ក្រុមអាជីវករលក់គ្រឿងសមុទ្រនៅផ្សារក្ដាម ក្រុងកែប កាលពីព្រឹកថ្ងៃទី៥ ខែសីហា ឆ្នាំ២០២១ បានស្ម័គ្រចិត្តទៅធ្វើសំណាកខ្លួនឯងនៅជាប់នឹងកន្លែងលក់ក្ដាម និងលក់គ្រឿងសមុទ្រផ្សេងៗទៀត
ខេត្តកែប ៖ ក្រុមអាជីវករលក់គ្រឿងសមុទ្រនៅផ្សារក្ដាម ក្រុងកែប កាលពីព្រឹកថ្ងៃទី៥ ខែសីហា ឆ្នាំ២០២១ បានស្ម័គ្រចិត្តទៅធ្វើសំណាកខ្លួនឯងនៅជាប់នឹងកន្លែងលក់ក្ដាម និងលក់គ្រឿងសមុទ្រផ្សេងៗទៀត។
ហើយនៅក្រោមអាកាសធាតុកំពុងតែមានភ្លៀងរលឹមក្នុងព្រឹកថ្ងៃទី៥ ខែសីហានេះ ក៏មានការអញ្ជើញចូលរួមពីលោក សោម ពិសិដ្ឋ អភិបាលខេត្តកែប អមដំណើរលោកស្រី ទិត សុខា អភិបាលក្រុងកែប និងលោក ម៉ែន សុធី ប្រធានមន្ទីរសុខាភិបាលខេត្តកែបផងដែរ។
បើតាមលោកសោម ពិសិដ្ឋ អភិបាលខេត្តកែប បានមានប្រសាសន៍ថា នេះជាលើកដំបូងហើយដែលក្រុមអាជីវករលក់ដូរនៅផ្សារក្ដាម ក៏ដូចជាអ្នកលក់ក្ដាម មានឆន្ទៈដោយខ្លួនឯងចូលទៅអោយក្រុមគ្រូពេទ្យយកសំណាកធ្វើតេស្តរហ័យលើក្រុមអាជីវករលក់ដូរនៅផ្សារក្ដាមដែលមានមនុស្សចំនួន២០០នាក់ ហើយការធ្វើតេស្តនេះគឺមានរយៈពេល២ថ្ងៃ គឺចាប់ពីថ្ងៃទី៥ ខែសីហា រហូតដល់ថ្ងៃទី៦ ខែសីហា ឆ្នា២០២១ ។
លោក សោម ពិសិដ្ឋ បានមានប្រសាសន៍ថា ចាប់តាំងពីផ្ទុះជំងឺកូវីដ១៩មក ដោយឡែកនៅខេត្តកែប ដែលជាកន្លែងទេសចរណ៍ដ៏សំខាន់មួយនេះ បើគិតមកដល់ថ្ងៃទី៥ ខែសីហា នេះ គឺមានពលរដ្ឋឆ្លងជំងឺកូវីដ១៩ មានចំនួន៣២៨នាក់តែប៉ុណ្ណោះ និងអ្នកស្លា.ប់ដោយសារជំងឺកូវីដ គឺមានតែម្នាក់គត់។
លោក សោម ពិសិដ្ឋ មានប្រសាសន៍បន្តថា មកដល់ពេលនេះ ពលរដ្ឋឆ្លងជំងឺកូវីដ១៩ ដែលកំពុងសម្រាកព្យាបាលមានតិចតូចបំផុត។ លោកអភិបាលខេត្តកែប បន្តថា ទោះបីជំងឺកូវីដ១៩ មិនឆ្លងរីករាលដាលនៅក្នុងភូមិសាស្ត្រខេត្តកែបក៏ដោយ ក៏មន្ត្រីរាជការក្រុង-ស្រុកទាំងអស់ ត្រូវមានការប្រុងប្រយ័ត្នជានិច្ច និងអោយកងកម្លាំងទាំង៣ជួយអន្តរាគមន៍ដល់ប្រជាពលរដ្ឋ ដើម្បីកុំឱ្យពួកគាត់មានការប្រមូលម្ដុំគ្នា ដូចជា ក្លិបកំសាន្ត ឬប្រមូលម្ដុំផឹកស្រាទាំងអស់នេះ គឺសុទ្ធតែប្រឈមនឹងការឆ្លងជំងឺកូវីដ១៩។
លោក សោម ពិសិដ្ឋ មានប្រសាសន៍បន្តទៀតថា ប្រជាពលរដ្ឋគ្រប់រូប ត្រូវតែទៅចាក់វ៉ាក់សាំងបង្កាជំងឺកូវីដ១៩ អោយបានគ្រប់ៗគ្នា គឺដើម្បីការពារអាយុជីវិតរបស់ខ្លួនឯងតែប៉ុណ្ណោះ។ លោកក៏បានថ្លែងអំណរគុណដល់ក្រុមគ្រូពេទ្យខេត្តកែប ដែលបានជួយយកចិត្តទុកដាក់បំផុតជាមួយអ្នកជំងឺកូវីដ១៩ មិនថាយប់ មិនថាភ្លៀងរលឹម គឺបានចេញបំពេញភារកិច្ចរបស់ខ្លួនតាមគោលការណ៍របស់ប្រមុខរាជរដ្ឋាភិបាល ដែលមានសម្ដេចតេជោ ហ៊ុន សែន ដែលតែងតែគិតគួរជានិច្ចជាមួយប្រជាពលរដ្ឋ។
គួរបញ្ជាក់ថា នៅរសៀលថ្ងៃទី៥ ខែសីហានេះផងដែរ លោក ឡាយ ផេង ប្រធានប្រធានអាជីវករផ្សារក្ដាមក្រុងកែប ក៏បាននិយាយប្រាប់អោយដឹងដែរថា ក្រុមអាជីវកលក់ដូរក្នុងផ្សារក្ដាម បានស្ម័គ្រចិត្តចូលទៅធ្វើសំណាកនោះ គឺអវិជ្ជមានទាំងអស់។
អាជ្ញាធរខេត្តកែបក៏ បានជូនដំណឹងរួចហើយថា ការធ្វើតេស្តរហ័សរកមេរោគកូវីដ១៩ ជូនដល់អាជីវករលក់ដូរតាមផ្សារនានាទូទាំងខេត្តកែប គឺចាប់ពីថ្ងែទី៥ ខែសីហា ឆ្នាំ២០២១ រហូតដល់ថ្ងៃទី១៣ ខែសីហា ឆ្នាំ២០២១ ។ ក្នុងនោះមានអាជីរកផ្សារក្ដាម, ផ្សារសេះស, ផ្សារដំណាក់ចង្អើរ, ផ្សារចំការបីភ្នំវល្លិរ, ផ្សារពងទឹក, ផ្សាកែប, អ្នកលក់ដូរនៅជ្រោយដូង, អ្នកលក់ដូរតាមបណ្ដោយឆ្នេរសមុទ្រ និងអ្នកលក់ដូរនៅកន្លែងងូតទឹកស្រីសរ។
ចែករំលែកព័តមាននេះ