ខេត្តកណ្តាល ៖ មនុស្សក្មេង-ចាស់នៅក្នុងភូមិមួយ បានឈរពួនដោយការភ័យខ្លាច និងតាមសម្លឹងទៅលើបុរសអ្នកភូមិម្នាក់ដែលគេគិតថា ជាខ្មោចស្រស់ៗស្លាប់ក្នុងឧបទ្ទវហេតុកោលាហលរត់ជាន់គ្នាលើស្ពានពេជ្រ នៃទីក្រុងកោះពេជ្រ មកតាមលងអ្នកភូមិដល់ផ្ទះ ហើយភ្លាមៗនោះមនុស្សជាច្រើនដែលដើរតាមផ្លូវ និងអ្នកខ្លះនៅក្រៅផ្ទះក៏ចាប់ផ្តើមរត់ប្រសាចចូលទៅពួនសំងំក្នុងផ្ទះ និងចាំឃ្លាំមើលបុរសអ្នកភូមិម្នាក់នោះដែលគេដឹងថា គាត់ស្លាប់ និងធ្វើបុណ្យរួចរាល់ទៅហើយ ហេតុម៉េចឃើញរូបកាយពិតស្រស់ៗទាំងថ្ងៃបែបនេះ ។
បុរសអ្នកភូមិដែលគេគិតថាជាខ្មោចនេះឈ្មោះស៊ុំ សុខា អាយុ២៥ឆ្នាំ រស់នៅភូមិវាល ឃុំស្អាងភ្នំ ស្រុកស្អាង ប៉ុន្តែបានមកធ្វើការស៊ីឈ្នួលជាជាងភ្លើងនៅម្តុំផ្សារដេរប៉ូ រាជធានីភ្នំពេញ ជាយូរឆ្នាំមកហើយ ពោលគឺគេមកធ្វើការនៅភ្នំពេញ២-៣ខែ ទៅលេងផ្ទះម្តង ធ្វើឱ្យអ្នកភូមិស្គាល់ច្បាស់ និងចងចាំមុខរបស់គេមិនភ្លេចទេ។ គួររំលឹកឡើងវិញថា កាលពីរាត្រីថ្ងៃទី២២ វិច្ឆិកា ២០១០ ឧបទ្ទវហេតុមនុស្សរត់ជាន់គ្នាលើស្ពានពេជ្រ បណ្តាលឱ្យស្លាប់៣៥៣នាក់ និងរងរបួស៣៩៣នាក់ ហើយព្រឹកឡើងស្ត្រីមេម៉ាយឈ្មោះភឿន តៅ បាននាំសាច់ញាតិទៅស្វែងរកសពកូនប្រុសនៅតាមមន្ទីរពេទ្យនានា ពីព្រោះគ្មានទូរស័ព្ទទាក់ទងទេ… ម្យ៉ាងរស់នៅបែកគ្នាទៀតមិនដឹងថា ស្លាប់ ឬរស់? ឬយ៉ាងណានោះឡើយ?
ស្ត្រីឈ្មោះភឿន តៅ ដែលរស់នៅភូមិវាល ឃុំស្អាងភ្នំ បានឱ្យដឹងថា ស្រាប់តែនៅមន្ទីរពេទ្យមិត្តភាពខ្មែរ-សូវៀត ពួកគាត់ប្រទះឃើញសពបុរសម្នាក់មានភិនភាគដូចកូនប្រុសគាត់បេះបិទ ហើយគ្មានសាច់ញាតិណាមកសួរនាំទៀតនោះ ពួកគាត់ក៏សំរេចថា សពបុរសនេះជាសពកូនប្រុសរបស់គាត់ឈ្មោះស៊ុំ សុខា តែម្តងទៅ រួចហើយសុំការអនុញ្ញាតពីមន្ទីរពេទ្យយកសពកូនទៅធ្វើបុណ្យតាមប្រពៃណីភ្លាមៗ ដោយមិនបានគិតពីប្រាក់ជំនួយរបស់សប្បុរសជន ឬរដ្ឋាភិបាលនោះទេ។
ធ្វើបុណ្យសពនៅថ្ងៃទី២៣ វិច្ឆិកា ២០១០ និងបុណ្យ៧ថ្ងៃរួចរាល់អស់ហើយ មកដល់ថ្ងៃទី២២ ធ្នូ ២០១០ គឺរយៈពេល១ខែគត់ ស្រាប់តែឈ្មោះស៊ុំ សុខា ជិះម៉ូតូឌុបចូលភូមិគ្រលើម បង្កឱ្យអ្នកភូមិប្រុស-ស្រីកើតការភ័យខ្លាចយ៉ាងខ្លាំងរត់ប្រសាចទៅរកកន្លែងលាក់ខ្លួន… អ្នកខ្លះរត់ចូលផ្ទះទៅទាញទ្វារបិទ អ្នកខ្លះរត់ពួនបាំងដើមឈើ ស្ទើរតែមិនហ៊ានដកដង្ហើម សំងំចាំឃ្លាំមើលថាតើស៊ុំ សុខា ម្នាក់នេះជាខ្មោច ឬជាមនុស្សមែនទែន? ទីបំផុតជាមនុស្សមែនទែន ស៊ុំ សុខា មិនស្លាប់ទេ៕
ចែករំលែកព័តមាននេះ