រាជធានីភ្នំពេញ ៖ កាលពីល្ងាចថ្ងៃទី២៤ ខែធ្នូ ឆ្នាំ២០១៤នេះ អនុសាខាកាកបាទក្រហមកម្ពុជា ខណ្ឌមានជ័យ ដឹកនាំដោយលោក ឌី រ័ត្នខេមរុណ អភិបាលរងខណ្ឌ និងជាប្រធានកាកបាទក្រហមខណ្ឌ បានដឹកនាំក្រុមមន្ត្រីពាំនាំយកអំណោយរបស់សម្តេចកិត្តិព្រឹទ្ធិបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ទៅចែកជូនប្រជាពលរដ្ឋទីទ័លក្រចំនួន១០គ្រួសារ ដែលរស់នៅក្នុងភូមិសន្សំកុសលទី១ ទី២ ទី៣ និងទី៤ ក្នុងសង្កាត់បឹងទំពុន ខណ្ឌមានជ័យ រាជធានីភ្នំពេញ ។
លោក ឌី រ័ត្នខេមរុណ បានឱ្យដឹងថា អំណោយដែលត្រូវបានចែកជូននាពេលនេះក្នុងមួយគ្រួសារៗទទួលបាន អង្ករ២៥គីឡូក្រាម ត្រីខ១យួរ មី១កេស ឃីត១ (មុង ភួយ ក្រមា សារុង) និងថវិកា៥ម៉ឺនរៀល ។
ឆ្លៀងក្នុងឱកាសនោះដែរ លោក ឌី រ័ត្នខេមរុណ បានមានប្រសាសន៍ផ្ញើរក្តីនឹករលឹកជាខ្លាំងពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ទៅកាន់បងប្អូនប្រជាពលរដ្ឋ ដែលសម្តេចតែងតែតាស់តឿនដល់មន្ត្រីក្រោមឱវាទ និងអាជ្ញាធរគ្រប់លំដាប់ថ្នាក់ ធ្វើយ៉ាងណាត្រូវយកចិត្តទុកដាក់ខ្ពស់ និងគិតគូរដល់មនុស្សចាស់ជរា អ្នកដែលជួបការលំបាក និងអ្នកដែលមានការខ្វះខាត ជាពិសេសប្រជាពលរដ្ឋទីទ័លក្រក្នុងមូលដ្ឋាន ដោយមិនត្រូវមើលរំលងឡើយ ។
ក្នុងឱកាសនោះដែរ លោកអភិបាលរងក៏បានធ្វើការផ្តាំផ្ញើរបងប្អូនទាំង១០គ្រួសារឱ្យចេះរក្សានូវសុខភាព អនាម័យឱ្យបានល្អ ពោលគឺត្រូវរស់នៅស្អាត ហូបស្អាតជានិច្ច ដើម្បីបញ្ចៀសនូវជម្ងឺដង្កាត់ផ្សេងៗ កុំឱ្យមកបៀតបៀនខ្លួនប្រាណយើងបាន ៕
ចែករំលែកព័តមាននេះ