រាជធានីភ្នំពេញ៖ អ្នកនាង យ៉ាន ពិដោ អាយុ៣១ឆ្នាំម្ចាស់ហាងម៉ាស្សាមួយ នៅម្តុំផ្សារសាមគ្គី ក្នុងខណ្ឌទួលគោកនិយាយឱ្យដឹងថា កូវីដ១៩កំពុងផ្លាច់ជីវិតរបរម៉ាស្សា។ អ្នកនាងបញ្ជាក់ថា គាត់បានបញ្ឈប់អាជីវកម្មម៉ាស្សាចំនួន ៥ ខែម្តង ហើយកាលពីឆ្នាំ២០២០។ នៅក្នុងឆ្នាំ២០២១នេះ គាត់បានបញ្ឈប់ការទទួលអតិថិជន ចាប់ពីដើមខែមីនាមក នៅក្រោយផ្ទុះ ព្រឹត្តិការណ៍សហគមន៍២០កុម្ភៈ មកដល់ពេលនេះ គាត់នៅមិនទាន់ហ៊ានបើកអាជីវកម្មនេះឡើងវិញនៅឡើយ ស្របពេលអាជ្ញាធរទើបចេញបម្រាម មិនអនុញ្ញាតឱ្យរបរនេះបើកដំណើរវិញនោះ។
ពិដោ រៀបរាប់ឱ្យដឹងថា៖ «ជាសំណាងដែលខ្ញុំមិនបានជួលផ្ទះគេបើកអាជីវកម្ម។ ខ្ញុំរកស៊ីក្នុងផ្ទះខ្លួនឯងដូច្នេះមិនមានបន្ទុកចំណាយថ្លៃជួលផ្ទះទេ ប៉ុន្តែអ្នកជាង អ្នកធ្វើការឲ្យខ្ញុំពួកគាត់ជួបការលំបាកក្នុងជីវភាពខ្លាំងណាស់ នៅក្នុងរយៈពេលជិតពីរឆ្នាំដែលការរកចំណូលមិនបាននោះ។ ពួកគាត់ម្នាក់មានបន្ទុកគ្រួសារទៀត»។
ចំណែក ម្ចាស់តូបម៉ាស្សាមួយកន្លែងទៀត ស្ថិតក្នុងផ្សារកណ្តាល និយាយសុំមិនឱ្យបង្ហាញអត្តសញ្ញាណ បានឱ្យដឹងថា៖ «គាត់បានជួលកន្លែងគេក្នុងតម្លៃ ២០០ ដុល្លារក្នុងមួយខែ ដើម្បីប្រកបរបរម៉ាស្សា តុបតែងមុខ ដែលក្នុងនោះមានសេវា ម៉ាស្សា ធ្វើសក់ ផាត់មុខ ជាដើម។ មុនពេលមិនទាន់ផ្ទុះជំងឺកូវី១៩ មុខរបរនេះកាក់កបគ្រាន់បើ អាចដោះស្រាយជីវភាពគ្រួសារបាន ប៉ុន្តែក្រោយពីផ្ទុះព្រឹត្តិការណ៍សហគមន៍២០កុម្ភៈមក ហើយផ្សារកណ្តាល បានបិទខ្ទប់ចំនួនពីរលើកនោះ បានធ្វើប៉ះពាល់ដល់ជីវភាពប្រចាំថ្ងៃរបស់អ្នកស្រីជាខ្លាំង។ ផ្សារកណ្តាលឥឡូវមិនសូវមានចេញចូលទេ ពលរដ្ឋក្លាចកូវីដ១៩ ។ ម៉ូយរបស់ខ្ញុំជាច្រើននាក់បានបាត់ មិនហ៊ានមកតុបតែងខ្លួនឡើយ។ បញ្ហានេះធ្វើឱ្យមុខរបរម៉ាស្សាធ្លាក់យ៉ាងខ្លាំងរកលុយទិញបាយហូបមិនបានផងរីឯលុយឈ្នួលតូបកាន់តែយ៉ាប់ទៅទៀត»។
អ្នកស្រីបានបញ្ជាក់ថាប្រសិនបើស្ថានភាព ជំងឺកូវីដ១៩មិនថមថយទេនោះ គាត់អាចផ្អាកប្រកបមុខរបរនេះមួយរយៈ ព្រោះគ្មានលុយបង់ថ្លៃតូបប្រចាំខែឡើយ។
ម៉ាស្សាមិនថាម៉ាស្សាមុខ ម៉ាស្សាខ្លួននោះទេ ជារបរមួយដែលមនុស្ស និងមនុស្សនៅជិតគ្នា ជាប់គ្នា ដែលងាយឆ្លងជំងឺកូវីដ១៩។ នៅក្នុងឱកាសប្រកាស បើកយុទ្ធនាការចាក់វ៉ាក់សាំង ដល់កុមារនិងយុវវ័យអាយុពី ១២ ដល់ ១៧ ឆ្នាំនៅព្រឹកនេះ សម្តេចនាយករដ្ឋមន្ត្រីបានលើកឡើងថា អ្នកប្រករបរអាជីពម៉ាស្សាឬមានបំណងចង់ចាប់អាជីពនេះគួរផ្លាស់ប្តូរ ពីព្រោះវាមិនសបស្រប នៅក្នុងបរិបទកូវីដ១៩រាតត្បាតនេះ ទេ។ សម្តេចបានទឿនរំឭកពលរដ្ឋរស់នៅ ក្នុងគន្លងថ្មីនៃការការពារជំងឺកូវីដ១៩ ក្នុងជីវភាពជាប្រក្រតី ដូចជាត្រូវរក្សាគម្លាត ពាក់ម៉ាស លាងសម្អាតដៃ មិនកាត់បន្ថយការជួបជុំ ការជិតស្និទ្ធគ្នានោះ។
អ្នកស្រី យី ឡាង វ័យជាង៤០ឆ្នាំកំពុងឈរកក់សក់ឱ្យភ្ញៀវ នៅក្នុងតូបម៉ាស្សារបស់គាត់នាផ្សារកណ្តាល បាននិយាយថា តូបម៉ាស្សាក្នុងផ្សារកណ្តាលមួយណា ក៏ដូចមួយណាដែល ពេលនេះបាត់បង់អតិថិជនអស់។ កូវីដ១៩បានបំផ្លាញមុខរបរនេះ។ អ្នកស្រីឡាងបានត្អូញត្អែរថា៖ «ជំងឺកូវីដ១៩បានបង្កផលប៉ះពាល់យ៉ាងខ្លាំងដល់ជីវភាពយើង។ ខ្ញុំប្រកបមុខរបរម៉ាស្សានេះជាង៧ឆ្នាំមកហើយ ដោយជួលតូបគេក្នុង១ខែ២៥០ដុល្លារ ពេលមុខអាចរកចំណូលយ៉ាងតិច៤០ដុល្លារ ក្នុងមួយថ្ងៃ តែឡូវថ្ងៃខ្លះមិនបានមួយរៀលផង»៕
ចែករំលែកព័តមាននេះ