផាកពិន័យតែប៉ុណ្ណោះ ។
លោកបញ្ជាក់ថា សាច់ និងគ្រឿងក្នុងជ្រូកទាំងនេះបានរាយការណ៍ជូនឯកឧត្តមព្រះរាជអាជ្ញាអមសាលាដំបូងខេត្ត ដើម្បីសុំគោលការណ៍ដុតកម្ទេចចោលរួចហើយៗ គ្រោង និងដុតកម្ទេចចោលនៅថ្ងៃស្អែក និងយកសំណាកវិភាគសាច់ទាំងនេះទៅធ្វើតេស្តរកមេរោគផងដែរ ។ ពេលសាកសួរថា តើសាច់សត្វទាំងនេះអាចនាំចូលតាមច្រករបៀង ឬយ៉ាងណា?
មន្ត្រីខាងលើលើកឡើងបែបសង្ស័យ និងយោងពីប្រភពនានាថា អាចនាំចូលពីថៃតាមច្រករបៀងក្នុងស្រុកកើតហេតុ ខណៈអ្នកស្រុកក៏សង្ស័យដូចមន្ត្រីខាងលើដែរ ។
ជុវិញប្រភពព័ត៌មានខាងលើ មេប៉ុស្តិអូរល្ហុងនៃនគរបាលការពារព្រំដែនគោកលេខ៨៩១លោកព្រុំ ភ មិនអាចទាក់ទងសុំការបំភ្លឺបានទេ ដោយទូរស័ព្ទចុចចូលច្រើនដងតែគ្មានអ្នកទទួល ៕
ចែករំលែកព័តមាននេះ