រាជធានីភ្នំពេញ ៖ បន្ទាប់ពីឆ្លងជម្ងឺកូវីដ១៩ ទាំងខ្លួនឯងផ្ទាល់ ព្រមទាំងប្រពន្ធ និងកូន ពេលនេះកីឡាករប្រដាល់គុនខ្មែរ១រូប គឺកីឡាករម៉ន សាម៉េត និងក្រុមគ្រួសារ…
រាជធានីភ្នំពេញ ៖ បន្ទាប់ពីឆ្លងជម្ងឺកូវីដ១៩ ទាំងខ្លួនឯងផ្ទាល់ ព្រមទាំងប្រពន្ធ និងកូន ពេលនេះកីឡាករប្រដាល់គុនខ្មែរ១រូប គឺកីឡាករម៉ន សាម៉េត និងក្រុមគ្រួសារ ចាប់ផ្ដើមមានភាពធូរស្រាលឡើងវិញហើយ ខណៈដែលកីឡាកររូបនេះក៏ទទួលបានថវិកាឧបត្ថម្ភជាហូរហែរពីសម្បុរសធម៌ ដើម្បីសម្រួលការលំបាក។
កីឡាករ ម៉ន សាម៉េត បានសរសេរសារបង្ហោះនៅលើបណ្តាញសង្គមហ្វេសប៊ុកថ្លែងអំណរគុណចំពោះអ្នកបរិច្ចាគប្រាក់ជាច្រើន ដែលបានជួយលោកអោយទទួលបានថវិកាដោះស្រាយជីវភាព ក្នុងពេលដែលលោកកំពុងព្យាបាលជម្ងឺកូវីត១៩ទាំងគ្រួសារ ហើយមិនមានចំណូលទាល់តែសោះ សម្រាប់ការចំណាយបន្ថែមពីលើការផ្គត់ផ្គង់នៅកន្លែងព្យាបាល។
កីឡាកររូបនេះបានប្រកាសនៅបណ្ដាញសង្គមមុននេះថា រូបលោកបានឆ្លងជំងឺកូវីដ១៩ ដោយប្រពន្ធ និងកូន ព្រមទាំងឪពុកក្មេក ក៏បានឆ្លងជំងឺកូវីដ-១៩ នេះផងដែរ។ លោកគឺជាកីឡាករប្រដាល់ទី៣ ដែលបានឆ្លងជម្ងឺកូវីត១៩ បន្ទាប់ពីប្អូនប្រុសរបស់លោក គឺ ម៉ន វិរៈ និងអតីតស្ដេចប្រដាល់ អេ ភូថង ដែលបានរកឃើញវិជ្ជមានជំងឺកូវីដ-១៩ កាលពីថ្ងៃទី១១ ខែកក្កដា ឆ្នាំ២០២១កន្លងទៅនេះផង។
យ៉ាងណាមិញ ប្អូនប្រុសរបស់កីឡាកររូបនេះបានជាសះស្បើយហើយ តែបែរជាមកកើតលើលោកជាបន្ត ដោយការកើតរបស់លោកលើកនេះ គឺកើតទាំងប្រពន្ធ និង កូនៗតែម្ដង ទើបជារឿងដ៏ពិបាករបស់គ្រួសារទាំងមូល។
កីឡាករប្រដាល់ ម៉ន សាម៉េត បានបញ្ជាក់ថា ក្រោយរកឃើញថា មានវិជ្ជមានកូវីដ១៩ ហើយប្រពន្ធនិងកូន ព្រមទាំងឪពុកក្មេក របស់លោកក៏វិជ្ជមានកូវីដ១៩ គឺលោកស្លុតចិត្តយ៉ាងខ្លាំង តែលោកបែរជាអារម្មណ៍ធូរចិត្តបន្តិចវិញ ក្រោយទៅទទួលការព្យាបាលបានមួយរយៈ។
លោកបានបញ្ជាក់ថា បច្ចុប្បន្ន លោក និង ក្រុមគ្រួសារ កំពុងសម្រាកព្យាបាលនៅទីតាំងម៉ូឌែន២ ហើយស្ថានភាពក្រោយការព្យាបាល គឺលោក និងគ្រួសារបានធូរស្បើយច្រើន។ ជាមួយគ្នានឹងដំណឹងនេះដែរ គេឃើញមានបងប្អូនជាអ្នកប្រើប្រាស់បណ្ដាញសង្គមជាច្រើនក៏បានសម្ដែងក្តីត្រេកអរ និងថែមទាំងជូនពរឱ្យលោក ម៉ន សាម៉េត និងក្រុមគ្រួសារ ឆាប់បានជាសះស្បើយ និង ចេញពីមន្ទីរពេទ្យឆាប់ៗនេះ៕
ចែករំលែកព័តមាននេះ