ប្រតិភូ និងអត្តពលិកកម្ពុជា មានសុវត្ថិភាព សម្រាប់ការចេញទៅប្រកួតកីឡាអូឡាំពិក
- ភ្នំពេញ
រាជធានីភ្នំពេញ ៖ លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា និងជានាយបេសកកម្ម កាលពីព្រឹកថ្ងៃ
រាជធានីភ្នំពេញ ៖ លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា និងជានាយបេសកកម្ម កាលពីព្រឹកថ្ងៃ
រាជធានីភ្នំពេញ ៖ លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា និងជានាយបេសកកម្ម កាលពីព្រឹកថ្ងៃទី១៨ ខែកក្កដា ឆ្នាំ២០២១ នេះ បានដឹកនាំប្រតិភូ និងអត្តពលិកអូឡាំពិកកម្ពុជា ធ្វើតេស្ដសំណាក រកជំងឺកូវីដ-១៩ នៅវិទ្យាស្ថាន ជាតិ សុខភាពសាធារណៈ មុនចេញដំណើរចាកចេញពីមាតុភូមិ ទៅចូលរួមប្រកួតកីឡាអូឡាំពិក រដូវក្ដៅនៅទីក្រុងតូក្យូ ឆ្នាំ២០២០ (Tokyo Olympic Game 2020) នៅប្រទេសជប៉ុន នាថ្ងៃទី២០ ខែ កក្កដា ឆាប់ៗខាងមុខនេះ។ អ្វីដែលធ្វើអោយក្រុមកម្ពុជាទទួលបានឯកសារពេញលេញក្នុងដំណើរមួយនេះ គឺសមាសភាពទាំងអស់រួមទាំងគ្រូបង្វឹកផង គឺសុទ្ធតែមានសុខភាពល្អ និង អវិជ្ជមានកូវីត១៩ទាំងអស់ ដែលគ្មានឧបសគ្គដូចក្ដីបារម្ភ។
លោក វ៉ាត់ ចំរើន បានមានប្រសាសន៍ថា ការធ្វើតេស្ដសំណាករកកូវីដនេះ គឺជាលក្ខខណ្ឌមួយ ដែលបណ្ដាប្រទេសសមាជិកចូលរួម ប្រកួតកីឡាអូឡាំពិកទាំងអស់ ត្រូវគោរពគោលការណ៍របស់គណៈកម្មាធិការរៀបចំការប្រកួតដែលតម្រូវ ទី១-រយៈពេល១៤ថ្ងៃ មុន ចេញដំណើរប្រតិភូ និងកីឡាករ-កីឡាការិនីម្នាក់ៗ ត្រូវថែរក្សាសុខភាព និងពិនិត្យសុខភាពរៀងរាល់ថ្ងៃ ហើយរាយការណ៍ទៅគណៈ កម្មាធិការរៀបចំការប្រកួតនៅទីក្រុងតូក្យូ តាមរយៈប្រព័ន្ធ App ត្រួតពិនិត្យសុខភាពមួយរៀងរាល់ថ្ងៃ ដែលមានឈ្មោះថា OCHA។
ទី២-ត្រូវធ្វើតេស្ដសំណាករកកូវីដ-១៩ យ៉ាងហោច៧២ម៉ោងមុនឡើងយន្ដហោះ។ ដូច្នេះហើយទើបថ្ងៃនេះ ប្រតិភូ និងអត្តពលិកកម្ពុជា បានរៀបចំការធ្វើតេស្ដ ដើម្បីទទួលបានឯកសារគ្រប់គ្រាន់ សម្រាប់ឡើងយន្ដហោះឆ្ពោះទៅទីក្រុងតូក្យូ ហើយយកលទ្ធផលនេះ ទៅបង្ហាញគេ និងទី៣-ការរៀបចំមុនចេញដំណើរ រួមមានការរៀបចំជូនប្រតិភូ និងអត្តពលិកនូវម៉ាស់ មួកពេទ្យ និងសម្ភារមួយចំនួនទៀត ដែលអាចយកទៅជាមួយបាន ដូចជាទឹកអាល់កុលជាដើម។ នេះជាអ្វីដែលលោក វ៉ាត់ ចំរើន បន្ថែម។
លោកនាយបេសកកម្មបន្ដថា បន្ទាប់ពីធ្វើដំណើរដល់តូក្យូ ក្រោយចុះពីយន្ដហោះ គេនឹងធ្វើតេស្ដសំណាកទៀត ប៉ុន្ដែនៅទីនោះ គេ យកកំហាក ហើយគេតម្រូវឲ្យធ្វើតេស្ដកំហាករៀងរាល់ថ្ងៃ ដើម្បីតាមដានសុខភាព និងស្វែងរកជំងឺកូវីដ-១៩ ក្នុងភូមិកីឡា។ ទោះ បីមានការរកឃើញវិជ្ជមានក្នុងភូមិកីឡា ដូចព័ត៌មានចុះផ្សាយក៏ពិតមែន តែគណៈកម្មាធិការរៀបចំអូឡាំពិក មិនបាត់បង់ម្ចាស់ការក្នុងការគ្រប់គ្រងនោះទេ ដោយសារការមានប្រព័ន្ធគ្រប់គ្រងច្បាស់លាស់។ ដូច្នេះម្នាក់ៗ នៅក្នុងភូមិកីឡា ត្រូវមានការប្រុងប្រយ័ត្នខ្ពស់បំផុត។
ចំពោះការធ្វើតេស្ដសំណាកប្រតិភូ និងអត្តពលិកអូឡាំពិកកម្ពុជា ថ្ងៃនេះវិញ សុខភាពរបស់ប្រតិភូ និងកីឡាករ-កីឡាការិនីម្នាក់ៗ គឺធម្មតា គ្រាន់តែលទ្ធផលមិនចេញ ពោលគឺអាចនឹងដឹងនៅថ្ងៃស្អែក។ យ៉ាងណាមិញ លោក វ៉ាត់ ចំរើន បានថ្លែងអំណរគុណយ៉ាងជ្រាលជ្រៅ ចំពោះគណៈកម្មការ អន្ដរក្រសួងប្រយុទ្ធប្រឆាំងជំងឺកូវីដ-១៩ ក្រសួងសុខាភិបាល និងវិទ្យាស្ថានជាតិ សុខភាពសាធារណៈ ដែលបានសម្របសម្រួល ដល់ការធ្វើតេស្ដប្រតិភូ និងអត្តពលិកអូឡាំពិកកម្ពុជា ជាមួយការបម្រើសេវាយ៉ាង ល្អ និងគួរជាទីមោទនៈ។
សូមបញ្ជាក់ថា នៅថ្ងៃទី១៩ ខែកក្កដា នេះ លោកបណ្ឌិត ថោង ខុន រដ្ឋមន្ដ្រីក្រសួងទេសចរណ៍ និង អនុប្រធានគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍(SEA Games) លើកទី៣២ ឆ្នាំ២០២៣ (CAMSOC) និងជាប្រធាន NOCC នឹងរៀបចំពិធីជួបសំណេះសំណាល ជូនដំណើរ និងលើកទឹកចិត្តដល់ប្រតិភូ និងអត្តពលិកអូឡាំពិកកម្ពុជា នៅទីស្នាក់ការ NOCC មុនប្រតិភូ និងអត្តពលិកទាំងអស់ ត្រូវធ្វើដំណើរទៅប្រទេសជប៉ុន ដើម្បីលើកទឹកចិត្តដល់ប្រតិភូកម្ពុជា ក្នុងការចាកចេញនាថ្ងៃទី២០ ខែកក្កដា ដើម្បីចូលរួមប្រកួតកីឡាអូឡាំពិក ទីក្រុងតូក្យូ ឆ្នាំ២០២០ ដែលនឹងប្រារព្ធពិធីបើកនៅថ្ងៃទី២៣ ខែកក្កដា និងបិទនៅថ្ងៃទី៨ ខែសីហា ឆ្នាំ២០២១។
ចំពោះប្រតិភូ និងអត្តពលិកកម្ពុជា ដែលត្រៀមចូលរួមប្រកួតព្រឹត្តិការណ៍ពិភពលោក ៤ឆ្នាំម្ដងនេះ គឺមានលោក វ៉ាត់ ចំរើន ជានាយបេសកកម្ម, លោក ញ៉ាន សុខវិសាល ជានាយរងបេសកកម្ម និងលោកស្រីវេជ្ជបណ្ឌិត ហួត ចាន់ធានី រួមជាមួយគ្រូបង្វឹក២រូប និងកីឡាករ-កីឡាការិនី ៣រូប រួមមានកីឡាហែលទឹក ២រូប គឺកីឡាករ ហែម ប៊ុច និងកីឡាការិនី ឃឿន ប៊ុនពេជ្រមរកត ដែលត្រូវប្រកួតវិញ្ញាសាហែល ៥០ម៉ែត្រសេរីដូចគ្នា និងកីឡាករអត្តពលកម្មម្នាក់ គឺកីឡាករ ប៉ែន សុគង់ ត្រូវប្រកួតលើវិញ្ញាសារត់ល្បឿនចម្ងាយ ១០០ម៉ែត្រ ៕
ចែករំលែកព័តមាននេះ