- ភ្នំពេញ
ភ្នំពេញ៖ នៅពេលប្រទេសយើង ចាក់វ៉ាក់សាំងបង្ការជំងឺកូវីដ១៩ បានច្រើន ពោលគឺមនុស្សពេញវ័យ អាយុចាប់ពី ១៨ឆ្នាំឡើងទៅ ចាក់ឲ្យបានគ្រប់គ្នា ដែលតាមការប៉ាន់ប្រមាណ មានចំនួន…
ភ្នំពេញ៖ នៅពេលប្រទេសយើង ចាក់វ៉ាក់សាំងបង្ការជំងឺកូវីដ១៩ បានច្រើន ពោលគឺមនុស្សពេញវ័យ អាយុចាប់ពី ១៨ឆ្នាំឡើងទៅ ចាក់ឲ្យបានគ្រប់គ្នា ដែលតាមការប៉ាន់ប្រមាណ មានចំនួន ១០លាននាក់ ហើយកុមារ និងយុវជន អាយុចាប់ពី ១២ឆ្នាំ ដល់ ១៧ឆ្នាំ មានប្រមាណ ២លាននាក់ទៀតនោះ កម្ពុជាយើង នឹងមានភាពស៊ាំនៅសហគមន៍កាន់តែច្រើន ហើយអ្វីៗ អាចនឹងបើកដំណើរការឡើងវិញ រាប់ទាំងសាលារៀនផងដែរ។
កាលពីយប់ថ្ងៃទី២៣ ខែកក្កដា ឆ្នាំ២០២១ ក្នុងពេលទទួលជំនួយវ៉ាក់សាំងជប៉ុន ប្រមុខរាជរដ្ឋាភិបាលកម្ពុជា បានប្រកាសបើកយុទ្ធនាការចាក់វ៉ាក់សាំងដល់កុមារ និងយុវវ័យ អាយុ ១២ឆ្នាំ ដល់ ១៧ឆ្នាំ ដែលនឹងចាប់ផ្តើម នៅព្រឹកថ្ងៃអាទិត្យ ទី១ ខែសីហា ឆ្នាំ២០២១។ យុទ្ធនាការនេះ នឹងចាប់ផ្តើមមុនគេ នៅរាជធានីភ្នំពេញ ដោយសម្តេចនាយករដ្ឋមន្ត្រី ហ៊ុន សែន នឹងអញ្ជើញជាអធិបតីភាព បើកយុទ្ធនាការនេះ នៅមន្ទីរពេទ្យកាល់ម៉ែត ព្រមទាំងនឹងនាំចៅៗរបស់សម្តេច ដែលមានអាយុចាប់ពី ១២ឆ្នាំឡើងទៅ ទៅទទួលវ៉ាក់សាំង ជាមួយនឹងកូនចៅមន្ត្រីជាន់ខ្ពស់ជាច្រើនផ្សេងទៀត។
ដោយសារតែការឆ្លងរាលដាលជំងឺកូវីដ ចាប់តាំងដើមឆ្នាំ២០២០ សាលារៀនទាំងអស់ ត្រូវបានបិទទ្វារដំបូង។ ក្រោយមក ក៏បើកវិញរប៉េះរប៉ោះ រហូតដល់សិស្ស មិនអាចប្រឡងឌីប្លូម និងប្រឡងបាក់ឌុប បានពេញលេញឡើយ ខណៈការរៀនសូត្រតាមប្រព័ន្ធអ៊ិនធឺណេត និងរៀនតាមទូរទស្សន៍ជាតិ ពីចម្ងាយ ក៏មិនសូវជាបានដិតដល់។
ចូលដល់ឆ្នាំសិក្សាថ្មី ឆ្នាំ២០២០-២០២១ កូវីដ ក៏នៅតែបន្តយាយីសាលារៀន និងឆ្លងរាលដាលប្រជាពលរដ្ឋខ្លាំងជាងមុន ដោយឆ្លងចូលសហគមន៍ដំបូងគេ គឺព្រឹត្តិការណ៍ថ្ងៃ ៣វិច្ឆិកា ឆ្លងតិចតួច ត្រឹមតែ ៤នាក់ ជាថ្នាក់ដឹកនាំកំពូល នៅក្រោយដំណើរទស្សនកិច្ចរបស់រដ្ឋមន្ត្រីការបរទេសហុងគ្រី។ បន្ទាប់មក ក៏កើតមានព្រឹត្តិការណ៍ឆ្លងសហគមន៍ ២៨វិច្ឆិកា ឆ្លងច្រើនជាងមុន រហូតដល់ ៤១នាក់ ហើយមានអ្នកពាក់ព័ន្ធច្រើនរាប់ពាន់នាក់ មិនត្រឹមតែនៅភ្នំពេញ និងថ្នាក់ដឹកនាំកំពូលទេ ក៏រាលដាលដល់បណ្តាខេត្តមួយចំនួនទៀត។ តែព្រឹត្តិការណ៍សហគមន៍ទាំង ២នោះ បញ្ចប់ទៅឆាប់រហ័ស ហើយសាលារៀន ក៏បិទតែមួយរយៈពេលនៃការឆ្លងរាលដាលប៉ុណ្ណោះ។
យ៉ាងណាក៏ដោយ ចុងក្រោយនេះ ចូលដល់ព្រឹត្តិការណ៍សហគមន៍ ២០កុម្ភៈ ឆ្លងរាលដាលធ្ងន់ធ្ងរ ដោយដំបូងផ្តើមចេញពីសហគមន៍ចិន នៅភ្នំពេញ ក្រោយមកក៏រាលដាលដល់ខេត្តព្រះសីហនុ រួមទាំងបណ្តាខេត្តជាច្រើន រហូតដល់ទូទាំងប្រទេស ហើយអូសបន្លាយមកដល់សព្វថ្ងៃ។ មានអ្នកឆ្លងមួយថ្ងៃៗរាប់រយនាក់ ហើយក៏មានអ្នកស្លាប់ដោយសារកូវីដ ចាប់ពីថ្ងៃទី១១ ខែមីនា ឆ្នាំ២០២១ រហូតដល់ថ្ងៃទី២៥ ខែកក្កដា ឆ្នាំ២០២១ អ្នកស្លាប់កើនឡើង ដល់ ១៣០៥នាក់។ រីឯករណីឆ្លងកូវីដ សរុប ៧៣៧០១នាក់ ដែលក្នុងនោះ មានអ្នកជាសះស្បើយ ៦៥៩៥០នាក់ គិតត្រឹមថ្ងៃទី២៥កក្កដា។
យ៉ាងណាក៏ដោយ ក្នុងអំឡុងពេលកូវីដឆ្លងរាលដាលខ្លាំង ហើយសាលារៀន ត្រូវបិទទ្វារ រហូតដល់បិទប្រទេស រាជធានីខេត្តមួយរយៈផងកាលពីខែមេសា ជាដើមនោះ គឺសិស្សានុសិស្ស មិនថា សាលារៀនរដ្ឋ ឬសាលឯកជន ចាប់ពីថ្នាក់មតេយ្យ រហូតដល់មហាវិទ្យាល័យ សាកលវិទ្យាល័យ ត្រូវរៀនតាមអនឡាញ។ រៀនតាមអនឡាញ ដែលជួបផលលំបាកយ៉ាងច្រើន មានជាអាទិ៍ គឺមិនថា ថ្នាក់តូចៗ ដល់មហាវិទ្យាល័យ ទាំងសិស្ស ទាំងគ្រូ មានបញ្ហាអ៊ីនធើណែតរអាក់រអួល ហើយក៏ចំណាយច្រើនជាងមុន ឧបករណ៍សម្ភារៈសិក្សាក៏ជួបបញ្ហា ពិសេសសិស្សនៅតាមខេត្ត និងជនបទ។ ក្នុងនោះ គុណភាពសិក្សារបស់សិស្ស គឺបាត់សឹងតែលើស ៥០ភាគរយ។ សិស្សខ្លះ ចូលរៀន យកតែវត្តមានទេ។ និស្សិត នៅមហាវិទ្យាល័យ រៀនតាម Microsoft team ហើយសិស្សតូចៗ រៀនតាម zoom និងតាមតេឡេក្រាម។
គ្រូៗ ក៏ត្អូញត្អែរថា សិស្សមិនសូវចេះ ពេលរៀនតាមអនឡាញ។ រីឯឪពុកម្តាយវិញ រអ៊ូរឿងអស់លុយច្រើន ដោយចំណាយទិញឧបករណ៍ ដូចជា ទូរសព្ទ iPad បង់ថ្លៃអ៊ីនធើណែត ឬក៏ត្រូវភ្ជាប់ Wifi ជាដើម។ ថ្លៃសាលា ក៏មិនចុះ ហើយបើចុះ ក៏ចុះតិចតួច។ កូនៗមួយចំនួន រៀនៗ មើលតែយូធូប និងញៀននឹងលេងហ្គេម ក៏មាន។ សាលាឯកជនជាច្រើន ពិសេសសាលារៀនអង់គ្លេស និងចំណេះទូទៅ សម្រាប់កុមារ ក៏បានបិទទ្វារ។
និយាយដូច្នេះ មិនមែនថា អំឡុងពេលកូវីដនេះ សិស្សរៀនពីចម្ងាយ តាមប្រព័ន្ធអនឡាញ មិនបានផលអ្វីទាំងស្រុងនោះទេ។ យ៉ាងហោចណាស់ ក៏យើងអាចប្រើប្រាស់ប្រព័ន្ធបច្ចេកវិទ្យាព័ត៌មាន ក្នុងវិស័យអប់រំយើង ដែលជាផែនការរបស់ក្រសួងអប់រំ ហើយនៅប្រទេសជឿនលឿន បានអនុវត្តរួចមកហើយ។ ក្នុងនោះ ក៏មានសិស្ស និស្សិតច្រើនទៀត រៀនចេះ ហើយក៏ប្រឡងជាប់។ សំខាន់ទៀតនោះ យើងអាចការពារសិស្សនិស្សិតយើងពីកូវីដ ហើយចូរកុំភ្លេចថា រហូតដល់ពេលនេះ កូវីដ មិនទាន់ឆ្លងចូលសាលារៀនណាមួយនៅឡើយទេ។ កន្លងមក មានតែគ្រូ ឬក៏សិស្សប៉ុន្មាននាក់ ឆ្លងកូវីដ ជាលក្ខណៈបុគ្គល ហើយក៏ឆ្លងនៅក្រៅសាលារៀនដែរ។
ជាសរុបមក នៅពេលនេះ សម្តេចតេជោ ហ៊ុន សែន បានប្រកាសរួចហើយថា ទោះបីតម្លៃណាក៏ដោយ កម្ពុជាត្រូវតែចាក់វ៉ាក់សាំងការពារកូវីដ១៩ ជូនប្រជាពលរដ្ឋ ឲ្យបានជោគជ័យ។ ក្នុងនោះ គឺសម្តេច គ្រោងនឹងចាក់វ៉ាក់សាំង ឲ្យបានដល់ ១៣លាននាក់ ដែលស្មើនឹងជាង ៨០% នៃប្រជាជនកម្ពុជា សរុប ១៦លាននាក់។
សម្រាប់កុមារ និងយុវវ័យ អាយុ ១២ឆ្នាំ ដល់ ១៧ឆ្នាំ ដែលត្រូវចាក់វ៉ាក់សាំងបង្ការជំងឺកូវីដ១៩ នៅទូទាំងប្រទេស ត្រូវបានប្រកាសថា មានប្រមាណ ២លាននាក់។ ក្នុងនោះ នៅភ្នំពេញ មានជាង ២៨ម៉ឺននាក់។
គិតត្រឹមថ្ងៃទី២៦ ខែកក្កដា ឆ្នាំ២០២១ សម្រាប់មនុស្សពេញវ័យ អាយុចាប់ពី ១៨ឆ្នាំឡើងទៅ នៅទូទាំងប្រទេស ចាក់វ៉ាក់សាំង បានចំនួន ៦ ៨៣៩ ១០៩នាក់ ស្មើនឹង ៦៨,៣៩% នៃចំនួនគោលដៅ ដែលត្រូវចាក់វ៉ាក់សាំង ចំនួន ១០លាននាក់។
តាមផែនការ នៅខែសីហា និងខែកញ្ញា វ៉ាក់សាំង ៥លានដូស សម្រាប់ចាក់ឲ្យកុមារ និងយុវវ័យ នឹងមកដល់កម្ពុជាយើង ខណៈដែលវ៉ាក់សាំង សម្រាប់មនុស្សពេញវ័យ នឹងមកដល់គ្រប់ចំនួន ២០លានដូស នៅត្រឹមខែសីហា។ ក្នុងនោះ តាមគម្រោងយ៉ាងយូរ ត្រឹមខែតុលា ឆ្នាំ២០២១នេះ កម្ពុជាយើង នឹងសម្រេចផែនការចាក់វ៉ាក់សាំងដល់មនុស្ស ១០លាននាក់ហើយ។
ដូច្នេះ នៅពេលដែលយើងអាចចាក់វ៉ាក់សាំង សម្រេចតាមផែនការ ទាំងមនុស្សពេញវ័យ និងទាំងកុមារឲ្យបានរហូតដល់ជាង ៨០%នៃប្រជាជនសរុប ១៦លាននាក់ ពេលនោះ យើងនឹងមានភាពស៊ាំកាន់តែខ្ពស់ ហើយអ្វីៗ នឹងបានប្រសើរ ដែលអាចចូលរួមស្រោចស្រង់សង្គមកម្ពុជាយើងឡើងវិញ ចេញពីវិបត្តិកូវីដ។
ប៉ុន្តែទន្ទឹមនឹងនោះ ក្រសួងស្ថាប័នពាក់ព័ន្ធ ពិសេសបុគ្គលគ្រប់រូប ក៏ត្រូវតែបន្តអនុវត្តនូវវិធានការសុខាភិបាល និងរួមគ្នា ប្រយុទ្ធប្រឆាំងជំងឺកូវីដ១៩ បន្តទៀត។ កុំភ្លេចថា ចាក់វ៉ាក់សាំងរួចហើយ ២ដូសក្តី ឬ ៣ដូសក្តី ក៏នៅតែអាចឆ្លងកូវីដ បើសិនជាយើងម្នាក់ៗ ធ្វេសប្រហែសតែបន្តិច។ ពាក់ម៉ាស លាងសម្អាតដៃឲ្យញឹកញាប់ និងរក្សាគម្លាតសុវត្ថិភាព ពិសេសបន្តកុំទាន់ជួបជុំគ្នាច្រើន ជាវិធីល្អបំផុត ដើម្បីកុំឲ្យឆ្លងកូវីដ៕
ចែករំលែកព័តមាននេះ