ខេត្តកំពត ៖ ការកសាងនិងអភិវឌ្ឍន៍គ្រប់ហេដ្ឋារចនាសម្ព័ន្ធនៅក្នុងខេត្ត ជាពិសេសសោភ័ណភាពដ៏ល្អក្នុងក្រុងកំពត ក្រោមការចង្អុលដឹកនាំពីសំណាក់លោកខូយ ឃុនហ៊ួរ អភិបាលខេត្ត បច្ចុប្បន្នទីរួមខេត្តកំពតបានប្រែក្លាយពីទីក្រុងចាស់មកជាទីក្រុងថ្មីស័ក្តិសមជាខេត្តទេសចរណ៍ ដែលសព្វថ្ងៃមានភ្ញៀវទេសចរជាតិនិងអន្តរជាតិចាប់អារម្មណ៍យ៉ាងខ្លាំង ។ ប៉ុន្តែទន្ទឹមនឹងការខិតខំប្រឹងប្រែងរបស់អាជ្ញាធរនិងថ្នាក់ដឹកនាំក្នុងខេត្ត ដែលបាននិងកំពុងអភិវឌ្ឍសោភ័ណភាពក្នុងក្រុងទាំងមូលឱ្យមានការប្រែប្រួលមុខមាត់ថ្មីយ៉ាងនេះក្តី ក៏គេឃើញនៅមានក្រុមហ៊ុនឯកជនមួយដែលមានតួនាទីទទួលខុសត្រូវផ្នែកអនាម័យនិងបរិស្ថាន សំអាតក្រុង ហាក់ដូចជាពុំសូវចាប់អារម្មណ៍ពីបញ្ហាប៉ះពាល់ផ្នែកអនាម័យសុខភាពដល់ប្រជាពលរដ្ឋនិងមន្ត្រីរាជការដែលកំពុងបំរើការងារឬហូបអាហារនៅតាមភោជនីយដ្ឋានក្បែរផ្លូវសាធារណៈទេ ។
បញ្ហាដែលបង្កឱ្យមានការរិះគន់នោះ គឺរថយន្តដឹកសំរាមដែលមានក្លិនស្អុយនិងមានរុយរោមដូចឃ្មុំ ហើយដើរប្រមូលសំរាមដោយមិនកំណត់ពេលវេលាឱ្យបានច្បាស់លាស់ ដើម្បីកុំឱ្យប៉ះពាល់ពេលម៉ោងប្រជាពលរដ្ឋ ឬមន្ត្រីរាជការកំពុងធ្វើការឬហូបអាហារ ។ រថយន្តដឹកសំរាមទាំងនោះដើរប្រមូលសំរាមហើយរួចឈប់នៅក្បែរកន្លែងហូបចុករបស់មហាជនទូទៅ ធ្វើឱ្យប៉ះពាល់ផ្នែកអនាម័យសុខភាព ដោយសារជះក្លិនមិនល្អមកលើភ្ញៀវទេសចរដែលកំពុងហូបអាហារ ។
ទាក់ទិននឹងករណីនេះការទូរស័ព្ទទាក់ទងទៅលោកនាក់ សុវណ្ណរី អភិបាលក្រុងកំពត ដើម្បីសុំការបំភ្លឺជុំវិញការគ្រប់គ្រងរបស់ក្រុមហ៊ុនអនាម័យសំអាតក្រុងមិនទទួលបានលទ្ធផលទេដោយលោកប្រាប់ថា ជាប់ប្រជុំ ។
មានការលើកឡើងថា ការប្រមូលសំរាមនៅតាមផ្ទះ តាមភោជនីយដ្ឋាន ឬទីសាធារណៈ គួរតែអ្នកគ្រប់គ្រងរបស់ក្រុមហ៊ុនចេះលៃលកពេលវេលាក្នុងការប្រមូលនិងដឹកចេញកុំឱ្យប៉ះពាល់ដល់មហាជនក្នុងពេលម៉ោងធ្វើការឬស្រស់ស្រូបអាហារនៅពេលព្រឹក ហើយនេះជាសំណូមពរដ៏ទទូចរបស់មន្ត្រីរាជការ និងប្រជាពលរដ្ឋនៅក្រុងកំពត ។ ពិសេសគួរតែលាងសំអាតរថយន្តកុំឱ្យមានក្លិនស្អុយអសោចិ៍បែបនេះតទៅទៀត ៕
ចែករំលែកព័តមាននេះ