ខេត្តបន្ទាយមានជ័យ ៖ កិច្ចសហការជាមួយមណ្ឌលសុខភាពពិនិត្យព្យាបាលជំងឺទូទៅដោយឥតគិតថ្លៃដល់ប្រជាពលរដ្ឋក្រីក្ររបស់សមាគមរថយន្តពេទ្យចល័តកុមារខ្មែរអាមេរិកាំង សហគមន៍កូនខ្លែង និងសហគមន៍សម្ព័ន្ធថ្មពួកបានប្រារព្ធធ្វើឡើងនៅមណ្ឌលសុខភាពឃុំផ្គាំកាលពីថ្ងៃទី៥ ខែវិច្ឆិកា ឆ្នាំ២០១០។ លោកចាន់ សារ៉ន ប្រធានសហគមន៍សម្ព័ន្ធដើម្បីអភិវឌ្ឍន៍មូលដ្ឋានស្រុកថ្មពួក-ស្វាយចេក និងលោកជា សុគឿន ប្រធានសហគមន៍ភ្នំកូនខ្លែងឱ្យដឹងថា ជំនួយមនុស្សធម៌របស់សហគមន៍រថយន្តពេទ្យចល័តខ្មែរអាមេរិកាំងសំរាប់ព្យាបាលជំងឺទូទៅដោយឥតគិតថ្ងៃជូនដល់ប្រជាពលរដ្ឋក្រីក្រ២០០គ្រួសារក្នុងឃុំផ្គាំ គឺដើម្បីរួមចំណែកកាត់បន្ថយភាពក្រីក្ររបស់ប្រជាពលរដ្ឋកម្ពុជា។ ម៉្យាងវិញទៀតគឺស្របពេលដែលទឹកលិចលង់ភូមិករបំផ្លាញផលដំណាំ អាងស្តុកទឹក និងផ្លូវថ្នល់មួយចំនួន ជាហេតុធ្វើឱ្យប្រជាពលរដ្ឋជួបប្រទះជំងឺរាតត្បាតផ្សេងៗ។
លោកម៉ៅ ហ្វី សមាជិកក្រុមប្រឹក្សាស្រុកស្វាយចេកបានថ្លែងអំណរគុណចំពោះសមាគមរថយន្តពេទ្យចល័ត កុមារខ្មែរ-អាមេរិកាំងដែលបានពិនិត្យជំងឺទូទៅក្នុងសហគមន៍ដោយឥតគិតថ្លៃ។ ម៉្យាងវិញទៀត ប្រជាពលរដ្ឋក្រីក្រត្រូវតែទទួលបានការថែទាំសុខភាពដែលផ្តល់ដោយប្រព័ន្ធថែទាំសុខភាព សាធារណៈដោយឥតគិតថ្លៃ។ ការផ្តល់សេវាជូនប្រជាពលរដ្ឋត្រូវតែពង្រីក ដោយផ្តោតជាសំខាន់លើការផ្តល់សេវាសុខាភិបាលមូលដ្ឋាននៅតាមសហគមន៍ មណ្ឌលសុខភាព គួបផ្សំនឹងកម្មវិធីប្រយុទ្ធនឹងជំងឺឆ្លងអាទិភាពនានា។
លោកអ៊ីវ ទិន ប្រធានសមាគមពេទ្យចល័តកុមារខ្មែរ អាេមរិកាំង គូសបញ្ជាក់ថា លោកមានមោទនភាពខ្លាំងណាស់ដែលបានមកមូលដ្ឋានស្រុកស្វាយចេកជាលើកទី៤ក្នុងការសង្គ្រោះប្រជាពលរដ្ឋ ពិសេសលោកជាកូនខ្មែរមួយរូប ដូច្នេះត្រូវយល់ និងយកចិត្តទុកដាក់សុខុមាលភាពប្រជាពលរដ្ឋខ្មែរដូចគ្នា។ លោកបញ្ជាក់ថា ចំពោះការពិនិត្យព្យាបាលជូនដល់ប្រជាពលរដ្ឋដោយឥតគិតថ្លៃនេះ គឺពិនិត្យព្យាបាលជំងឺទូទៅ និងមានវ៉ែនតាពាក់ឱ្យភ្នែកភ្លឺច្រើនសន្ធឹកសន្ធាប់សំរាប់មនុស្សគ្រប់វ័យ បន្ទាប់ពីលោកវេជ្ជបណ្ឌិតពិនិត្យរួចហើយ។ លោកថ្លែងថា លោកនឹងបន្តយកចិត្តទុកដាក់ថែមទៀតចូលរួមកំចាត់ជំងឺឆ្លងគ្រប់ប្រភេទឆ្លើយតបទៅនឹងគ្រោះទឹកជំនន់ដែលបំផ្លិចបំផ្លាញលើគ្រប់ហេដ្ឋារចនាសម្ព័ន្ធ និងអាយុជីវិតប្រជាពលរដ្ឋ៕
ចែករំលែកព័តមាននេះ