ខេត្តប៉ៃលិន ៖ ប្រជាពលរដ្ឋក្រីក្រជាង២០០គ្រួសារក្នុងខេត្តប៉ៃលិន ទទួលបានអំណោយពីអតិថិជនហ្វដ នៅក្នុងដំណើរកម្សាន្តផ្សងព្រេងបោះជំរំរបស់អតិថិជនដែលដឹកនាំដោយក្រុមការងាររបស់ក្រុមហ៊ុនហ្វដប្រចាំកម្ពុជា ។ ពិធីចែកដំណោយជូនប្រជាពលរដ្ឋក្រីក្ររបស់អតិថិជនហ្វដ បានធ្វើឡើងកាលពីថ្ងៃទី១០ ធ្នូ កន្លងទៅនេះ នៅសាលាខេត្តប៉ៃលិន ដោយមានការចូលរួមពីលោកកើត សុធា អភិបាលខេត្តប៉ៃលិន និងអតិថិជនហ្វដចំនួន៣០០នាក់ ។
លោក ញ៉ែម រឹទ្ធី តំណាងក្រុមហ៊ុន អ អិម អេ កម្ពុជា បានមានប្រសាសន៍ថា ជារៀងរាល់ឆ្នាំក្រុមហ៊ុនហ្វដតែងតែរៀបចំដំណើរកម្សាន្តផ្សងព្រេងបោះជំរំសម្រាប់អតិថិជនហ្វដដែលបានទិញរថយន្តហ្វដយកទៅប្រើប្រាស់ ហើយនៅក្នុងដំណើរកម្សាន្តនោះ ក្រុមហ៊ុនក៏បានរៀបចំចែកអំណោយដល់ប្រជាពលរដ្ឋក្រីក្រនៅតំបន់ដែលក្បួនបានឆ្លងកាត់ ។
លោកបន្តថា អំណោយដែលយើងបានផ្ដល់ជូនបងប្អូននាពេលនេះ ថ្វីត្បិតតែវាមិនច្រើនក៏ពិតមែន ប៉ុន្តែវាជាសន្ដានចិត្តរបស់បងប្អូនដែលជាអតិថិជន និងក្រុមហ៊ុនហ្វដចូលរួមចែករំលែកជាមួយបងប្អូននៅក្នុងខេត្តប៉ៃលិននេះ ។
លោកកើត សុធា អភិបាលខេត្តប៉ៃលិន បានមានប្រសាសន៍ថា ជាមោទនភាពខ្លាំងណាស់ ដែលក្រុមហ៊ុនហ្វដ បានពាំនាំសម្ភារ និងស្បៀងមួយចំនួនយកមកចែកជូនបងប្អូននៅក្នុងខេត្តប៉ៃលិន មកពីក្រុងប៉ៃលិន និងស្រុកសាលាក្រៅ ខណៈប្រជាពលរដ្ឋនៅទីនេះមានការខ្វះខាតមួយចំនួន តែបើធៀបនឹងរយៈពេលប៉ុន្មានឆ្នាំមុនគឺមានជីវភាពគ្រាន់បើច្រើន ព្រោះខេត្តប៉ៃលិនជាខេត្តដែលបញ្ចប់សង្គ្រាមចុងក្រោយ ហើយប្រជាពលរដ្ឋបានចាប់ផ្ដើមជីវភាពថ្មីដោយមិនទាន់មានអ្វីៗទំនើបៗនៅឡើយ ។
លោកបានថ្លែងអំណរគុណដល់ក្រុមហ៊ុនហ្វដ និងអតិថិជនហ្វដដែលបានធ្វើដំណើរកម្សាន្តផ្សងព្រេង និងបោះជំរំដោយឆ្លងកាត់ខេត្តប៉ៃលិន ព្រមទាំងនាំមកជាមួយនូវអំណោយសម្ភារមកចែកជូនបងប្អូនប្រជាពលរដ្ឋខ្វះខាតនាពេលនេះ។ លោកសូមឱ្យដំណើរកម្សាន្តនាពេលនេះទទួលបានជោគជ័យ និងមានភាពសប្បាយរីករាយដល់ទីបញ្ចប់ ។
គួរបញ្ជាក់ថា អំណោយដែលក្រុមហ៊ុន និងអតិថិជនហ្វដបានផ្ដល់ជូនប្រជាពលរដ្ឋក្រីក្រ មានដូចជា អង្ករ ទឹកត្រី មុង ភួយ និងមី ជាដើម ៕
ចែករំលែកព័តមាននេះ