ភ្នំពេញ៖ មានការផ្សព្វផ្សាយនូវលិខិតឧទ្ទេសនាម ក្លែងក្លាយមួយ កំណត់តែងតាំងសមាសភាពជន ៣នាក់ ដើម្បីចុះបំពេញបេសកកម្មកសាងសមាជិកគណបក្សប្រជាជនកម្ពុជា ក្នុងករណីពិសេស នៅតាមស្រុកក្នុងខេត្តទាំង ៥ រួមមាន៖…
ភ្នំពេញ៖ មានការផ្សព្វផ្សាយនូវលិខិតឧទ្ទេសនាម ក្លែងក្លាយមួយ កំណត់តែងតាំងសមាសភាពជន ៣នាក់ ដើម្បីចុះបំពេញបេសកកម្មកសាងសមាជិកគណបក្សប្រជាជនកម្ពុជា ក្នុងករណីពិសេស នៅតាមស្រុកក្នុងខេត្តទាំង ៥ រួមមាន៖ ខេត្តកំពង់ស្ពឺ ខេត្តកំពង់ឆ្នាំង ខេត្តបាត់ដំបង ខេត្តប៉ៃលិន និងខេត្តបន្ទាយមានជ័យ។ លិខិតឧទ្ទេសនាមនេះ អះអាងថា មានលោក សាន ភឿង ជាប្រធានក្រុមការងារ ចុះកសាងសមាជិកគណបក្សប្រជាជនកម្ពុជា ក្នុងករណីពិសេស ជូនសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជា។
យ៉ាងណាក៏ដោយ នៅថ្ងៃទី៥ ខែសីហា ឆ្នាំ២០២១ គណបក្សប្រជាជនកម្ពុជា តាមរយៈលោក ម៉ម សារិន ប្រធានខុទ្ទកាល័យ នៃគណៈកម្មាធិការកណ្តាល បានចេញលិខិត ជម្រាបជូនប្រធានគណបក្សប្រជាជនកម្ពុជា រាជធានីខេត្ត ក្រសួង ស្ថាប័ន ឲ្យជ្រាបថា ថ្មីៗនេះ មានជនក្លែងបន្លំមួយក្រុម បានចេញលិខិតឧទ្ទេសនាម ដោយប្រើរូបសញ្ញាគណបក្សប្រជាជនកម្ពុជា និងយកឈ្មោះជា «កម្លាំងសហប្រតិបត្តិការកសាងសមាជិកគណបក្ស ជូនសម្តេចតេជោ»។ ក្រុមនេះ បានទៅទាក់ទង តាមខេត្តមួយចំនួនរួចហើយ ដើម្បីសុំចុះបំពេញបេសកកម្មកសាងសមាជិកគណបក្សប្រជាជនកម្ពុជា ក្នុងករណីពិសេស។
ចំពោះករណីនេះ ខុទ្ទកាល័យនៃគណៈកម្មាធិការកណ្តាល គណបក្សប្រជាជនកម្ពុជា សូមច្រានចោលទាំងស្រុងនូវសកម្មភាពល្មើសខាងលើនេះ ព្រោះខុសពីគោលការណ៍របស់គណបក្សប្រជាជនកម្ពុជា ហើយក្រុមនេះ ពុំមានការចាត់តាំងចេញពីអង្គការចាត់តាំងណាមួយរបស់គណបក្សប្រជាជនកម្ពុជាឡើយ។
ខុទ្ទកាល័យគណបក្សប្រជាជនកម្ពុជា ក៏បានជម្រាបជូនគណៈកម្មាធិការគណបក្សប្រជាជនកម្ពុជា រាជធានី ខេត្ត ក្រសួង ស្ថាប័ន ធ្វើការតាមដាន ត្រួតពិនិត្យ និងស្នើសុំឲ្យអាជ្ញាធរមានសមត្ថកិច្ច ចាត់វិធានការតាមផ្លូវច្បាប់ជាធរមាន។
ករណីក្លែងបន្លំនេះ ត្រូវបានលោកស្រី បាន ស្រីមុំ អភិបាលខេត្តប៉ៃលិន បានប្រកាសតាមហ្វេសប៊ុកនូវលិខិតក្លែងបន្លំ និងលិខិតបដិសេធរបស់គណបក្សប្រជាជនកម្ពុជា ដោយសរសេរថា «មានជនកក្លែងបន្លំ ចេញលិខិតឧទ្ទេសនាម ជាក្រុមការងារសហប្រតិបត្តិការករណីពិសេស ជូនសម្តេចតេជោ។ ប៉ៃលិន ធ្លាប់ជួបហើយ តែទៅអត់រួច ចូលទ្រុង»។
យ៉ាងណាក៏ដោយ ក្រុមជនក្លែងបន្លំទាំងនោះ មិនត្រូវបានគេបង្ហាញថា ចាប់ខ្លួនបាន នាំទៅកាត់ទោស និងថតបង្ហោះសាធារណជន ដោយភ្ជាប់នឹងលិខិតក្លែងក្លាយ និងលិខិតបដិសេធរបស់គណបក្សប្រជាជនកម្ពុជា នៅឡើយទេ៕
ចែករំលែកព័តមាននេះ