ផ្ទុះការសរសើរ! សម្រស់ពហុកីឡដ្ឋានថ្មី ក្រោយរួចរាល់
- ភ្នំពេញ
រាជធានីភ្នំពេញ ៖ បើទោះជាមានផ្នែកខ្លះត្រូវថែមថយ ប៉ុន្តែគេនៅតែមើលឃើញថា ពហុកីឡដ្ឋានជាតិមរតកតេជោ ដែលជាពហុ
រាជធានីភ្នំពេញ ៖ បើទោះជាមានផ្នែកខ្លះត្រូវថែមថយ ប៉ុន្តែគេនៅតែមើលឃើញថា ពហុកីឡដ្ឋានជាតិមរតកតេជោ ដែលជាពហុ
រាជធានីភ្នំពេញ ៖ បើទោះជាមានផ្នែកខ្លះត្រូវថែមថយ ប៉ុន្តែគេនៅតែមើលឃើញថា ពហុកីឡដ្ឋានជាតិមរតកតេជោ ដែលជាពហុកីឡដ្ឋានថ្មី មិនត្រឹមតែមានរូបរាងស្រស់ស្អាត និងអាចផ្ទុកមនុស្សបានច្រើនប៉ុណ្ណោះទេ សូម្បីតែសម្រស់នាពេលរាត្រីរបស់ទីតាំងមួយនេះ ក៏ទាក់ទាញ និងស្រស់ស្អាតផងដែរ។ អ្នកគាំទ្រច្រើនណាស់ស្ទើរមិនជឿភ្នែកផងថា នេះជាពហុកីឡដ្ឋានថ្មីរបស់កម្ពុជា ខណៈដែលទិដ្ឋភាពនាពេលរាត្រី គឺស្អាតជាងពេលថ្ងៃ ដូចមេឃ និងដី។ ភាពស្រស់ស្អាតនេះ បានទាក់ទាញអោយមនុស្សទៅមើលសម្រស់ពហុកីឡដ្ឋាននេះ រហូតដល់យប់ជ្រៅផងដែរ។
ផ្ទុះការកោតសរសើរមិនតិចនោះទេ បន្ទាប់ពីគណៈកម្មការជាតិអូឡាំពិកកម្ពុជា បានបង្ហោះរូបភាពជាច្រើនសន្លឹកនាពេលរាត្រីរបស់ពហុកីឡដ្ឋានថ្មីមរតកតេជោ ស្របពេលដែលពហុកីឡដ្ឋាននេះ ក៏តែងតែបើកភ្លើងបង្អួតអ្នកដំណើររៀងរាល់ថ្ងៃចុងសប្ដាហ៍ និងថ្ងៃបុណ្យទាន ដែលធ្វើអោយមានការផ្ដិតរូបភាពពីខាងក្រៅនាពេលរាត្រីជាហូរហែរ យកទៅបង្ហោះបន្ត។
អ្នកខ្លះបានលាន់លាត់ថា មិនចង់ជឿនឹងភ្នែក នៅពេលបានឃើញពីរូបរាង និងភ្លើងពណ៍ នាពេលរាត្រីរបស់ទីតាំងពហុកីឡដ្ឋានថ្មីនេះ។ អ្នកខ្លះស្មានថា ទិដ្ឋភាពនៃការបង្ហោះនេះគឺជាពហុកីឡដ្ឋាននៅក្រៅប្រទេស មិនមែនជារបស់កម្ពុជានោះផង។ រូបភាពដែលបានបង្ហាញនេះ គឺមុខមាត់ដ៏ធំមួយរបស់កម្ពុជា ហើយក្រោយពីមានការកោតសរសើរពីសម្រស់នាពេលរាត្រីរបស់ពហុកីឡដ្ឋានថ្មីនេះ គឺគេមើលឃើញថា ពហុកីឡដ្ឋានថ្មី ពិតជានឹងធ្វើអោយអន្តរជាតិចាប់អារម្មណ៍មិនអន់ឡើយ សម្រាប់ការរៀបចំព្រឹត្តិការណ៍ស៊ីហ្គេមឆ្នាំ២០២៣។ នេះនៅមិនទាន់រួចរាល់ទាំងស្រុងនោះផង ព្រោះយោងតាមការប្រកាសរបស់លោក វ៉ាត់ ចំរើន គឺការបំពាក់ភ្លើងលម្អ នឹងនៅថែមថយចំនុចមួយចំនួនបន្ថែមទៀត ដើម្បីអោយពហុកីឡដ្ឋានថ្មី កាន់តែទំនើប ស្រស់ស្អាត និងទាក់ទាញ ។
សូមបញ្ជាក់ថា ពហុកីឡដ្ឋានជាតិមរតកតេជោនេះ មានទីតាំស្ថិតក្នុងសង្កាត់ព្រែកតាសេក ខណ្ឌប្ញស្សីកែវ រាជធានីភ្នំពេញ។ កាលពីព្រឹកថ្ងៃទី ៩ ខែ មករា ឆ្នាំ ២០១៩ ក្រុមហ៊ុនទទួលបន្ទុកផ្នែកសាងសង់បានធ្វើពិធីសម្ពោធការដំឡើងកៅអីអង្គុយក្នុងគម្រោងជំនួយឥតសំណងនៃពហុកីឡដ្ឋានខាងលើ ក្រោមអធិបតីចូលរួមដោយលោក ថោង ខុន ប្រធានគណៈកម្មាធិការជាតិអូឡាំពិកកម្ពុជា និងជារដ្ឋមន្ត្រីក្រសួងទេសចរណ៍។ កៅអីអង្គុយបេតុងទម្ងន់ធ្ងន់ជាងគេរហូតដល់ទៅ ៩.៧៤ តោន ត្រូវបានផលិតឡើងយ៉ាងផ្ចិតផ្ចង់និងបំពាក់ជាមួយប្រពន្ធ័ QR Code ដើម្បីត្រួតពិនិត្យលក្ខណៈបច្ចេកទេសនៃកៅអី ពោលគឺដើម្បីត្រួតពិនិត្យគុណភាពបេតុងកៅអីនេះដូចជាភាពស្មើក្នុងការលើកដាក់ជាដើម។
ក្នុងនោះដែរ កៅអីបេតុងចំនួន ៤.៦២៤ ដុំ កាំជណ្តើរចំនួន ២៣៩២កាំ បង្កាន់ដៃចំនួន ១៩២ សរុបចំនួន ៧.២០៨ដុំ ក៏ត្រូវបានដំឡើងនៅបរិវេណកន្លែងទស្សនាក្នុងកីឡដ្ឋាននេះយ៉ាងយកចិត្តទុកដាក់ផងដែរ។ ពហុកីឡាដ្ឋានជាតិមរតកតេជោដ៏ធំស្កឹមស្កៃមួយនេះដែលមានតម្លៃប្រមាណជា ១៦០លានដុល្លារអាមេរិក ដែលមានទំហំផ្ទៃដីរហូតដល់ទៅ១៦.២២ ហិកតា និងផ្ទៃក្រឡាសំណង់មានទំហំប្រមាណជា ៨.២៤ម៉ឺនម៉ែត្រការ៉េ។ ទីតាំងអង្គុយទស្សនាបាល់ទាត់នេះ អាចផ្ទុកអ្នកទស្សនាបានរហូតដល់ទៅ ៦ម៉ឺននាក់ ៕
ចែករំលែកព័តមាននេះ