ខេត្តកណ្តាល ៖ បើតាមសេចក្តីរាយការណ៍បានឱ្យដឹងថា អំពើហិ.ង្សាមួយបានកើតឡើង ដោយសារឥទ្ធិពលនៃគ្រឿង.ញៀនបានធ្វើអោយបងប្រុសម្នាក់ ចូលទៅវាយកម្ទេចទ្រព្យសម្បត្តិក្នុងផ្ទះ រួចវាយប្អូនស្រីរបស់ខ្លួនឯង ធ្វើអោយរងរបួស ហើយត្រូវបានសមត្ថកិច្ចធ្វើការឃាត់ខ្លួនតែម្តង ។ ហេតុការណ៍នេះ បានកើតឡើងនៅថ្ងៃទី០២ ខែសីហា ឆ្នាំ២០២១ ម៉ោង០៧និង២០នាទី ចំណុចផ្ទះជួលជនរងគ្រោះស្ថិតក្នុងភូមិលេខ២ សង្កាត់ស្វាយរលំ ក្រុងតាខ្មៅ ខេត្តកណ្តាល ។
សេចក្តីរាយការណ៍បានឱ្យដឹងថា ជនរងគ្រោះខាងលើឈ្មោះ ហេង ផាត់នី ភេទស្រី អាយុ៣៤ឆ្នាំ ជនជាតិខ្មែរ មានទីលំនៅភូមិលេខ២ សង្កាត់ស្វាយរលំក្រុងតាខ្មៅ ខេត្តកណ្តាល មុខរបរមេផ្ទះ (រងរបួសស្នាមត្រង់ភ្នែកខាងស្តាំ) ។ ចំណែកជនសង្ស័យឈ្មោះ ហេង សុខជា ភេទប្រុស អាយុ៣៩ឆ្នាំ ជនជាតិខ្មែរ មានទីលំនៅភូមិលេខ២ សង្កាត់ស្វាយរលំក្រុងតាខ្មៅ ខេត្តកណ្តាល មុខរបរមិនពិតប្រាកដ ។
បើតាមនគរបាលក្រុងតាខ្មៅ បានអោយដឹងថា កាលពីវេលាកើតហេតុខាងលើ ជនសង្ស័យខាងលើ ក្រោយពីបានប្រើប្រាស់គ្រឿង.ញៀនរួច ក៏បានដើរមករករឿងជនរងគ្រោះជាប្អូនស្រីដល់ក្នុងផ្ទះតែម្តង ហើយបានវាយទៅលើជនរងគ្រោះ បណ្ដាលឲ្យមានរបួសស្នាម និងវាយបំផ្លិចបំផ្លាញទ្រព្យសម្បត្តិប្រើប្រាស់ក្នុងផ្ទះធ្វើឱ្យខូចខាតអស់មួយចំនួនទៀតផង។
នគរបាលក្រុងតាខ្មៅ បានអោយដឹងទៀតថា ដោយទ្រាំនឹងទង្វើដដែលៗរបស់ជនសង្ស័យលែងបាន ទើបជនរងគ្រោះជាប្អូនស្រីបានប្តឹងមកសមត្ថកិច្ចប៉ុស្តិ៍ស្វាយរលំ ឱ្យជួយអន្តរាគមន៍ឃាត់ខ្លួនជនសង្ស័យ និងវត្ថុតាង បញ្ជូនមកកាន់អធិការដ្ឋាននគរបាលក្រុងតាខ្មៅ ដើម្បីចាត់ការបន្តតាមនីតិវិធី។
ចែករំលែកព័តមាននេះ