លោករ៉យ ចូន ជូនៀ អ្នកប្រដាល់ជនជាតិអាមេរិក ដែលទើបចូលសញ្ជាតិរុស្ស៊ីបានគូសបញ្ជាក់ថា លោកមិនទាន់គិតចង់ចូលនិវត្ដន៍ទេ ទោះបីបច្ចុប្បន្នមានអាយុ៤៦ឆ្នាំ បន្ទាប់ពីត្រូវអ្នកប្រដាល់សញ្ជាតិវែល អេនសូ ម៉ាន់ការីនេលលី ផ្ដួលឱ្យសន្លប់នៅទឹកទី៤ក្នុងការប្រកួតនៅទីក្រុងមូស្គូ ប្រទេសរុស្ស៊ី កាលពីថ្ងៃទី១២ ធ្នូ កន្លងទៅ ។
ការបរាជ័យខាងលើគឺជាលើកទី៩តែបើគិតចាញ់ដោយសន្លប់គឺជាលើកទី៥ក្នុងអាជីពប្រដាល់របស់លោកដែលទទួលការកោតសរសើរថា ជាកីឡាករប្រដាល់ដ៏ល្អនៅលើលោក ។ កីឡាករប្រដាល់អាយុ៤៦ឆ្នាំរូបនេះបានបញ្ជាក់ថា លោកនឹងឡើងសង្វៀនប្រកួតបន្តទៀត ។ លោកបានបញ្ជាក់ដូច្នេះថា ៖«ការឡើងប្រកួតក្នុងនាមជាជនជាតិរុស្ស៊ីលើកដំបូងរបស់ខ្ញុំ កាលពីថ្ងៃទី១២ ធ្នូ នោះ មិនមែនជាការប្រកួតលើកចុងក្រោយទេ ប៉ុន្ដែជាការចាប់ផ្ដើមដំបូង។ ខ្ញុំធ្លាប់ប្រាប់ថា ចង់លាចាកពីអាជីពជាអ្នកប្រដាល់ ប៉ុន្ដែបច្ចុប្បន្នខ្ញុំបែរជាមានអារម្មណ៍ចង់ប្រកួតបន្ត ។ ខ្ញុំមានគម្រោងបើកអាជីវកម្មក្នុងប្រទេសរុស្ស៊ី ដោយបើកក្លិបហ្វឹកហាត់ប្រដាល់ជាច្រើនកន្លែង ។ ខ្ញុំនឹងផ្ទេរបទ
ពិសោធន៍ដល់អ្នកប្រដាល់រុស្ស៊ីជំនាន់ក្រោយ ដែលនេះគឺជាតួនាទីដ៏ធំធេងរបស់ខ្ញុំទើបខ្ញុំមិនចង់ចូលនិវត្តន៍នៅពេលនេះ ។ ពេលវេលាបានតម្រូវឱ្យខ្ញុំនៅប៉ុន្តែអ្វីដែលសំខាន់បំផុត គឺសុខភាពរបស់ខ្ញុំ» ៕
ចែករំលែកព័តមាននេះ