ខេត្តស្ទឹងត្រែង ៖ មនុស្សចំនួន៥នាក់ត្រូវបានឃាត់ដោយកម្លាំងជំនាញដែនជម្រកសត្វព្រៃព្រៃឡង់ នៃមន្ទីរបរិស្ថានខេត្តស្ទឹងត្រែង បញ្ជូនមកកាន់មន្ទីរបរិស្ថានដើម្បីសាកសួរ និងធ្វើកំណត់ហេតុពាក់ព័ន្ធនឹងករណីកាប់បំផ្លាញព្រៃឈើដោយខុសច្បាប់ នៅស្រុកថាឡាបរិវ៉ាត់។ លោក ម៉ម ដារ៉ា…
ខេត្តស្ទឹងត្រែង ៖ មនុស្សចំនួន៥នាក់ត្រូវបានឃាត់ដោយកម្លាំងជំនាញដែនជម្រកសត្វព្រៃព្រៃឡង់ នៃមន្ទីរបរិស្ថានខេត្តស្ទឹងត្រែង បញ្ជូនមកកាន់មន្ទីរបរិស្ថានដើម្បីសាកសួរ និងធ្វើកំណត់ហេតុពាក់ព័ន្ធនឹងករណីកាប់បំផ្លាញព្រៃឈើដោយខុសច្បាប់ នៅស្រុកថាឡាបរិវ៉ាត់។ លោក ម៉ម ដារ៉ា ប្រធានស្នាក់ការដែនជម្រកសត្វព្រៃព្រៃឡង់បានឲ្យដឹងដែរថា ការឃាត់ខ្លួនជនសង្ស័យទាំង៥នាក់ខាងលើនេះត្រូវបានធ្វើឡើងកាលពីល្ងាចថ្ងៃទី៣១ ខែកក្កដា ឆ្នាំ២០២១ ក្នុងគ្រាដែលមន្ត្រីដែនជម្រកសត្វព្រៃព្រៃឡង់ចុះល្បាតក្នុងភូមិសាស្ត្រខេត្តស្ទឹងត្រែង។
លោកថា ក្រោយការឃាត់ខ្លួនជនសង្ស័យខាងលើ មន្ត្រីជំនាញក៏បានបញ្ជូនមកកាន់ស្នាក់ការដែនជម្រកសត្វព្រៃព្រៃឡង់។ លុះនៅព្រឹកថ្ងៃទី០១ ខែសីហា មន្ត្រីដែនជម្រកសត្វព្រៃ(ព្រៃឡង់) ក៏បានបញ្ជូនបន្តមកកាន់មន្ទីរបរិស្ថាខេត្តដើម្បីចងក្រងសំណុំឯកសារត្រៀមបញ្ជូនទៅកាន់តុលាការ។ ប្រធានស្នាក់ការរូបនេះបន្តថាករណីខាងលើនេះគឺមានការបញ្ជាផ្ទាល់ពីលោក ស្រេង ជាហេង ប្រធានមន្ទីរបរិស្ថានខេត្តដើម្បីបង្ក្រាបទប់ស្កាត់ បទល្មើសធនធានធម្មជាតិ ព្រៃឈើ និងសត្វព្រៃផងដែរ។ ចំណែកការឃាត់ខ្លួនជនសង្ស័យចំនួន៥នាក់ពាក់ព័ន្ធនឹងការកាប់បំផ្លាញព្រៃឈើនេះដែរជំនាញធ្វើឡើងនៅត្រង់ចំណុចព្រៃស្រះបីព្រំប្រទល់ខេត្តស្ទឹងត្រែង និងខេត្តព្រះវិហារស្ថិតក្នុងភូមិសាស្ត្រភូមិអន្លង់ជ្រៃ ឃុំអន្លង់ជ្រៃ ស្រុកថាឡាបរិវ៉ាត់ ខណៈជនសង្ស័យទាំង៥នាក់ កំពុងធ្វើសកម្មភាពកាប់រំលំដើមឈើ និងជ្រៀកឈើនៅក្នុងដែនជម្រកសត្វព្រៃ(ព្រៃឡង់)។
លោកបន្តថា ជនសង្ស័យទាំង៥នាក់ដែលឃាត់ខ្លួននោះមានទី១.ឈ្មោះ កែវ លី ភេទប្រុស អាយុ២៥ឆ្នាំ ទី២.ឈ្មោះ មាស ហាន ភេទប្រុស អាយុ២៩ឆ្នាំ ទី៣.ឈ្មោះ ឌី ហឿ ភេទប្រុស អាយុ២៤ឆ្នាំ ទី៤.ឈ្មោះ ទេត ខេម ភេទប្រុស អាយុ៣១ឆ្នាំ និងទី៥.ឈ្មោះ វាយ ធុន ភេទប្រុស អាយុ២៤ឆ្នាំ។ ជនសង្ស័យទាំង៥នាក់ខាងលើរស់នៅភូមិ ច្រេត ឃុំច្រេត ស្រុកជ័យសែន ខេត្តព្រះវិហារ។ ក្នុងនោះកម្លាំងជំនាញធ្វើការដកហូតបានវត្ថុតាងរួមមានរណាយន្ត៤គ្រឿង យកមកកាន់មន្ទីរបរិស្ថានខេត្តដើម្បីអនុវត្តតាមនីតិវិធីច្បាប់៕ ដោយ ៖ រ៉ូ សាលី
ចែករំលែកព័តមាននេះ