ភ្នំពេញ៖ ក្នុងនាមគណៈកម្មការអន្តរក្រសួងប្រយុទ្ធនឹងជំងឺកូវីដ១៩ លោក ម៉ម ប៊ុនហេង រដ្ឋមន្ត្រីក្រសួងសុខាភិបាល បានចេញលិខិតនៅយប់ថ្ងៃទី២ ខែសីហា ឆ្នាំ២០២១ ជម្រាបជូនឯកឧត្តម…
ភ្នំពេញ៖ ក្នុងនាមគណៈកម្មការអន្តរក្រសួងប្រយុទ្ធនឹងជំងឺកូវីដ១៩ លោក ម៉ម ប៊ុនហេង រដ្ឋមន្ត្រីក្រសួងសុខាភិបាល បានចេញលិខិតនៅយប់ថ្ងៃទី២ ខែសីហា ឆ្នាំ២០២១ ជម្រាបជូនឯកឧត្តម លោកជំទាវ ទេសរដ្ឋមន្ត្រី រដ្ឋមន្ត្រី ក្រសួង ស្ថាប័នពាក់ព័ន្ធ រួមទាំងអភិបាលរាជធានីខេត្ត ទាំង ២៥ ក្នុងកម្មវត្ថុ អនុវត្តយុទ្ធនាការ អប់រំ ផ្សព្វផ្សាយ និងបណ្តុះបណ្តាលប្រជាពលរដ្ឋ ក្រោមប្រធានបទ «រួមគ្នាទទួលខុសត្រូវទប់ស្កាត់ការចម្លងវីរុសកូវីដ១៩» ដើម្បីជំរុញការទទួលខុសត្រូវរបស់បុគ្គល សហគមន៍ ស្ថាប័នពាក់ព័ន្ធជាពិសេសសេវាឯកជន អាជ្ញាធរមូលដ្ឋាន រួមគ្នាទទួលខុសត្រូវក្នុងស្មារតីសាមគ្គីភាព ដើម្បីកាត់ផ្តាច់ខ្សែចម្លងវីរុសកូវីដ១៩ ព្រមទាំងរស់នៅជាមួយនឹងវីរុសកូវីដ១៩ តាមគន្លងប្រក្រតីភាពថ្មីឲ្យបានត្រឹមត្រូវ។
ក្នុងលិខិត លោករដ្ឋមន្ត្រី ម៉ម ប៊ុនហេង លើកឡើងថា យុទ្ធនាការអនុវត្តយុទ្ធសាស្ត្រ ៦ចំណុច របស់សម្តេចតេជោ នាយករដ្ឋមន្ត្រី សំដៅទប់ស្កាត់រលកទី៣ នៃការឆ្លងរាលដាលនៃជំងឺកូវីដ១៩ និងដើម្បីត្រៀមខ្លួនរស់ជាមួយជំងឺកូវីដ១៩ ក្នុងគន្លងប្រក្រតីភាពថ្មី កំពុងតែដំណើរការយ៉ាងសកម្ម ដើម្បីទប់ស្កាត់ស្ថានភាពរាតត្បាតនៃជំងឺកូវីដ១៩។
លិខិត បន្តថា ទន្ទឹមនឹងនេះ ដើម្បីទាក់ទាញប្រជាពលរដ្ឋឲ្យបង្កើនការយកចិត្តទុកដាក់ខ្ពស់ឡើងវិញក្នុងការប្រកាន់ខ្ជាប់នូវវិធានការសុវត្ថិភាពផ្នែកសុខាភិបាល ជាពិសេសវិធានការ «៣ការពារ និង ៣កុំ» ព្រមទាំងផ្លាស់ប្តូរឥរិយាបថ ដើម្បីរៀនរស់នៅជាបណ្តើរៗ ជាមួយនឹងវត្តមាននៃមេរោគកូវីដ១៩ គណៈកម្មការអន្តរក្រសួងប្រយុទ្ធនឹងជំងឺកូវីដ១៩ បានដាក់ចេញនូវលិខិតចុះថ្ងៃទី២៦ ខែកក្កដាកន្លងមក ស្តីពីការអនុវត្តយុទ្ធនាការទូទាំងប្រទេស ដើម្បីអប់រំ ផ្សព្វផ្សាយ និងបណ្តុះបណ្តាលប្រជាពលរដ្ឋឲ្យយល់ដឹងអំពីគ្រោះថ្នាក់នៃវីរុសកូវីដ១៩ ដែលត្រូវបន្តជាប់ជាប្រចាំដោយសា្មរតីយកចិត្តទុកដាក់ខ្ពស់។
សេចក្តីណែនាំដដែល លើកឡើងថា យុទ្ធនាការអប់រំផ្សព្វផ្សាយអំពីវិធានការការពារជំងឺកូវីដ១៩ បានធ្វើឡើងយ៉ាងច្រើនក្នុងរយៈពេលកន្លងមក។ ប៉ុន្តែសកម្មភាពទាំងអស់នេះ មិនទាន់គ្រប់គ្រាន់ សម្រាប់ឆ្លើយតបទៅនឹងស្ថានភាពនៃការចម្លងវីរុសកូវីដ១៩ នាបច្ចុប្បន្ន។ ដូច្នេះការរៀបចំបន្តយុទ្ធនាការ ដែលមានលក្ខណៈផ្តោតចំពោះ និងមានកិច្ចសហការរវាងភាគីពាក់ព័ន្ធទាំងអស់ ដោយល្អិតល្អន់ និងសម្រុកក្នុងពេលតែមួយ ចាប់ពីពេលនេះតទៅ គឺមានសារៈសំខាន់បំផុត ដើម្បីឈានទៅសម្រេចបានការផ្លាស់ប្តូរឥរិយាបថរបស់ប្រជាជនក្នុងការរស់នៅតាមបែបគន្លងថ្មីជាមួយវីរុសកូវីដ១៩។
ជាមួយគ្នានេះ លោករដ្ឋមន្ត្រី ម៉ម ប៊ុនហេង ក៏បានបន្ថែមថា អនុគណៈកម្មការអប់រំ បណ្តុះបណ្តាល និងទំនាក់ទំនងសាធារណៈ នៃគណៈកម្មការអន្តរក្រសួងប្រយុទ្ធនឹងជំងឺកូវីដ១៩ ក៏បានរៀបចំជាសេចក្តីណែនាំក្នុងការរៀបចំយុទ្ធនាការអប់រំ ផ្សព្វផ្សាយ និងបណ្តុះបណ្តាលប្រជាពលរដ្ឋ ក្រោមប្រធានបទ «រួមគ្នាទទួលខុសត្រូវទប់ស្កាត់ការចម្លងវីរុសកូវីដ១៩» ដើម្បីជាមគ្គុទេសជំនួយបន្ថែមក្នុងការរៀបចំអនុវត្តយុទ្ធនាការថ្នាក់ជាតិនេះ ឲ្យកាន់តែមានប្រសិទ្ធភាព។
សូមរម្លឹកថា សេចក្តីណែនាំឲ្យក្រសួងស្ថាប័នពាក់ព័ន្ធ និងអភិបាលរាជធានីខេត្ត ទូទាំងប្រទេស អនុវត្តយុទ្ធនាការ អប់រំ ផ្សព្វផ្សាយ និងបណ្តុះបណ្តាលប្រជាពលរដ្ឋ ក្រោមប្រធានបទ «រួមគ្នាទទួលខុសត្រូវទប់ស្កាត់ការចម្លងវីរុសកូវីដ ១៩» បានធ្វើឡើង ខណៈដែលរាជធានីខេត្តមួយចំនួន កំពុងឆ្លងរាតត្បាតវីរុសកូវីដ១៩ ប្រភេទបំប្លែងថ្មី ដែលតា រហូតឈានដល់ការបិទខ្ទប់ផ្នែកខ្លះក្នុងភូមិសង្កាត់ឃុំមួយចំនួន។ ក្នុងនោះ ខេត្តជាប់ព្រំដែនថៃ ៨ខេត្ត ក៏បានបិទខ្ទប់រយៈពេល ១៤ថ្ងៃ គិតចាប់ពីថ្ងៃទី២៩ ខែកក្កដា រហូតដល់ថ្ងៃទី១២ ខែសីហា ឆ្នាំ២០២១។ នៅរាជធានីភ្នំពេញ និងខេត្តផ្សេងទៀត ក៏បានអនុវត្តវិធានការរដ្ឋបាល និងបម្រាមគោចរ ក្នុងរយៈពេល ១៤ថ្ងៃនេះ ដើម្បីទប់ស្កាត់ការឆ្លងរាលដាលជំងឺកូវីដ១៩ ពិសេសមេរោគបំប្លែងថ្មី ដែលតា៕
ចែករំលែកព័តមាននេះ