ភ្នំពេញ៖ អាជ្ញាធររាជធានីភ្នំពេញ បានឃាត់យាន្តយន្ត សរុបចំនួន ១២០៥គ្រឿង ក្នុងរយៈពេល អនុវត្តបម្រាមគោចររយៈពេល ៥ថ្ងៃនៃការអនុវត្តបម្រាមគោចរ គិតចាប់ពីយប់ថ្ងៃទី៣០ ខែកក្កដា។…
ភ្នំពេញ៖ អាជ្ញាធររាជធានីភ្នំពេញ បានឃាត់យាន្តយន្ត សរុបចំនួន ១២០៥គ្រឿង ក្នុងរយៈពេល អនុវត្តបម្រាមគោចររយៈពេល ៥ថ្ងៃនៃការអនុវត្តបម្រាមគោចរ គិតចាប់ពីយប់ថ្ងៃទី៣០ ខែកក្កដា។ ក្នុងនោះ មានរថយន្តចំនួន ៣៤៥គ្រឿង និងបានធ្វើការផាកពិន័យហើយ ចំនួន ៣១១គ្រឿង ក្នុងនោះ មានរថយន្តចំនួន ៨៣គ្រឿង។ នេះតាមការបញ្ជាក់អោយដឹងពីលោកវរសេនីយ៍ឯក សាន សុខសីហា អ្នកនាំពាក្យនៃស្នងការដ្ឋាននគរបាលជាតិប្រាប់អោយដឹង នៅព្រឹកថ្ងៃទី៤ សីហា។
លោកវរសេនីយ៍ឯក សាន សុខសីហា បានបន្តអោយដឹងទៀតថា ចំពោះយាន្តយន្តផ្សេងទៀត ត្រូវបានយកមករក្សាទុកនៅតាមបណ្តាខណ្ឌចំនួន ២៨៨គ្រឿង ក្នុងនោះ មានរថយន្តចំនួន ៥៧គ្រឿង។
ជាមួយនោះដែរ អាជ្ញាធរ នឹងបន្តអនុវត្តន៍ អោយបានតឹងរឹងបន្ថែមទៀត តាមបទបញ្ជារបស់ឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ ក៏ដូចជា ឯកឧត្តម ឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ ដោយបង្កើតអោយមានក្រុមអន្តរាគមន៍ពិសេសជាច្រើនក្រុម ដើម្បីចល័តតាមគ្រប់ច្រកល្ហក ក៏ដូចជាតាមផ្លូវតូចៗ និងបណ្តាខណ្ឌតាមជាយក្រុង ដើម្បីត្រួតពិនិត្យមើលនៅមានហាង ដែលបើកលក់ដូរ និងអ្នកដែលបន្តល្មើសជួបជុំប្រមូលផ្តុំផឹកស៊ី ល្មើសនឹងបម្រាមគោចរ។
អ្នកនាំពាក្យស្នងការដ្ឋាននគរបាលជាតិ បានបញ្ជាក់ថា ជាលទ្ធផល អាជ្ញាធរបានធ្វើការឃាត់ខ្លួនអ្នកប្រព្រឹត្តល្មើស ចំនួន ២១នាក់ ដែលក្នុងនោះ នៅខណ្ឌជ្រោយចង្វារ ចំនួន ១៦នាក់ ដែលសុទ្ធតែជាក្មេងទំនើង មានសារធាតុស្រវឹង ក្នុងខ្លួន ខណ្ឌពោធិ៍សែនជ័យ ឃាត់បានអ្នកជួបជុំផឹកស៊ី ចំនួន ៣នាក់ ខណ្ឌទួលគោក ម្នាក់ និងខណ្ឌកំបូល ម្នាក់។
លោកវរសេនីយ៍ឯក សាន សុខសីហា បានបន្ថែមអោយដឹងថា ចំពោះលទ្ធផលនៃការអនុវត្តច្បាប់បម្រាមគោចរ សម្រាប់យប់ថ្ងៃទី០៤សីហា ប្រៀបទៅយប់ថ្ងៃទី០៣សីហានេះ មានការថយចុះ គួរអោយកត់សម្គាល់។ ក្នុងនាម អាជ្ញាធរ ក៏បានសំណូមពរអោយប្រជាពលរដ្ឋទាំងអស់ ចូលរួមទាំងអស់គ្នា ដើម្បីទប់ស្កាត់ការឆ្លងរីករាលដាលជំងឺកូវីដ១៩ ជាពិសេសគឺប្រភេទបម្លែងថ្មីឌែលតា (Delta)៕ ទុយ ប៊ុនរី
ចែករំលែកព័តមាននេះ