មកដឹងពីស្ថានភាព អតីតស្ដេចប្រដាល់ អេ ភូថង ក្រោយកើតកូវីដ
- ភ្នំពេញ
រាជធានីភ្នំពេញ ៖ ថ្វីដ្បិតែមានជម្ងឺលើសជាតិអាស៊ីត ខ្លាញ់រុំបេះដូង សម្ពាធសរសៃឈាមបេះដូង និងលើសជាតិស្ករ ស្របពេលដែល
រាជធានីភ្នំពេញ ៖ ថ្វីដ្បិតតែមានជម្ងឺលើសជាតិអាស៊ីត ខ្លាញ់រុំបេះដូង សម្ពាធសរសៃឈាមបេះដូង និងលើសជាតិស្ករ ស្របពេលដែលខ្លួនក៏មានជម្ងឺកូវីត១៩ តែអតីតអ្នកប្រដាល់ គឺលោក អេ ភូថង ត្រូវបានភរិយាអះអាងថា លោកបានធូរស្បើយច្រើនហើយ ហើយរូបភាពដាក់អុកស៊ីហ្សែនធ្ងន់ធ្ងរ ដែលមានបង្ហោះនោះ ក៏ជារូបភាពតាំងពីថ្ងៃចូលដំបូងកាលពីមួយសប្ដាហ៍មុនប៉ុណ្ណោះ ។ លោកកំពុងសម្រាកព្យាបាលនៅស្ដាតអូឡាំពិក ហើយសុខភាពក៏បានធូរស្រាលច្រើនជាងមុនផងដែរ ។
អ្នកស្រី សាំង សុម៉ាលី ភរិយារបស់លោក អេ ភូថង បានថ្លែងបញ្ជាក់ថា លោក អេ ភូថង ត្រូវបានយកទៅព្យាបាលជម្ងឺកូវីដ១៩ កាលពីថ្ងៃទី១១ ខែកក្កដា កន្លងទៅ ស្របពេលដែលជំងឺចាស់រើឡើងផង។ លោក អេ ភូថង មានអាការះធ្វើទុក្ខ ហើយក្រោយក្រុមគ្រួសារបញ្ជូនទៅមន្ទីរពេទ្យ។ ក៏ពិនិត្យឃើញថា ពិតជាមានជាតិអាស៊ីតឡើងខ្លាំង ខ្លាញ់រុំបេះដូងខ្លាំង និងសម្ពាធសរសៃឈាមបេះដូងថែមទៀត ព្រោះលោកធាត់ពេក។ បន្ទាប់មកក្រុមគ្រូពេទ្យក៏បានធ្វើតេស្ដសំណាក ដើម្បីរៀបចំឲ្យលោកសម្រាកព្យាបាលជំងឺ តែបែរជាទទួលបានលទ្ធផលវិជ្ជមានកូវីដ-១៩ ទៅវិញ ទើបសម្រេចបញ្ជូនលោកយកទៅព្យាបាលនៅស្ដាតអូឡាំពិកតែម្ដង។
អ្នកស្រីបានបន្តថា ដោយឡែកអ្នកស្រី និងកូនៗ គឺធ្វើតេស្តច្រើនដង តែមិនកើតអីទេ។ ក្នុងថ្ងៃចូលសម្រាកដំបូង លោកអេ ភូថង ពិតជាមានបញ្ហាពិបាកដកដង្ហើមខ្លាំង ទើបតម្រូវអោយដាក់អុកស៊ីហ្សែន ដូចដែលមានការបង្ហោះ ប៉ុន្តែប៉ុន្មានថ្ងៃបន្ទាប់មកនេះ លោកមិនមានសភាពធ្ងន់ធ្ងរដូចមានការភ្ញាក់ផ្អើលនោះទេ ដ្បិតថា លោកនៅជំនួយខ្យល់អុកស៊ីហ្សែន ម៉ាស៊ីនតូច២០ ឬ ៣០ ភាគរយ នៅពេលធ្វើទុក្ខ។ អ្នកស្រីដែលនៅមើលថែ ហើយមិនមានជម្ងឺកូវីត១៩ បានបន្តថា លោកអេ ភូថង គឺមិនខុសពីអ្នកកើតកូវីត១៩ ហើយក៏មានសុខភាពប្រសើរឡើងវិញ ហើយអ្នកស្រីក៏មានការភ្ញាក់ផ្អើលដែរ នៅពេលស្វាមីបានធូរច្រើនថ្ងៃមកហើយ ប៉ុន្តែទើបតែមានការបង្ហោះពីរូបភាពធ្ងន់ធ្ងររបស់ប្ដី ដែលធ្វើអោយគ្រួសារ និងអ្នកស្គាល់រាប់អានអ្នកខ្លះភ័យស្លន់ស្លោ។ យ៉ាងណាមិញអ្នកស្រីក៏ថ្លែងអំណរគុណចំពោះការចាប់អារម្មណ៍ចំពោះស្វាមីរបស់អ្នកស្រីផងដែរ ដោយបានចាត់ទុកថា ការបង្ហោះចែកចាយនោះ គឺជាកម្លាំងចិត្តមួយដ៏ធំ។
អ្នកស្រី រំលឹកថា បន្ទាប់ពីធ្វើតេស្ដវិជ្ជមាន ក្រុមគ្រូពេទ្យក៏បានរៀបចំបញ្ជូនលោក អេ ភូថង មកសម្រាកព្យាបាល នៅមជ្ឈមណ្ឌលជំងឺកូវីដ-១៩ នៅពហុកីឡដ្ឋានជាតិអូឡាំពិក ដោយថ្ងៃទី១ លោកមានអាការៈរៀងធ្ងន់បន្ដិច ព្រោះជំងឺប្រចាំកាយ តែដោយមានការយកចិត្តទុកដាក់មើលថែ និងព្យាបាលពីសំណាក់ក្រុមគ្រួពេទ្យ នៅថ្ងៃបន្ដបន្ទាប់ រហូតដល់ថ្ងៃទី១៦ ខែកក្កដានេះ អាការៈរបស់លោក អេ ភូថង គឺបានធូរស្រាលច្រើនហើយ។ ម្យ៉ាងលោក អេ ភូថង និងក្រុមគ្រួសារ ដែលគ្រប់អាយុចាក់វ៉ាក់សាំង ក៏បានចាក់វ៉ាក់សាំងការពារជំងឺកូវីដ-១៩ រួចហើយដែរ។ អ្នកស្រីថា លោកមិនបានប្រាស្រ័យទាក់ទាងជាមួយសិស្សគុន ឬកូនៗនោះទេ លើកលែងតែភរិយារបស់លោក ប៉ុន្ដែអ្នកស្រី សាំង សុម៉ាលី បានធ្វើតេស្ដជាច្រើនលើក សុទ្ធតែទទួលបានលទ្ធផលអវិជ្ជមាន ពុំបានឆ្លងពីស្វាមីអ្នកស្រីនោះទេ៕
ចែករំលែកព័តមាននេះ