រាជធានីភ្នំពេញ ៖ នៅល្ងាចថ្ងៃសៅរ៍ខានស្អែកនេះ ព្រឹត្តិការណ៍ប្រកួតជម្រុះដណ្តើមពានរង្វាន់ជើងឯក«អធិរាជស៊ីម៉ងត៍អូដ្ឋ»របស់ស្ថានីយទូរទស្សន៍ប៉ុស្ដិ៍លេខ៥នឹងឈានដល់ជុំទី២សម្រាប់ពូលA ហើយ ដោយការប្រកួតនៅក្នុងជុំនេះ គឺសុទ្ធតែសំខាន់សម្រាប់កីឡាករនីមួយៗ ។ យ៉ាងណាក៏ដោយ មានតែកីឡាករឆាយ មាស និងឌុម កែវដា ប៉ុណ្ណោះ ដែលស្ថិតក្នុងការប្រទាញប្រទង់ជាងគេសម្រាប់លទ្ធផលឈ្នះចាញ់ ខណៈជើងខ្លាំងពីររូបគឺឈិន ក្វាន់ង៉ុយ និងកន ចន្ថា ក៏ត្រូវការឈ្នះគ្នាដាច់ខាតផងដែរ ដើម្បីរក្សាមុខមាត់ ។
ការប្រកួតដែលត្រូវគេកត់សម្គាល់ថា ឈានដល់ដំណាក់កាលសំខាន់បន្តិចម្ដងៗសម្រាប់កីឡាករ៤រូបនៅក្នុងពូលA និងពូលB នេះ នឹងក្លាយជាវគ្គកាត់ក្ដីកាន់តែច្បាស់ដើម្បីបញ្ជាក់ថាកីឡាកររូបណាឈានឡើងទៅប្រកួតនៅវគ្គបន្ត ។ ជាក់ស្ដែងសម្រាប់ការប្រកួតនៅក្នុងពូលA នៅល្ងាចខានស្អែកនោះ គឺមានតែកីឡាករឆាយ មាស មកពីក្លិបសំរោងកោងកីឡាខេត្តបាត់ដំបង និងកីឡាករ ឌុម កែវដា មកពីក្លិបមកុដរាជសីហ៍ប៉ុណ្ណោះ ដែលស្ថិតនៅក្នុងលទ្ធផលប្រទាញប្រទង់គ្នា ។ អ្នកទាំងពីរនេះ បើឌុម កែវដា ឈ្នះនោះនឹងជិះសេះលែងដៃ ប៉ុន្តែបើឆាយ មាស ឈ្នះនោះនឹងធ្វើឲ្យកីឡាករ២រូបទៀតនៅក្នុងពូលជាមួយក្លាយជាមានជំហានខ្ពស់ក្នុងក្ដីសង្ឃឹម ប៉ុន្តែសម្រាប់តែម្នាក់ប៉ុណ្ណោះក្នុងចំណោមពួកគេ ។
ការប្រកួតកាលពីលើកមុនកីឡាករឆាយ មាស បរាជ័យមួយប្រកួតមកហើយ ដោយទើបតែមាន១ពិន្ទុក្នុងដៃសម្រាប់ការប្រកួតសន្សំពិន្ទុរបស់ខ្លួនតែប៉ុណ្ណោះ ។ អ៊ីចឹងហើយទើបកីឡាកររូបនេះ មិនអាចបណ្ដោយឲ្យចាញ់ក្នុងមួយប្រកួតនេះទៀតទេ ដោយសារតែការប្រកួតក្នុងពូលតម្រូវឲ្យមានការប្រកួតតែ៣លើក ហើយបើចាញ់២លើកគឺហាលអាវដោយស្វ័យប្រវត្តិ ។ កីឡាករឆាយ មាស ត្រូវការឈ្នះដាច់ខាត ដើម្បីប្រទាញយកឱកាសបោះជំហានទៅដណ្ដើមពានជើងឯក និងប្រាក់លាននៅក្នុងព្រឹត្តិការណ៍ ។
ការប្រកួតលើកនេះ ឌុម កែវដា នៅតែមានសង្ឃឹមជាង ដោយសារតែការប្រកួតលើកមុនគេឈ្នះគីឡាករថៃឈ្មោះ Pich Phanom ហើយមាន៣ពិន្ទុនៅក្នុងដៃរួចទៅហើយ ។ ការប្រកួតលើកនេះ ទាំងអ្នកមានពិន្ទុច្រើនរួចស្រេច និងអ្នកទើបមានពិន្ទុ១ក្នុងដៃសុទ្ធតែសំខាន់ដូចគ្នា ដ្បិតកីឡាករឌុម កែវដា បើបណ្ដោយឲ្យចាញ់សម្រាប់ការប្រកួតថ្ងៃស្អែក គឺមិនខុសពីចោលឱកាសសម្រាប់វគ្គខ្វែងនោះឡើយ ក្នុងពេលកីឡាករមួយគូទៀតក៏ប្រឹងដណ្ដើមគ្នាយកពិន្ទុដើម្បីឆ្គងវគ្គខ្វែងពូលដូចគ្នា ។
ឌុម កែវដា និង ឆាយ មាស មិនដែលប៉ះគ្នានោះទេ ប៉ុន្តែអ្នកទាំងពីរស្ថិតនៅលើចំណាត់ថ្នាក់ក្នុងប្រភេទទម្ងន់៦៣,៥គីឡូក្រាម ដែលមានថ្វៃដៃល្អដូចគ្នា ។ ឌុម កែវដា ទើបតែមានតែមជាងត្រង់គេបានឈ្នះកីឡាករថៃ ហើយមាន៣ពិន្ទុនាំមុខមុនប៉ុណ្ណោះ ប៉ុន្តែបើឌុម កែវដា ប៉ះជាមួយសេក គឹមរួនមុន ក៏ប្រហែលជាមានលទ្ធផលបានតែ១ពិន្ទុដូចគ្នាផងដែរ ដោយសារតែសេក គឹមរួន មានកម្រិតវាយល្អខ្ពស់ជាង ។ ការប្រកួតរបស់អ្នកទាំងពីរបើឆាយ មាស ចាញ់ នោះឌុម កែវដា ឡើងដោយស្វ័យប្រវត្តិ ប៉ុន្តែចាញ់នោះគឺត្រូវចាំអ៊ុតមើលលទ្ធផលរវាងកីឡាករសេក គឹមរួន និងកីឡាករថៃសិនទើបអាចសម្រេចបាន ។
ក្រុមអ្នកស្នេហាកីឡាប្រដាល់បានអះអាងថា ការប្រកួតថ្ងៃស្អែកកីឡាករសេក គឹមរួន នឹងស៊ីថៃដូចគ្នានឹងឌុម កែវដា អញ្ចឹងបើឆាយ មាស ឈ្នះ គឺមានន័យថាឌុម កែវដា នឹងប្រឈមធ្លាក់ច្រើន ដោយសារតែឆាយ មាសនៅពេលប៉ះថៃ គឺពិតជាស៊ីថៃដូចគ្នា។ សេក គឹមរួនបើទោះជាមានតែ៣ពិន្ទុនៅឡើយ ប៉ុន្តែក្ដីសង្ឃឹមរបស់គេមានច្រើន ដោយផ្អែកថាកីឡាករថៃមានកម្រិតវាយមិនទាន់ល្អនៅឡើយ ដែលពិតជាធ្វើឲ្យសេក គឹមរួនបាន៣ពិន្ទុបន្ថែមទៀតនៅល្ងាចស្អែក លើកលែងតែកីឡាកររូបនេះ ភ្លាត់ឲ្យថៃស៊ីយកបាន៣ពិន្ទុប៉ុណ្ណោះ ។ ឆាយ មាស បើឈ្នះគេគ្រាន់តែផ្ដួលកីឡាករថៃឲ្យសន្លប់ក្នុងទឹកណាមួយគឺជាការស្រេច ។
ផ្ទុយទៅវិញ ឌុម កែវដា បើចាញ់លើកនេះ គឺមានន័យថាសម្រាប់ការប្រកួតជាមួយសេក គឹមរួន គឺគេមិនអាចទៅរួចនោះឡើយ ដោយសារតែសេក គឹមរួន ពិតជាមិនអាចបណ្ដោយឲ្យចាញ់ នាំឲ្យមានពិន្ទុ៧ស្មើគ្នា ហើយត្រូវប្រទាញប្រទង់ឱកាសឡើងវគ្គខ្វែងនោះទេ ។ ក្រុមអ្នកវិភាគយល់ឃើញថា សេក គឹមរួន ល្ងាចខានស្អែកនឹងឈ្នះសម្រាប់ការប្រកួតលើកទី២ ចំណែកឌុម កែវដា និងឆាយ មាស បើអ្នកណាចាញ់លើកនេះ គឺប្រឈមធ្លាក់ហើយ ទើបការប៉ះគ្នារបស់ពួកគេគឺអ្នកណាក៏ត្រូវការឈ្នះ ដែលមានន័យថាការប្រកួតដែលបានធ្វើឡើងគឺពិតជាប្រឹងអស់សមត្ថភាព ។
គួរបញ្ជាក់ផងដែរព្រឹត្តិការណ៍ដណ្ដើមជើងឯកនេះ មានកីឡាករមកពីក្លិបផ្សេងៗនៅកម្ពុជាចំនួន៦រូប និងកីឡាករថៃមកពីក្លិបផ្សេងដូចគ្នាចំនួន២រូប ។ អ្នកទាំង៨ចែកគ្នាជា៤នាក់ក្នុងមួយពូល ដោយកីឡាករថៃម្នាក់ត្រូវស្ថិតនៅក្នុងពូលមួយ ។ សម្រាប់ពូលA រូមមានឌុម កែវដា, Pich Phanom (ជនជាតិថៃ) សេក គឹមរួន មកពីក្លិបអង្គរមានជ័យខេត្តសៀមរាប និងកីឡាករឆាយ មាស ។ សម្រាប់ពូលB រួមមានកីឡាករ សុខ សុវណ្ណ មកពីសមាគមកីឡាប្រដាល់ក្រសួងការពារជាតិ កីឡាករ Yort Sing ជាជនជាតិថៃ កីឡាករ រឿង សារ័ត្ន មកពីក្លិបកងពលតូចទ័ពឆត្រយោង៩១១ និងម៉ន ចាន់ដារ៉ា មកពីក្លិបការិយាល័យទី៥កងទ័ពជើងគោក ។
មិនខុសពីកីឡាករឆាយ មាស និងឌុម កែវដានោះដែរ កីឡាករ កន ចន្ថា មកពីក្លិបកងពលធំអន្តរាគមន៍លេខ២ និងកីឡាករឈិន ក្វាន់ង៉ុយ មកពីក្លិបមកុដរាជសីហ៍ឯណេះវិញ ក៏ត្រូវការឈ្នះគ្នាដាច់ខាតផងដែរ នៅក្នុងការប្រកួតពេលព្រឹកថ្ងៃអាទិត្យ ទី២៧ ធ្នូ របស់ស្ថានីយទូរទស្សន៍អាស៊ីអាគ្នេយ៍ ។ អ្នកទាំងពីរមិនដែលប៉ះគ្នានោះឡើយ ក្រោយពីបានឈរជើងធ្វើជាកីឡាករល្បីឈ្មោះរៀងខ្លួន។ ឈិន ក្វាន់ង៉ុយ មានផ្លែល្អជាង ប៉ុន្តែកីឡាកររូបនេះច្រើនមិនសូវឆ្លាត និងមិនសូវសំបូរល្បិច ទើបពិបាកព្យាករណ៍លទ្ធផលសម្រាប់គូនេះ។ អ្នកគាំទ្រហាក់មិនសូវទុកចិត្តឈិន ក្វាន់ង៉ុយនោះទេ ដោយផ្អែកថាកន ចន្ថា មានចិត្តតស៊ូ និងមុតស្រួចជាង ។
យ៉ាងណាមិញ កីឡាករទាំងពីរសម្រាប់អ្នកចាញ់គឺនឹងត្រូវបាក់មុខសម្បើមណាស់នៅលើសង្វៀន ទើបទាំងកន ចន្ថា និងឈិន ក្វាន់ង៉ុយ គឺពិតជាត្រូវការឈ្នះដើម្បីរក្សាស្ថេរភាពអាជីព ខណៈដែលឈិន ក្វាន់ង៉ុយ ហាក់មានក្រេឌីតល្អជាងត្រង់កម្ពស់ ។
សម្រាប់កីឡាករទាំង៤រូបនេះ មានតែលទ្ធផលចុងក្រោយនៅលើសង្វៀនរបស់ស្ថានីយទូរទស្សន៍ប៉ុស្ដិ៍លេខ៥ នៅល្ងាចថ្ងៃសៅរ៍ និងព្រឹកថ្ងៃអាទិត្យខានស្អែកប៉ុណ្ណោះ ទើបអាចដឹងថាអ្នកណាទៅមុខ ឬថយក្រោយក្នុងក្រសែភ្នែករបស់អ្នកគាំទ្រ ។ ចាំមើលមើល៍តើឆាយ មាស យកបាន៣ពិន្ទុ ឬឌុម កែវដា ហើយរវាងឈិន ក្វាន់ង៉ុយ និងកន ចន្ថា ដែលសុទ្ធតែជាជើងល្អ តើអ្នកណាឈ្នះ?
ចែករំលែកព័តមាននេះ