ខេត្តព្រៃវែង ៖ ក្រុមការងារគណបក្សប្រជាជនកម្ពុជាចុះពង្រឹងមូលដ្ឋានឃុំព្រែកចង្ក្រាន ស្រុកស៊ីធរកណ្តាល ខេត្តព្រៃវែង កាលពីថ្ងៃទី០៤ ខែមករា ឆ្នាំ២០១៦…
ខេត្តព្រៃវែង ៖ ក្រុមការងារគណបក្សប្រជាជនកម្ពុជាចុះពង្រឹងមូលដ្ឋានឃុំព្រែកចង្ក្រាន ស្រុកស៊ីធរកណ្តាល ខេត្តព្រៃវែង កាលពីថ្ងៃទី០៤ ខែមករា ឆ្នាំ២០១៦ បានចុះជួបសំណេះសំណាលជាមួយប្រជាពលរដ្ឋ និងជួយសង់ផ្ទះជូនជនចាស់ជរាដែលរងគ្រោះដោយអគ្គិភ័យ ព្រមទាំងជួយឧបត្ថមដល់ស្ត្រីផ្ទុកមេរោគអេដស៍ និងស្ត្រីទើបឆ្លងទន្លេរួចផងដែរ ។
ពិធីចុះសួរសុខទុក្ខប្រជាពលរដ្ឋនៅឃុំព្រែកចង្ក្រាននេះដឹកនាំដោយលោក នឹម ច័ន្ទតាណា កូនប្រុស លោកជំទាវ ហ៊ុន ស៊ីណាត អនុប្រធានក្រុមការងារចុះពង្រឹងឃុំព្រែកចង្ក្រាន ស្រុកស៊ីធរកណ្តាល តំណាងដ៏ខ្ពង់ខ្ពស់ឲ្យលោកនាយឧត្តមសេនីយ៍ កង សាខន អគ្គស្នងការរងនគរបាលជាតិ និងលោក ប៉ុល រតនា ប្រធានក្រុមការងារចុះពង្រឹងឃុំព្រែកចង្ក្រាន ហើយក៏មានការចូលរួមពីសំណាក់លោក ម៉ន នីបណ្ឌិត អភិបាលនៃគណៈអភិបាលស្រុកស៊ីធរកណ្តាល លោក ឡុង ប៊ុនធឿន អធិការនគរបាលស្រុកផងដែរ ។
លោក នឹម ច័ន្ទតាណា និងក្រុមការងារបានជួបសំណេះសំណាលជាមួយសមាជិក សមាជិការ គណបក្សប្រជាជនកម្ពុជា និងប្រជាពលរដ្ឋ ព្រមទាំងព្រះសង្ឃគង់នៅឃុំព្រែកចង្ក្រានទាំងមូល ដែលនោះជាទង្វើដ៏ប្រពៃសម្រាប់គណបក្សប្រជាជនកម្ពុជាដែលមានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ជាប្រមុខ តែងតែដឹងនូវសុខទុក្ខប្រជាពលរដ្ឋ ។
ក្នុងពិធីសំណេះសំណាលនោះ លោក នឹម ច័ន្ទតាណា បានមើលឃើញគ្រួសារក្រីក្រដោយភ្លើងឆេះផ្ទះកាលពីកន្លងទៅ និងស្ត្រីផ្ទុកដោយមេរោគអេដស៍ លោកក៏បានប្រើប្រាស់ថវិការមូលនិធិសង្គ្រោះរបស់សម្តេចក្រឡាហោម ស ខេង ជួយសង់ផ្ទះ៤ម៉ែត្រគុណ៥ម៉ែត្រ ធ្វើអំពីឈើ ប្រក់ស័ង្កសី ជួនលោកតានឹម គួក ១ខ្នង និងឧត្ថមប្រាក់ចំនួន៤០ម៉ឺនរៀល ខោអាវ៥កំប្លេរ ស្បែកជើង១គូ មុង៤ ភួយ៤ ខ្នើយ៥ កន្ទេល៨ ឆ្នាំងដាំបាយ៣ ចង្ក្រានហ្គាស២ អង្ករ៧៥គីឡូក្រាម មី៦កេស ត្រីខ២យួរ ប្រេងឆា៥លីត្រ ស្ករស៥គីឡូក្រាម ទឹកត្រី១យួរ ទឹកស៊ីអ៊ីវ១យួរ បំពង់ទឹកក្តៅ៣ ចានបាយ១៨ ស្លាបព្រា១ឡូ វែក៤ ប៉ាន់តែ១ ពែង៤ ធុងដាក់ទឹក១ ចំណុះ៦០លីត្រ ធុងទឹកកក១ សូទឹក១ និងថវិកាសម្រាប់សាងសង់ផ្ទះចំនួន៥០០ដុល្លារអាមេរិកទៀត ។ ចំណែកស្ត្រីផ្ទុកមេរោគអេដស៍ឈ្មោះ គង់ សុផល អាយុ៣៧ឆ្នាំ ទទួលបានថវិកាចំនួន២០ម៉ឺនរៀង និងសម្ភារប្រើប្រាស់មួយចំនួន ព្រមទាំងស្ត្រីទើបឆ្លងទន្លេម្នាក់ឧបត្ថម្ភទឹកប្រាក់ចំនួន២០ម៉ឺនរៀលផងដែរ ៕
ចែករំលែកព័តមាននេះ