- ភ្នំពេញ
ភ្នំពេញ៖ ឡានដឹកដី ដឹកខ្សាច់ ក្រួសថ្ម បម្រើឲ្យការដ្ឋានសំណង់នានា ពិសេសនៅជាយរាជធានីភ្នំពេញ និងនៅតាខ្មៅ ខេត្តកណ្តាល នាពេលនេះ នៅតែបង្កឲ្យមានបាតុភាពខូចផ្លូវ…
ភ្នំពេញ៖ ឡានដឹកដី ដឹកខ្សាច់ ក្រួសថ្ម បម្រើឲ្យការដ្ឋានសំណង់នានា ពិសេសនៅជាយរាជធានីភ្នំពេញ និងនៅតាខ្មៅ ខេត្តកណ្តាល នាពេលនេះ នៅតែបង្កឲ្យមានបាតុភាពខូចផ្លូវ…
ភ្នំពេញ៖ ឡានដឹកដី ដឹកខ្សាច់ ក្រួសថ្ម បម្រើឲ្យការដ្ឋានសំណង់នានា ពិសេសនៅជាយរាជធានីភ្នំពេញ និងនៅតាខ្មៅ ខេត្តកណ្តាល នាពេលនេះ នៅតែបង្កឲ្យមានបាតុភាពខូចផ្លូវ និងធ្លាយដី និងខ្សាច់រាយប៉ាយលើផ្លូវនៅឡើយ។ បញ្ហានេះ ទាមទារឲ្យម្ចាស់ឡាន ម្ចាស់ដេប៉ូ និងម្ចាស់ការដ្ឋានសំណង់ ត្រូវគិតគូរឡើងវិញ ខណៈដែលអាជ្ញាធរសមត្ថកិច្ច ក៏បានផ្សព្វផ្សាយ អប់រំ ណែនាំដល់អ្នកបើកបរ និងម្ចាស់ដេប៉ូខ្សាច់ ក្រួសថ្មទាំងនោះផងដែរ។
កាលពីថ្ងៃទី៨ ខែសីហា ឆ្នាំ២០២១ មន្ត្រីបច្ចេកទេសតាមស្ថានីយជញ្ជីងអចល័តនៃគណៈកម្មាធិការសម្របសម្រួលអចិន្ត្រៃយ៍នៃគណៈកម្មាធិការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ បានធ្វើការផ្សព្វផ្សាយ និងអប់រំណែនាំដល់ម្ចាស់យានយន្តដឹកជញ្ជូន ដែលឆ្លងកាត់ស្ថានីយ និងចុះពន្យល់ណែនាំដល់ម្ចាស់អាជីវកម្មកិនថ្ម ដេប៉ូខ្សាច់ និងរណ្តៅដី អំពីច្បាប់ ស្តីពី ផ្លូវថ្នល់ ក្នុងមាត្រា២៦ មាត្រា៦០ និងសេចក្ដីជូនដំណឹង លេខ០៤៩ សជណ សក. គតលទ ស្តីពី ការពង្រឹងវិធានការយ៉ាងតឹងរ៉ឹងបន្ថែម ចំពោះយានយន្តដឹកជញ្ជូនធុនធ្ងន់ ដែលបើកបរលើបណ្តាញផ្លូវថ្នល់ និងលិខិតបទដ្ឋានផ្សេងៗទៀត ដែលមានជាធរមាន។
សកម្មភាពនៃផ្សព្វផ្សាយនេះ មានគោលបំណងឱ្យម្ចាស់យានយន្ត ម្ចាស់អាជីវកម្មកិនថ្ម ខ្សាច់ និងដីនៅទូទាំងប្រទេស ចូលរួមគោរពតាមបទដ្ឋានបច្ចកទេស ស្ដីពី ការដឹកជញ្ជូន ដើម្បីបញ្ចៀសឲ្យបាននូវការដឹកលើសទម្ងន់ ដែលនាំឲ្យផ្លូវថ្នល់ឆាប់ខូច និងកាត់បន្ថយគ្រោះថ្នាក់ចរាចរណ៍ ជាពិសេសដើម្បីអប់រំ ជុំវិញច្បាប់ចរាចរណ៍ផ្លូវគោក ការផាកពិន័យ និងការឃាត់ទុកយានយន្តដឹកជញ្ជូន ដែលអនុលោមតាមច្បាប់ផ្លូវថ្នល់ មាត្រា៦០។
មាត្រា៦០ នៃច្បាប់ ស្តីពី ផ្លូវថ្នល់ បានកំណត់ថា «រាល់យានយន្ត ដែលដឹកលើសទម្ងន់ ចាប់ពី ២០% នៃទម្ងន់អនុញ្ញាត ត្រូវពិន័យអន្តរការណ៍ជាប្រាក់ រើទំនិញចេញ និងឃាត់យានជំនិះទុកចំនួន ១ឆ្នាំ»។ ដូចនេះ សូមម្ចាស់យានយន្តទាំងអស់ ត្រូវដឹងអំពីទម្ងន់ផ្ទុកអនុញ្ញាតនៃប្រភេទយានយន្តរបស់ខ្លួន ជៀសវាងផ្ទុកលើសទម្ងន់កម្រិតកំណត់ដែលនាំឱ្យខាតបង់ថវិកា និងពេលវេលារកស៊ីរបស់ខ្លួន។
មន្ត្រីជំនាញ ក៏បានអំពាវនាវ ចំពោះក្រុមហ៊ុន និងអ្នកប្រកបអាជីវកម្មផ្នែកដឹកជញ្ជូន តាមរថយន្តធុនធ្ងន់ទាំងអស់ ត្រូវចូលរួមគោរពតាមនូវអនុសាសន៍របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលលើកឡើងថា «ការប្រកបមុខរបរទទួលទាន ក៏ដូចជា ការបំពេញការងារ តាមវិជ្ជាជីវៈរបស់បងប្អូនប្រជាពលរដ្ឋ ប្រកបដោយការយកចិត្តទុកដាក់ និងការទទួលខុសត្រូវ គឺថាការតបស្នងដ៏សំខាន់ ដល់សង្គមជាតិ ដែលកំពុងមានសន្តិភាព និងការរីកចម្រើន អរគុណសន្តិភាព» និងចូលរួមជាមួយក្រសួងសាធារណការ និងដឹកជញ្ជូន និងរាជរដ្ឋាភិបាល ដើម្បីគោរព និងអនុវត្តតាមបទប្បញ្ញត្តិច្បាប់ និងរួមចំណែកការពារហេដ្ឋារចនាសម្ព័ន្ធផ្លូវថ្នល់ ជាប់គង់វង្សតាមអាយុកាលកំណត់។
វិធានការអប់រំផ្សព្វផ្សាយនេះ បានធ្វើឡើង បន្ទាប់កាលពីថ្ងៃទី២០ ខែកក្កដា ឆ្នាំ២០២១ ក្រុមអ្នកបើកឡានដឹកដី ដឹកខ្សាច់ និងដឹកថ្ម ប្រមាណ ៣០០នាក់ បានប្រមូលផ្តុំតវ៉ាពីការដាក់ជញ្ជីងចល័ត នៅក្បែរស្ពានព្រែកហូរ ក្រុងតាខ្មៅ ខេត្តកណ្តាល។ ក្រុមអ្នកបើកឡានធំទាំងនោះ បានលើកបដា និងរូបថតសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ដោយស្នើឲ្យក្រសួងសាធារណការ និងដឹកជញ្ជូន បន្ធូរបន្ថយការចាប់ឃាត់យានយន្តរបស់ពួកគេ ដែលដឹកលើសទម្ងន់ពីច្បាប់កំណត់។
ចំពោះការតវ៉ា ដែលបានធ្វើឡើង នៅត្រង់ចំណុចជញ្ជីងចល័ត ក្បែរស្ពានព្រែកហូរ ផ្លូវ ៦០ម៉ែត្រ ក្នុងទីក្រុងតាខ្មៅ ខេត្តកណ្តាល គឺក្រសួងសាធារណការ និងដឹកជញ្ជូន បានច្រានចោលនូវសំណូមពរទាំងនោះ ហើយតម្រូវឲ្យក្រុមអ្នកតវ៉ា ដែលជាអ្នកបើកបរឡានដឹកដី ដឹកខ្សាច់ ក្រួសថ្ម ក៏ដូចជាក្រុមហ៊ុនដឹកជញ្ជូនទាំងអស់ ត្រូវតែចូលរួមគោរពច្បាប់ ពោលគឺកុំដឹកជញ្ជូនលើសទម្ងន់កំណត់។
ដូច្នេះក្នុងពេលចុះផ្សព្វផ្សាយអប់រំ នាពេលនេះ ក្រៅតែពីឲ្យរថយន្តដឹកជញ្ជូនទាំងអស់ ត្រូវគោរពតាមច្បាប់ កុំដឹកលើសចំណុះហើយនោះ មន្ត្រីជំនាញយើង ក៏គួរតែអប់រំ ណែនាំដល់អ្នកបើកឡានដឹកជញ្ជូនទាំងអស់ ទាំងឡានដឹកដី ដឹកថ្ម ក្រួស ដឹកខ្សាច់ រួមទាំងឡានកុងតឺន័រផង ត្រូវបើកបរ ដឹកជញ្ជូនដោយគោរពច្បាប់ អ្នកបើកបរត្រូវចេះបើកបរ ឆ្លងកាត់សាលារៀនត្រឹមត្រូវ និងប្រឡងជាប់ បានប័ណ្ណបើកបរត្រឹមត្រូវផងដែរ។
សម្រាប់ឡានដឹកដី ដឹកខ្សាច់ ក្រួសថ្ម ក៏ត្រូវតែដឹកតាមចំណុះ កុំដាក់រហូតដល់ពេញហៀរហូរ ជ្រុះតាមផ្លូវ។ នៅទ្រុងឡានទាំងនោះ ក៏ត្រូវបិទបាំងតង់កៅស៊ូត្រឹមត្រូវ ការពារកុំឲ្យដី ខ្សាច់ ក្រួស ថ្ម ធ្លាក់នៅពេលដឹកជញ្ជូនតាមផ្លូវ។ ម្យ៉ាងទៀត មុនពេលចេញពីដេប៉ូលក់ខ្សាច់ ក្រួស ថ្ម ឬក៏មុនពេលចេញពីរណ្តៅដី ក៏ត្រូវតែបាញ់ទឹក លាងកង់ឡានឲ្យស្អាត។ នៅពេលទម្លាក់ខ្សាច់ ដី ក្រួស ថ្ម នៅការដ្ឋានហើយ មុននឹងចេញពីការដ្ឋាន ក៏ត្រូវបាញ់លាងសម្អាតឡាននោះម្តងទៀត។
មានរួចមកហើយ ករណីបងប្អូនឡានដឹកដី ដឹកខ្សាច់ ក្រួស និងដឹកថ្ម បម្រើឲ្យការដ្ឋានសាងសង់នានា ពិសេសនៅជាយរាជធានីភ្នំពេញ នៅព្រែកព្នៅ ផ្លូវទំនប់កប់ស្រូវ ឬមហាវិថីឈ្នះឈ្នះ ក៏ដូចជានៅផ្លូវស្ពានព្រែកហូរ ដល់ក្រុងតាខ្មៅ ខេត្តកណ្តាល គឺដោយសារតែឡានដឹកដី ដឹកខ្សាច់ បានធ្វើឲ្យផ្លូវជាតិអ៊ុតកៅស៊ូ និងផ្លូវបេតុង ពេលនេះ ក្លាយជាដីហុយឡើងទ្រលោម ស្ទើរតែមើលផ្លូវលែងឃើញ។ មួយថ្ងៃៗ មិនដឹងឡានដឹកដី ដឹកខ្សាច់ ដឹកក្រួសថ្មប៉ុន្មានរយពាន់គ្រឿង បើកលើផ្លូវនោះ ហើយធ្លាក់ដី ធ្លាក់ខ្សាច់ ធ្លាក់ថ្ម ចេញពីឡាន បង្កជាដីហុយលើផ្លូវទាំងនោះ។ ដល់ពេលមានភ្លៀង ផ្លូវទាំងនោះ ក្លាយជាបែកភក់ ដែលអាចបង្កគ្រោះថ្នាក់ដល់អ្នកដំណើរផ្សេងទៀត ពិសេសអ្នកធ្វើដំណើរតាមម៉ូតូ និងកង់។
ការបង្កឲ្យផ្លូវជាតិ ផ្លូវបេតុង ក្លាយជាផ្លូវដីហុយនេះ គឺជាការខ្វះការទទួលត្រូវរបស់ម្ចាស់ឡានដឹកដីទាំងនោះផង និងមួយផ្នែកទៀត មកពីអាជ្ញាធរសមត្ថកិច្ចយើង ធូររលុងផង។ មិនអាចឡានដឹកដី ដឹកខ្សាច់ ដឹកថ្មឯណា បើកបរលើផ្លូវទាំងថ្ងៃ ទាំងព្រឹក និងទាំងយប់ បានឡើយ បើសិនជាគ្មានការអនុញ្ញាត គ្មានការបង់លុយ រហូតដល់ដាក់ខែដល់អាជ្ញាធរសមត្ថកិច្ចតាមគោលដៅទាំងនោះទេ។
ដូច្នេះក្នុងពេលផ្សព្វផ្សាយអប់រំនេះ ក្រៅតែពីឲ្យឡានដឹកដី ដឹកខ្សាច់ ដឹកក្រួសថ្ម និងឡានដឹកទំនិញ គោរពច្បាប់ កុំដឹកលើសទម្ងន់ហើយនោះ ក៏ត្រូវតែឲ្យឡានដឹកជញ្ជូនទាំងអស់ គិតគូរពីសុវត្ថិភាព ត្រូវបើកបរគោរពច្បាប់ចរាចរណ៍ ដោយកុំបើកបរលឿនៗពេក ហើយក៏ត្រូវកុំឲ្យដី ខ្សាច់ ក្រួសថ្ម ជ្រុះលើផ្លូវតទៅទៀត។ ការបោស លាងសម្អាតផ្លូវ ដែលមានដីហ៊ុយ ខ្សាច់ជ្រុះជាគំនរនោះ ក៏ត្រូវតែធ្វើ បើមិនបានរាល់ថ្ងៃ ក៏សូមឲ្យបានមួយអាទិត្យម្តងដែរ។
ករណីនេះ អាជ្ញាធរសមត្ថកិច្ចនេះឯង ដែលដើរតួនាទីសំខាន់ជាងគេ។ គ្រប់ផ្លូវ ដែលឡានដឹកដី ដឹកខ្សាច់ ក្រួសថ្មទាំងនោះ បើកឆ្លងកាត់ ត្រូវតែឲ្យក្រុមឡានដឹកជញ្ជូន និងម្ចាស់ការដ្ឋាន ជាអ្នកសម្អាត ហើយអាជ្ញាធរសមត្ថកិច្ច ជាអ្នកត្រួតពិនិត្យជាប្រចាំ។ បើមិនគោរពទេ ត្រូវផ្អាកការដ្ឋាន ឈប់ឲ្យឡានទាំងអស់នោះ ដឹកជញ្ជូនក្រួសថ្មខ្សាច់តទៅទៀត។ ករណីនេះ មន្ត្រីណាស៊ីសំណូក ត្រូវរ៉ូវ ចាប់ដៃយកលុយពីឡានដឹកជញ្ជូនទាំងនោះ ក៏ត្រូវដកពីតំណែង និងចាប់បញ្ជូនទៅកាត់ទោស នៅតុលាការ ដោយគ្មានការលើកលែង។
យើងធ្វើដូច្នេះ ដើម្បីថែរក្សាផ្លូវ កាត់បន្ថយគ្រោះថ្នាក់ចរាចរណ៍ផង និងដើម្បីសុវត្ថិភាពអ្នកដំណើរដទៃទៀតផង។ សូមអ្នកបើកបរឡានដឹកជញ្ជូនទាំងឡាយ គិតពីផលប្រយោជន៍សង្គមជាតិ និងអ្នកដទៃ ឲ្យបានច្រើនជាងគិតតែពីផលប្រយោជន៍ផ្ទាល់ខ្លួន៕
ចែករំលែកព័តមាននេះ