រាជធានីភ្នំពេញ ៖ តាមការបរិច្ចេទរបស់ចៅក្រមជំនុំជម្រះសាលាដំបូងរាជធានីភ្នំពេញ នាព្រឹកថ្ងៃទី៣ សីហា ឆ្នាំ២០២១ បានប្រកាសសាលក្រមផ្តន្ទាទោស អ្នកគ្រូបង្រៀនសាលាបឋមសិក្សាម្នាក់(ជាមេតុងទីន)ស៊ីដាច់ប្រាក់អ្នកគ្រូដូចគ្នាជាង១៤ម៉ឺនដុល្លារអាមេរិក ដាក់ពន្ធនាគារកំណត់១៨ខែ និងតម្រូវឲ្យសងលុយទៅដើមបណ្តឹងវិញ តាមចំនួនទឹកប្រាក់រៀងខ្លួន ។ សាលក្រមបានទុកសិទ្ធិឲ្យប្តឹងឧទ្ធរណ៍ បើសិនជាភាគីណាមួយមិនពេញចិត្តចំពោះការការក្តីនេះ ។ ជនជាប់ចោទមានឈ្មោះ ឈុន ថារីណែត ភេទស្រី អាយុ៣៩ឆ្នាំ មុខរបរជាគ្រូបង្រៀននៅសាលាបឋមសិក្សាមួយ ក្នុងខណ្ឌទួលគោក រាជធានីភ្នំពេញ ។
សូមជម្រាបថា កាលរសៀលថ្ងៃទី២០ ខែកក្កដា ឆ្នាំ២០២១ សាលាដំបូងរាជធានីភ្នំពេញ បានលើកយកសំណុំរឿងព្រហ្មទណ្ឌមួយ ដែលមានជនត្រូវចោទជាអ្នកគ្រូបង្រៀនសាលាបឋមសិក្សា.ម្នាក់ រងនូវបណ្តឹងពីសំណាក់អ្នកគ្រូបង្រៀនដូចគ្នា ប្តឹងពីបទ.ក្លែងបន្លំលិខិតឯកជន និងបទ.ឆបោកប្រាក់ តាមរូបភាពលេង(តុងទីន) មកបើកសវនាការផ្តន្ទាទោស ។ ប៉ុន្តែនៅពេលសវនាការសាកសួរដេញដោលជនត្រូវចោទ និងដើមបណ្តឹងចប់សព្វគ្រប់ហើយ ចៅក្រមជំនុំជម្រះ បានលើកពេលប្រកាសសាលក្រម សំណុំរឿងនេះទៅថ្ងៃទី៣ ខែសីហា ឆ្នាំ២០២១ ខាងមុខ ។ ជនត្រូវចោទមានឈ្មោះ ឈុន ថារីណែត មុខរបរជាគ្រូបង្រៀន នៅសាលាបឋមសិក្សាមួយ ក្នុងខណ្ឌទួលគោក រាជធានីភ្នំពេញ ។ សវនាការបានធ្វើឡើងជាសាធារណៈដែលមានចៅក្រមជំនុំជម្រះគឺលោកស្រី សម័យ លីនដា និងតំណាងអយ្យការគឺលោក សេង ហៀង ព្រះរាជអាជ្ញារងអមសាលាដំបូងរាជធានីភ្នំពេញ ។
សូមរម្លឹកថា កាលពីថ្ងៃទី១១ ខែកុម្ភៈ ឆ្នាំ២០២០ មានអ្នកគ្រូបង្រៀននៅសាលាបឋមសិក្សា៣នាក់ តំណាងឲ្យអ្នកគ្រូបង្រៀនចំនួន២១ នាក់ដែលជាសមាជិកលេងតុងទីនដូចគ្នា បានដាក់ពាក្យបណ្តឹងទៅនាយកដ្ឋាននគរបាលព្រហ្មទណ្ឌក្រសួងមហាផ្ទៃ ប្តឹងពីឈ្មោះ ឈុន ថារីណែត ភេទស្រី អាយុ៣៩ ឆ្នាំ មុខរបរជាគ្រូបង្រៀន (មេតុងទីន) ស្នាក់នៅផ្ទះលេខ១១៧D ផ្លូវលេខ១២២ សង្កាត់ទឹកល្អក់១ ខណ្ឌទួលគោក ពីបទ.ក្លែងលិខិតឯកជន និងឆបោប្រាក់ចំនួន១៤២ ០០៩ ដុល្លារអាមេរិក ។ តាមពាក្យបណ្តឹងបានបញ្ជាក់ទៀតថា កាលពីថ្ងៃទី១៥ ខែធ្នូ ឆ្នាំ២០១៦ ឈ្មោះ ឈុន ថាវីណែត (ជនត្រូវចោទ) បានដើរឃោសនាគៀងគររកសមាជិកឲ្យលេងតុងទីនជាមួយ ចំនួន៦ខ្សែ ដោយខ្សែទី១មានសមាជិកចំនួន៦៧ នាក់ ក្នុង១ខ្សែ ១ក្បាលមានទឹកប្រាក់៥០ ដុល្លារអាមេរិក ដោយដេញ១ខែចំនួន២ដង ក្នុងនោះខ្សែ៥០ ដុល្លារមាន៣ ខ្សែ និង៣០ ដុល្លារអាមេរិកមានចំនួន៣ខ្សែ ដេញ១ខែចំនួន២ដង ។
ដោយសំអាងថា ឈ្មោះ ឈុន ថារីណែត ជាគ្រូបង្រៀន មានមុខរបរត្រឹមត្រូវ ទើបអ្នកគ្រូជាដើមបណ្តឹងទាំងអស់គ្នា បានសម្រេចចិត្តលេងតុងទីនជាមួយ ។ ក្រោយពីបានចូលលេងជាសមាជិករួចហើយ ក៏មានអ្នកខ្លះដេញបានប្រាក់ ដែលខ្លះបានបង់ឲ្យមេគ្រប់ចំនួន ឯចំណែកឈ្មោះ ឈុន ថារីណែត (ជនត្រូវចោទ) បានក្លែងលិខិតឈ្មោះខ្មោចលក់មកឲ្យសមាជិក(ដើមបណ្តឹង)បន្ថែមទៀត ដោយសមាជិកទាំងអស់ពុំបានដឹងឡើយ ហើយបានបោះពាក្យថា បើចង់ប្តឹងទៅណាប្តឹងទៅ គេមិនខ្លាចទេ ព្រោះមានខ្នងប្តីជាប៉ូលីសដែរ ។ ចំពោះប្រាក់ដែលជនត្រូវចោទបានឆបោក បានយកពីសមាជិកជាដើមបណ្តឹង២៤ នាក់នោះទៅសរុប ១៤២.០០៩ ដុល្លារអាមេរិក (ដប់បួនម៉ឺនពីរពាន់ប្រាំបួនដុល្លារអាមេរិក) ។
ក្រោយពីមានពាក្យបណ្តឹងដូចបានរៀបរាប់ខាងលើនេះ សមត្តកិច្ចនាយកដ្ឋាននគរបាលព្រហ្មទណ្ឌ ក្រសួងមហាផ្ទៃ បានកោះអញ្ជើញលោកស្រីគ្រូបង្រៀនរងនូវការប្តឹងចោទប្រកាន់នោះទៅសាកសួរ នៅថ្ងៃទី២៣ ខែកញ្ញា ឆ្នាំ២០ ២០ នៅពេលនគរបាលព្រហ្មទណ្ឌអញ្ជើញលោកស្រីគ្រូបង្រៀនទៅសាកសួរ ទើបរកឃើញថា អ្នកគ្រូពិតជាជាប់ពាក់ពន្ធបទល្មើស ដូចពាក្យបណ្តឹងនោះ ដូច្នោះសមត្តកិច្ចក៏បានកសាងសំណុំ រឿងបញ្ជូនជនសង្ស័យ ទៅកាន់សាលាដំបូងរាជធានីភ្នំពេញ ដើម្បីឲ្យតំណាងអយ្យការធ្វើការចោទប្រកាន់ជាផ្លូវ បន្ទាប់មកចៅក្រមស៊ើបសួរ ក៏សម្រេចចេញដីកាឃុំខ្លួនជនសង្ស័យដាក់ពន្ធនាគារព្រៃស(មណ្ឌលអប់រំកែប្រែម២) រហូតដល់ថ្ងៃបើកសវនាការនេះ ៕
ចែករំលែកព័តមាននេះ