ខេត្តកែប ៖ ការប្រណាំងទូកប្រភេទផ្កាចារ និងបង្ហោះខ្លែងនៅមាត់សមុទ្រខេត្តកែបត្រូវបានរៀបចំឡើងរយៈពេល៣ថ្ងៃ គឺចាប់ពីថ្ងៃទី២៩ដល់ថ្ងៃទី៣១ ខែធ្នូ ឆ្នាំ២០១៥ ដោយមានការចូលរួមពីភ្ញៀវជាតិ និងអន្តរជាតិ ដែលមកលំហែកាយជិត២០ម៉ឺននាក់ ។
លោក កែន សត្ថា អភិបាលខេត្ត បានថ្លែងទៅកាន់ភ្ញៀវទេសចរដែលមកចូលរួមក្នុងពិធីប្រណាំងទូកផ្កាចារ នាព្រឹកថ្ងៃទី៣១ ខែធ្នូ ថា ការប្រណាំងទូកផ្កាចារពេញមួយព្រឹកនេះឃើញថា កីឡាករកីឡាការិនីចំណុះទូកនីមួយៗពិតជាបានយកចិត្តទុកដាក់បំផុត ដើម្បីបញ្ចេញឱ្យអស់ពីសមត្ថភាពរបស់ខ្លួនយកឈ្នះ យកចាញ់ទៅវិញទៅមក ក្នុងនាមជាអ្នកកីឡាដែលតែងតែងចង់ឈ្នះគូប្រកួត ។
លោកអភិបាលខេត្ត មានប្រសាសន៍បន្តថា ការប្រណាំងទូកផ្កាចារនៅឆ្នេរសមុទ្រកែបនេះគឺជាលើកទី៨ហើយ ។ មិនតែប៉ុណ្ណោះ ពិធីនេះក៏ជាការចូលរួមអបអរសាទរបុណ្យឆ្លងឆ្នាំសាកល២០១៥ចូលឆ្នាំ២០១៦ ផងដែរ ។
ចំពោះរង្វាន់ចែកជូនដល់កីឡាករកីឡាការិនីប្រណាំងទូកដែលទទួលបានជ័យលាភី សម្រាប់លេខ១ ឧបត្ថម្ភប្រាក់៥០ម៉ឺនរៀល លេខ២ចំនួន៤០ម៉ឺនរៀល និងលេខ៣ចំនួន៣០ម៉ឺនរៀល ។ចំណែកកីឡាករកីឡាការិនីដែលមិនបានទទួលជ័យលាភី ក៏បានឧបត្ថម្ភលើកទឹកចិត្តផងដែរ ព្រោះមានទូក៣៧គ្រឿងដែលបានដាក់ពាក្យចូលរួមប្រកួត ។
នៅព្រឹកថ្ងៃទី៣១ ខែធ្នូ នោះដែរ ពិធីបង្ហោះខ្លែង បានប្រារព្ធធ្វើឡើង ។ លោក ទេព យុទ្ធី អភិបាលរងខេត្ត ថ្លែងថា ខ្លែងជាង១០០ត្រូវបានប្រជាពលរដ្ឋនិងមន្ទីរនានាជុំវិញខេត្ត យកមកបង្ហោះនៅមុខសាលាខេត្ត ។ ការបង្ហោះខ្លែងនេះ
មិនមែនប្រឡងប្រណាំងគ្នាទេ ប៉ុន្តែចំពោះខ្លែងដែលហោះទៅបានខ្ពស់ជាងគេនឹងបានទទួលប្រាក់ឧបត្ថម្ភ ។ លោកអភិបាលរងខេត្តមានប្រសាសន៍ទៀតថា កន្លងមកខ្លែងនៅប្រទេសយើងធ្លាប់បានយកទៅប្រឡងនៅប្រទេសផ្សេងៗ ហើយក៏ទទួលបានជោគជ័យផងដែរ ។
លោក ទេព យុទ្ធី បានផ្ដាំផ្ញើដល់ប្រជាពលរដ្ឋដែលមានជំនាញធ្វើខ្លែង ត្រូវតែបង្រៀនក្មេងៗជំនាន់ក្រោយ ព្រោះខ្លែងនេះមានប្រវត្តិយូរលង់តាំងពីដូនតាមក ៕
ចែករំលែកព័តមាននេះ