រាជធានីភ្នំពេញ ៖ ពេញមួយឆ្នាំ២០១៥នេះ គេចាប់អារម្មណ៍ថាមានកីឡាករកីឡាការិនីល្បីឈ្មោះមួយចំនួនបានរអិលធ្លាក់លេខពីល្បីសុសសាយមកបាត់ទីផ្សារ ឬអស់ប្រជាប្រិយភាព ។ ក្នុងចំណោមជើងខ្លាំងធ្លាក់កូដទាំងនោះ
រាជធានីភ្នំពេញ ៖ ពេញមួយឆ្នាំ២០១៥នេះ គេចាប់អារម្មណ៍ថាមានកីឡាករកីឡាការិនីល្បីឈ្មោះមួយចំនួនបានរអិលធ្លាក់លេខពីល្បីសុសសាយមកបាត់ទីផ្សារ ឬអស់ប្រជាប្រិយភាព ។ ក្នុងចំណោមជើងខ្លាំងធ្លាក់កូដទាំងនោះ កីឡាករកីឡាការិនីលេចធ្លោ៤រូបខាងក្រោមនេះបានឈានដល់ដំណាក់កាលស៊យ ដោយសារតែអាជីពរបស់ពួកគេត្រូវបានផ្កាប់ចោលនៅក្នុងឆ្នាំនេះតែម្ដង ។
វ៉ន វីវ៉ា ៖ គ្មានអ្នកណាមិនដឹងនោះទេថា កីឡាកររូបនេះ គឺជាជើងខ្លាំងមួយរូបនៅក្នុងពិភពប្រដាល់ ។ កេរ្តិ៍ឈ្មោះរបស់លោកត្រូវគេឃើញស្ទុះឡើងកាន់តែខ្លាំងក្រោយពេលផ្ទុះជម្លោះជាមួយកីឡាករសេន ប៊ុនថេន កាលពីដំណាច់ឆ្នាំ២០១៤ និងក្រោយពីមានដំណឹងរៀបការជាមួយអតីតកីឡាការិនីស៊ន ដាវីន ធ្វើឱ្យមានការតាមដានកាន់តែច្រើនផ្អើលអស់មហាជននៅក្នុងឆ្នាំនេះ ។ ជីវិតក្រៅសង្វៀនរបស់គេទទួលបានការចាប់អារម្មណ៍យ៉ាងខ្លាំង ហើយក៏មានភាពហ៊ឺហាណាស់ដែរ ក្រោមចំហាយក្លាយជាសមាជិកគ្រួសារកញ្ញា ស៊ន សៀវម៉ី នៅក្នុងឆ្នាំនេះ ។ ប៉ុន្តែទន្ទឹមនឹងការឡើងកូដ កីឡាករវ៉ន វីវ៉ា ក៏ជំពប់រឿងស៊យរហូតដល់សម្រេចចិត្តបោះបង់អាជីពក្នុងឆ្នាំ២០១៥នេះដូចគ្នា។
កាលពីថ្ងៃទី២១ មិថុនា ២០១៥ លោកភ្លាត់បណ្ដាលឱ្យបាក់ឆ្អឹងដៃធ្ងន់ធ្ងរក្នុងការប្រកួតជាមួយកីឡាករស៊ុយអែត ហើយត្រូវគ្រូពេទ្យប្រកាសមិនឱ្យឡើងប្រកួតបន្តទៀតដោយមិនមានការកំណត់ ។ ម្ដាយក្មេករបស់កីឡាកររូបនេះបានអះអាងថា វ៉ន វីវ៉ា នឹងឈប់ប្រឡូកការប្រដាល់រហូត បើទោះជាគេអាចជាដៃបាក់១០០% ក្រោយការវះកាត់ ។ ការបញ្ជាក់មួយនេះស្របគ្នាទាំងស្រុងនឹងការប្រកាសរបស់អ្នកនាងស៊ន ដាវីន ជាភរិយា ដែលចង់ឱ្យ វ៉ន វីវ៉ា បោះបង់មហិច្ឆតាឡើងប្រដាល់ ស្របគ្នាដែលវ៉ន វីវ៉ា ក៏មានអារម្មណ៍នឿយណាយក្រោយពីមានការរិះគន់ និងវាយប្រហារយ៉ាងចាស់ដៃនៅលើបណ្ដាញហ្វេសប៊ុករហូតបណ្ដាលឱ្យលោកត្រូវតែសុំដកខ្លួននោះ ។
វ៉ន វីវ៉ា ធ្លាប់បានថ្លែងប្រាប់ឱ្យដឹងថា ស្ថានភាពនឿយហត់ និងការគេចចេញពីការបំបាក់ទឹកចិត្ត គឺជាហេតុផលដែលធ្វើឱ្យលោកលែងចង់ប្រដាល់ បើទោះជាដៃរបស់លោកអាចត្រឡប់មកវាយតប់ដូចដើម។ ទន្ទឹមនឹងការបាត់បង់អាជីពបណ្ដាលមកពីបាក់ដៃដែលមហាជនបានកត់សម្គាល់ថាជារឿងស៊យដ៏កម្រ កីឡាកររូបនេះក៏ត្រូវគេអះអាងថាបានប្រកាសលក់ដី និងលក់បន្ទប់ជួលដែលទើបសាងសង់រួចគួរឱ្យកត់សម្គាល់ផងដែរ ។
ប្រភពពីអ្នកភូមិក្រាំងធ្នុង ក្នុងសង្កាត់សែនសុខ រាជធានីភ្នំពេញ ជាទីដែលវ៉ន វីវ៉ា ប្រកាសលក់ដី និងធ្វើបន្ទប់ជួលបានអះអាងថា វ៉ន វីវ៉ា បានប្រកាសលក់ដីទំនេរទំហំ១០ម៉ែត្រគុណ១៧ម៉ែត្រ និងលក់អគារបន្ទប់ជួល២០បន្ទប់លើដីទំហំ៨គុណ នឹង២៣ម៉ែត្រនៅទីនោះយូរមកហើយ ប៉ុន្តែមិនមានអ្នកណាត្រូវចិត្តនៅឡើយទេ ។ មានការបញ្ជាក់ថា លោក និងភរិយាត្រូវការប្រាក់ដើម្បីទិញផ្ទះថ្មី និងបើកអាជីពថ្មីទើបប្រកាសលក់ដីតម្លៃ២៣.០០០ដុល្លារ និងលក់ផ្ទះជួលតម្លៃជាង៥ម៉ឺនដុល្លារដែលលក់មិនទាន់ដាច់នៅឡើយ នៅក្នុងឆ្នាំស៊យនេះ។
សេន ប៊ុនថេន ៖ គូជម្លោះពាក្យសម្ដីដ៏រសើបរបស់លោកវ៉ន វីវ៉ា រូបនេះ ក៏ត្រូវគេមើលឃើញថាបានបោះបង់អាជីពដែលធ្លាប់ល្បីឈ្មោះ ដោយសារប្រដាល់ក្នុងឆ្នាំ២០១៥នេះដែរ ។ តាំងពីដើមឆ្នាំរហូតមកដល់ពេលនេះ លោកមិនមានការប្រកួតសូម្បីតែមួយប្រកួត ដោយគេចាត់ទុកឆ្នាំនេះក៏ជាឆ្នាំស៊យរបស់ សេន ប៊ុនថេន ផងដែរ ។ អ្នកនាង ខាន់ សោភ័ណ្ឌ ភរិយារបស់លោកបានអះអាងថា ការដើរចេញពីពិភពគុនរបស់ស្វាមី មិនមានន័យថាលោកបោះចោលអាជីពប្រដាល់រហូតនោះទេ គឺគ្រាន់តែចង់សម្រាកមួយឆ្នាំ ហើយអាចបង្ហាញខ្លួនជាថ្មីវិញនៅឆ្នាំ២០១៦ ខាងមុខប៉ុណ្ណោះ ។
ទោះបីយ៉ាងណា គេមើលឃើញថា ទោះជាត្រូវសម្រេចចិត្តចូលវិញ ក៏ទំនងមិនអាចជួយឲ្យកីឡាកររូបនេះមាននិរន្តរភាពល្បីឈ្មោះបានយូរអង្វែងនោះដែរ ដោយសារតែវត្តមានរបស់កីឡាករក្មេងៗមានកាន់តែច្រើន ហើយសមត្ថភាពរបស់ សេន ប៊ុនថេន ក៏ពិតជាមានការប្រែប្រួលផ្អែកតាមវ័យជាក់ស្ដែង ។ អ្នកនាងខាន់ សោភ័ណ្ឌ បានថ្លែងប្រាប់ថា ពេញមួយឆ្នាំ២០១៥ ស្ថានភាពហើមសាច់ដុំជើង និងការវាយប្រហារនៅលើបណ្ដាញហ្វេសប៊ុក គឺជាមូលហេតុធ្វើឲ្យស្វាមីមិនព្រមទទួលយកការប្រកួត ហើយក៏ជាឆ្នាំដែលស្វាមីត្រូវធ្លាក់កាលីបបើធៀបនឹងភាពខ្ទរខ្ទារមុនឆ្នាំ២០១៥ផងដែរ ។ យ៉ាងណាក៏ដោយ លោកក៏បានការងារជាអ្នកបង្ហាត់សិស្ស និងបានថតកុនរាយរងតិចតួចផងដែរ បើទោះមិនអាចធៀបនឹងឱកាសឡើងរេញដែលក្រៅពីរកលុយបាន ក៏មានអ្នកគាំទ្រលើសលប់នោះ ។
កីឡាករសេន ប៊ុនថេន បានអះអាងថា លោកចង់ឡើងប្រដាល់នៅឆ្នាំ២០១៦ឡើងវិញ ដើម្បីរកលុយទិញផ្ទះបង់រំលស់រស់នៅឱ្យបានសមរម្យ ប៉ុន្តែលោកហាក់មិនបានកំណត់ពីកាលបរិច្ឆេទ និងនៅស្ទាក់ស្ទើរចិត្តនៅឡើយភ័យខ្លាចឡើងប្រដាល់មិនបានជោគជ័យ ហើយត្រូវយកឈ្មោះមកចោលនៅលើរេញ ។ អ៊ីចឹងហើយទើបគេមើលឃើញថា ស្ថានភាពរបស់លោកគឺទោះជានៅចង់បន្តការប្រដាល់ ក៏មិនខុសពីបោះបង់ទាំងស្រុងនោះដែរ ដោយសារតែឆ្នាំ២០១៥ធ្វើឱ្យលោកធ្លាក់កូដពេញបន្ទុកពីការគាំទ្រ ។
ស៊ន ដាវីន៖ អតីតកីឡាការិនីតេក្វាន់ដូរូបនេះ ក៏បោះបង់អាជីពគួរឱ្យភ្ញាក់ផ្អើលផងដែរនៅក្នុងឆ្នាំ២០១៥ដូចគ្នា ។ ឆ្លងកាត់ព្យុះភ្លៀងរាប់មិនអស់នាពេលអតីតកាល គឺមានតែក្នុងឆ្នាំ២០១៥នេះប៉ុណ្ណោះ ដែលធ្វើឲ្យនាងទ្រាំទ្រសម្ពាធព្យុះភ្លៀងមិនបាន ហើយត្រូវតែសម្រេចចិត្តបោះបង់អាជីពដោយមិនស្ដាយស្រណោះ។ នាងបានដាក់ពាក្យលាឈប់ពីកីឡាការិនីតេក្វាន់ដូ កាលពីខែសីហាពាក់កណ្ដាលឆ្នាំ បន្ទាប់ពីរងសម្ពាធផ្លូវចិត្តក្រោមការរិះគន់នៅពេលការប្រកួតបន្តបន្ទាប់របស់នាងមិនបានជោគជ័យ និងស្របគ្នាដែលមានការប៉ះទង្គិចផ្លូវចិត្តពីគូប្រជែងដែលសើចចំអកឡកឡាយឱ្យទៀតផងនោះ ។
នាងបានសម្រេចចិត្តមកធ្វើជាគ្រូកីឡាតែមួយមុខនៅវិទ្យាល័យឫស្សីកែវ និងយកពេលរកលុយពីការបង្ហាត់សិស្សនៅក្នុងក្លិបតេក្វាន់ដូរបស់គ្រួសារនៅក្នុងវិទ្យាល័យឫស្សីកែវវិញ ។ នាងបានប្រកាសដោយពេញៗមាត់ លាឈប់ការប្រកួត និងឈប់បន្តអាជីពជាកីឡាការិនីទៀតហើយ បើទោះជាកីឡាដែលនាងធ្លាប់ប្រឡូកធ្លាប់ជួយឱ្យនាងមានថ្ងៃនេះក្ដី។
ហ៊ុន ឈុនហេង ៖ លោកគឺជាកីឡាករល្បីឈ្មោះក្នុងចំណោមអ្នកទាំង៤ដែលបានសម្រេចចិត្តបោះបង់អាជីពក្នុងឆ្នាំ២០១៥នេះដូចគ្នា ដោយសារតែស៊យជួបរឿងគ្រោះថ្នាក់ បណ្ដាលឱ្យបាក់ជើងកម្រិតធ្ងន់ ។ ធៀបនឹងជើងខ្លាំងខាងលើ លោកគឺជាសមាសភាពកីឡាករដែលស្ទុះឡើងកូដហើយមានអនាគតវែងឆ្ងាយនៅក្នុងអាជីពកីឡានេះជាងគេ ប៉ុន្តែស្ថានភាពជំងឺបានរុញឱ្យលោកប្រែក្លាយពីកីឡាករទទួលបានទីផ្សារគគ្រឹកគគ្រេងទៅជាពិការមិនគួរឱ្យជឿ ។
លោកត្រូវរថយន្តបុកពេញទំហឹង កាលពីថ្ងៃទី១៥ ខែវិច្ឆិកា ដោយភាគីខាងអ្នកបង្កហេតុមិនព្រមបង់សំណងឱ្យបានសមរម្យនោះផង បើទោះជាលោកត្រូវគេដឹងថាបានបញ្ចប់អាជីពក្នុងពេលឡើងកូដទាំងគួរឱ្យសោកស្ដាយ ។ ធៀបនឹងកីឡាករខាងលើ ឆ្នាំ២០១៥ គឺជាឆ្នាំស៊យបំផុតរបស់ហ៊ុន ឈុនហេង ក៏ជាឆ្នាំដែលធ្វើឱ្យគេស្គាល់លោកកាន់តែច្បាស់ផងដែរ តាមរយៈការចុះផ្សាយពីគ្រោះថ្នាក់របស់លោកបណ្ដាលឱ្យលោកបាត់បង់តំណែងជាកីឡាករ និងបាត់ទាំងឱកាសរកប្រាក់ពីការប្រកួតអន្តរជាតិដែលមានហាងឆេងតាំងពីដើមឆ្នាំនោះ។ ក្នុងចំណោមកីឡាករទាំង៤រូបដែលស៊យរហូតដល់បាត់បង់អាជីព គេទំនងជាស៊យជាងគេ ដោយសារតែក្រៅពីមានជីវភាពក្រីក្រនៅឡើយ ក៏ត្រូវធ្លាក់ក្នុងភាពពិការដោយមិនដឹងថាបានត្រឡប់មកកាន់អាជីពប្រដាល់រកលុយដូចមុនបានឬមិនបាន ៕
ចែករំលែកព័តមាននេះ