បូជាស.ពលោក ស្រី បណ្តូល ស្ថាបនិកអង្គការហ្វារពន្លឺសិល្បៈ មរណៈ ដោយសារកូវីដ-១៩
ខេត្តបាត់ដំបង ៖ សពលោក ស្រី បណ្តូល ជាស្ថាបនិកមួយរូប ក្នុងអង្គការហ្វារពន្លឺសិល្បៈ ត្រូវបានរៀបចំបូជា រួចរាល់ហើយ នៅព្រឹកថ្ងៃទី៥…
ខេត្តបាត់ដំបង ៖ សពលោក ស្រី បណ្តូល ជាស្ថាបនិកមួយរូប ក្នុងអង្គការហ្វារពន្លឺសិល្បៈ ត្រូវបានរៀបចំបូជា រួចរាល់ហើយ នៅព្រឹកថ្ងៃទី៥ ខែសីហា ឆ្នាំ២០២១ ។ សូមវិញ្ញាណក្ខន្ធរបស់លោកបានទៅកាន់សុគតិភព ។
លោកសាស្ត្រាចារ្យ ស្រី បណ្តូល បានទទួលមរណភាព កាលពីម៉ោង៨និង៣០នាទីយប់ថ្ងៃទី៤ ខែសីហា ឆ្នាំ២០២១នេះ ដោយសារជំងឺកូវីដ-១៩ នៅមន្ទីរពេទ្យខេត្តបាត់ដំបង ។ ពិតជាមានសេចក្ដីសោកស្ដាយយ៉ាងខ្លាំង ចំពោះការបាត់បង់លោកសាស្ត្រាចារ្យ និងសូមចូលរួមរំលែកទុក្ខដ៏ក្រៀមក្រំ ជាមួយគ្រួសាររបស់លោកសាស្ត្រាចារ្យផងដែរ ។
សូមបញ្ជាក់ថា លោក ស្រី បណ្តូល គឺជាគ្រូបង្រៀនគំនូរនិងជាសិល្បករគំនូរដ៏ល្បីឈ្មោះមួយរូប ពិសេសគំនូរសហសម័យ ។ លោក ស្រី បណ្តូល បានរស់នៅក្នុងជំរំជនភៀសខ្លួនសាយធូ ព្រំដែនខ្មែរ-ថៃ ដែលនៅទីនោះ កាលពីឆ្នាំ ១៩៨៦ រូបលោក និងមិត្តភក្តិ ជាច្រើននាក់ ដែលត្រូវបានអ្នកគ្រូជនជាតិបារាំងម្នាក់ឈ្មោះ Veronique Decrop បង្ហាត់បង្រៀនឲ្យចេះគូរគំនូរពីឆ្នាំ១៩៨៦ ដល់ឆ្នាំ១៩៩២ ។
បន្ទាប់ពីសង្គ្រាមស៊ីវិលអស់ជាច្រើនទសវត្ស អតីតនិស្សិតទាំងនោះបានត្រលប់មកប្រទេសកម្ពុជាវិញហើយបានសំរេចចិត្តបង្កើតសាលាសិល្បៈមួយ គឺអង្គការហ្វារពន្លឺសិល្បៈ ។ គោលបំណងរបស់ពួកគេគឺចាប់ផ្តើមកសាងឡើងវិញនូវវប្បធម៌ក្នុងស្រុកដែលត្រូវបានបំផ្លាញ និង ចាប់ផ្តើមពីមេរៀនគំនូរជាមូលដ្ឋាននៅអង្គការហ្វារពន្លឺសិល្បៈរហូតបានរីកចម្រើនបន្តិចម្តង ៗនិងបានចាប់ផ្តើមលើកកម្ពស់ការយល់ដឹងអំពីអត្តសញ្ញាណខ្មែរតាមរយៈសិល្បៈផ្សេង ។
ហ្វារ គឺជាអង្គការក្រៅរដ្ឋាភិបាល ដែលបានបង្កើតឡើងនៅឆ្នាំ១៩៩៤ ដោយសហស្ថានិក៩នាក់ ដែលបានរស់នៅក្នុងជំរំជនភៀសខ្លួនសាយធូ ។ សព្វថ្ងៃអង្គការនេះ នៅតែផ្តល់ឱកាសឲ្យកុមារក្រីក្រ និងកុមារមានវិបត្តិរាប់ពាន់នាក់ បានចូលរៀនសិល្បៈ និងចំណេះដឹងទូទៅ អនុវត្ដដូចជា ការគូររូប ជីវចលនា ការថតរូប ការរចនាក្រាហ្វិច និងខ្សែភាពយន្ត បន្ថែមពីលើសិល្បៈសម្តែងដូចជា តន្ត្រី ល្ខោន របាំ និងការលោតហក់(កីឡា)ជាដើម ៕
ចែករំលែកព័តមាននេះ