វីរុសបំប្លែងថ្មី Delta វាយលុកភ្នំពេញ ៖ បិទខ្ទប់តំបន់ចំនួន២ នៅខណ្ឌឫស្ស៊ីកែវ និងទួលគោក
- ភ្នំពេញ
រាជធានីភ្នំពេញ ៖ រដ្ឋបាលរាជធានីភ្នំពេញសម្រេចបិទខ្ទប់តំបន់ចំនូន ២ ក្នុងទឹកដីខណ្ឌទួលគោក និងឫស្ស៊ីកែវ ចាប់ពីម៉ោងសូន្យ ឈានចូលថ្ងៃទី ៣ ខែសីហា…
រាជធានីភ្នំពេញ ៖ រដ្ឋបាលរាជធានីភ្នំពេញសម្រេចបិទខ្ទប់តំបន់ចំនូន ២ ក្នុងទឹកដីខណ្ឌទួលគោក និងឫស្ស៊ីកែវ ចាប់ពីម៉ោងសូន្យ ឈានចូលថ្ងៃទី ៣ ខែសីហា ឆ្នាំ២០២១ ដើម្បីទប់ស្កាត់ និងកាត់ផ្ដាច់ការឆ្លងរាលដាលនៅក្នុងសហគមន៍ ។ នេះបើយោងតាមសេចក្តីសម្រេចរបស់រដ្ឋបាលសាលារាជធានីភ្នំពេញ ។
យោងតាមសេចក្តីសម្រេច ចុះថ្ងៃទី ២ ខែសីហា នេះ លោក ឃួង ស្រេង អភិបាលរាជធានីភ្នំពេញបានសម្រេច បិទខ្ទប់ច្រកផ្លូវលេខ ៣៧២, ៣៧២Z និងផ្លូវលេខ ៣៦២ ស្ថិតក្នុងភូមិ៥ សង្កាត់បឹងសាឡាង ខណ្ឌទួលគោក រាជធានីភ្នំពេញ ដែលមានការឆ្លងរាលដាលនៃមេរោគបំប្លែងខ្លួនថ្មី ប្រភេទដែលតា (Delta) ដើម្បីទប់ស្កាត់ និងកាត់ផ្ដាច់ការឆ្លងរាលដាលនៅក្នុងសហគមន៍ សម្រាប់រយៈពេល ១៤ថ្ងៃ គិតចាប់ពីម៉ោងសូន្យ នាថ្ងៃទី០៣ ដល់ថ្ងៃទី១៦ ខែសីហា ឆ្នាំ២០២១។
ប្រការ ២ នៃសេចក្តីសម្រេចបិទខ្ទប់តំបន់ក្នុងខណ្ឌទួលគោក បានចែងថា «ក្នុងកំលុងពេលនៃការអនុវត្តវិធានការបិទខ្ទប់ ត្រូវបានហាមឃាត់រាល់ការចេញ-ចូល និងរាលការជួបជុំ ឬការប្រមូលផ្តុំមនុស្ស ក្នុងទីតាំងខាងលើ» លើកលែងតែ ករណីចាំបាច់មួយចំនួន ដូចជា ការចេញ-ចូល ដោយមូលហេតុសុខភាពបន្ទាន់ ឬការចេញ-ចូល ដើម្បីផ្តល់វត្ថុសំណាកធ្វើតេស្តរកជំងឺកូវីដ-១៩ តាមការណែនាំរបស់អាជ្ញាធរមូលដ្ឋាន ។ ការវិលត្រឡប់ទៅលំនៅឋាន ឬទីសំណាក់ របស់ខ្លួនវិញរបស់បុគ្គលដែលបានបញ្ចប់ការចត្តាឡីស័ក និងអ្នកជំងឺចេញពីមន្ទីរពេទ្យ ឬកន្លែងសម្រាកព្យាបាល ចូលទៅក្នុងទីតាំងបិទខ្ទប់ ដោយមានការសម្របសម្រួលពីអាជ្ញាធរមានសមត្ថកិច្ច ជាដើម ។
ក្នុងសេចក្តីសម្រេច លោក ឃួង ស្រេង បានបញ្ជាក់ក្នុងប្រការ៤ ថា «បុគ្គល ឬនីតិបុគ្គលទាំងឡាយណា ដែលមិនអនុវត្តតាមប្រការ២ នៃសេចក្តីសម្រេចនេះ នឹងត្រូវកសាងសំណុំរឿងបញ្ជូនទៅស្ថាប័នតុលាការ ដើម្បីផ្តន្ទាទោសដាក់ពន្ធនាគារ និងទោសពិន័យជាប្រាក់ ស្របតាមមាត្រា ១០ និងមាត្រា ១១» នៃច្បាប់ស្តីពីកូវីដ-១៩ ។
នៅរសៀលនេះផងដែរ រដ្ឋបាលសាលារាជធានីភ្នំពេញក៏បាន សម្រេចបិទកំណាត់ផ្លូវលេខ ៩៣ ក្នុងភូមិផ្សារតូច សង្កាត់ទួលសង្កែទី១ ខណ្ឌឫស្សីកែវ ដោយសង្ស័យពាក់ព័ន្ធមេរោគបំប្លែងថ្មី Delta ។
យោងតាមសេចក្តីសម្រេចរបស់ រដ្ឋបាលរាជធានីភ្នំពេញ ចុះថ្ងៃទី ២ សីហា និងចុះហត្ថលេខាដោយលោក ឃួង ស្រេង អភិបាលរាជធានីភ្នំពេញបានបញ្ជាក់ថា «ត្រូវបិទខ្ទប់មិនឱ្យមានការចេញ-ចូល ចំពោះកំណាត់ផ្លូវលេខ ៩៣ ពីចំណុចសាលាបឋមសិក្សាពញាក្រែក រហូតដល់ចំណុចផ្ទះលេខ ១១៦ រួមទាំងលំនៅឋានក្នុងបុរី ខេស៊ី (KC)ស្ថិតនៅក្រុមទី ៤ ភូមិផ្សារតូច សង្កាត់ទួលសង្កែទី១ ខណ្ឌឬស្សីកែវ រជធានីភ្នំពេញ ដោយសង្ស័យពាក់ព័ន្ធមេរោគបំប្លែងថ្មី Delta ។
ការសម្រេចបិទរយៈពេល ៧ ថ្ងៃគិតចាប់ពីម៉ោងសូន្យ នាថ្ងៃទី ៣ ខែសីហា ដល់ថ្ងៃទី ៩ ខែសីហា ឆ្នាំ ២០២១ រហូតការស្រាវជ្រាវត្រូវបានបិទបញ្ចប់ ដើម្បីទប់ស្កាត់ការឆ្លងរាលដាលនូវមេរោគបំប្លែងថ្មី ក្នុងសហគមន៍ ៕
ចែករំលែកព័តមាននេះ