- ភ្នំពេញ
ភ្នំពេញ៖ ប៉ុន្មានឆ្នាំចុងក្រោយនេះ នៅភ្នំពេញ កកស្ទះចរាចរណ៍ជាខ្លាំង។ ការកកស្ទះចរាចរណ៍នោះហើយ នាំឲ្យឡានពេទ្យ ដែលដឹកអ្នកជំងឺ ទៅសង្គ្រោះបន្ទាន់ ក៏ត្រូវកកស្ទះដែរ។ ក្នុងនោះ…
ភ្នំពេញ៖ ប៉ុន្មានឆ្នាំចុងក្រោយនេះ នៅភ្នំពេញ កកស្ទះចរាចរណ៍ជាខ្លាំង។ ការកកស្ទះចរាចរណ៍នោះហើយ នាំឲ្យឡានពេទ្យ ដែលដឹកអ្នកជំងឺ ទៅសង្គ្រោះបន្ទាន់ ក៏ត្រូវកកស្ទះដែរ។ ក្នុងនោះ ក៏លេចមុខយុវជនជាច្រើនក្រុម ជិះម៉ូតូ បើកផ្លូវ នាំមុខឡានពេទ្យ ហើយមានខ្លះ ថែមទាំងដាក់សារ៉ែនលើម៉ូតូថែមទៀត។
ឡានពេទ្យមានបេសកកម្មមួយ គឺដឹកអ្នកជំងឺកូវីដ១៩ និងអ្នកជំងឺផ្សេងទៀត ទៅសង្គ្រោះជីវិតនៅមន្ទីរពេទ្យ។ ដូច្នេះមនុស្សគ្រប់គ្នា ត្រូវតែបើកផ្លូវ អោយឡានពេទ្យ។ ប៉ុន្តែតាមការសង្កេត គឺមិនដូច្នេះឡើយ។ ដូច្នេះ វាក៏លេចករណី រហូតដល់ឡានពេទ្យ ត្រូវមានអ្នកជិះម៉ូតូ ប្រឹងបើកផ្លូវបន្ថែមទៀត។
ក៏ប៉ុន្តែសកម្មភាពក្រុមយុវជនជិះម៉ូតូ បើកផ្លូវឡានពេទ្យនោះ កន្លងមក បានជួបគ្រោះថ្នាក់ ដោយមួយករណី រហូតដល់ស្លាប់ នៅខាងច្បារអំពៅ ដោយសារតែជិះលឿន ហើយជ្រុលចង្កូត ចូលក្រោមឡាន។ ថ្មីៗនេះទៀត អ្នកជិះម៉ូតូ ដែលអះអាងថា ជាក្រុមអ្នកសម្រួលចរាចរណ៍ ជូនរថយន្តសាម៉ុយ ក៏ត្រូវឡានមួយគ្រឿង បុកនៅផ្លូវបំបែកជា៤។ តែករណីចុងក្រោយ កាលពីម៉ោង ១១យប់ថ្ងៃទី១០ ខែកក្កដា ឆ្នាំ២០២១ នៅផ្លូវបំបែកជា៤ ស្តុបទេពផន កែងមហាវិថីម៉ៅសេទុង ស្ថិតនៅក្នុងសង្កាត់ទឹកល្អក់២ ខណ្ឌទួលគោក គឺត្រឹមតែខូចខាតម៉ូតូបន្តិចបន្តួចប៉ុណ្ណោះ។
ករណីក្រុមយុវជនបើកម៉ូតូ នាំមុខឡានពេទ្យនេះ មានមតិគាំទ្រ និងមានទាំងមតិរិះគន់ ហើយសូម្បីតែប៉ូលិស ក៏មិនគាំទ្រឲ្យមានក្រុមអ្នកហែកផ្លូវនេះឡើយ ដោយសំអាងថា «ខុសច្បាប់» ហើយពេលខ្លះ បង្កបញ្ហា និងប្រឈម នឹងគ្រោះថ្នាក់ចរាចរណ៍ថែមទៀត ដោយសារតែអ្នកបើកម៉ូតូលឿន ក្នុងពេលផ្លូវកកស្ទះចរាចរណ៍។
អ្នកគាំទ្រឲ្យមានក្រុមយុវជនបើកម៉ូតូនាំមុខឡានពេទ្យ បានលើកឡើងថា ក្រុមនេះ បានជួយច្រើន ដោយសារអ្នកបើកបរខ្លះ លឺឡានសារ៉ែនហើយ នៅធ្វើមិនដឹង។ តែក្រុមយុវជនបើកម៉ូតូនាំមុខឡានពេទ្យនេះ បានជួយវែកផ្លូវ និងនាំឡានពេទ្យ ដល់គោលដៅដោយជោគជ័យ បានច្រើនករណី។
ដោយសារផ្លូវស្ទះ ទើបមានអ្នកបើកផ្លូវឲ្យឡានពេទ្យ។ សំខាន់ពួកគាត់ ចេះជួយសម្រួលចរាចរណ៍ វាជាទឹកចិត្តដ៏ប្រពៃ ព្រោះដោយសារផ្លូវយើង ពិតជាស្ទះខ្លាំងមែន ពេលម៉ោងចូលធ្វើការ និងចេញពីធ្វើការ។ តែអ្វីដែលជាការខុសពួកគាត់ គឺប្រើស៊ឺរ៉ែន បើកផ្លូវ ដែលពួកគាត់ មិនមែនជាសមត្ថកិច្ច និងមិនមានសិទ្ធិប្រើស៊ឺរ៉ែនបើកផ្លូវទេ។ នេះបើតាមការយល់ឃើញអ្នកផ្សេងទៀត។
អ្នកខ្លះលើកឡើងថា ក្រុមយុវជនបើកម៉ូតូមុខឡានពេទ្យ ដែលអះអាងថា ជាក្រុមអ្នកបើកផ្លូវ និងសម្រួលចរាចរណ៍ទាំងនោះ នាំមុខតែឡានពេទ្យឯកជនប៉ុណ្ណោះ ហើយក៏ធ្វើដើម្បីបានលុយកាកពីសាច់ញាត្តិក្រុមគ្រួសារអ្នកជំងឺ ឬក៏បានលុយពីពេទ្យឯកជនតែប៉ុណ្ណោះ។
ក៏ប៉ុន្តែ ការលើកឡើងដូច្នេះ ត្រូវបានក្រុមអ្នកបើកម៉ូតូ នាំមុខឡានពេទ្យ បដិសេធ ហើយថា មានក្រុមមួយ ដែលមានឈ្មោះថា CEAS ក៏បានបើកម៉ូតូ នាំមុខឡានពេទ្យរដ្ឋ ដែលមកពីខេត្ត ហើយសុទ្ធតែអ្នកជំងឺ ដែលត្រូវសង្គ្រោះបន្ទាន់ដែរ។
យ៉ាងណាក៏ដោយ ករណីនេះ ក៏ត្រូវគេលើកឡើងថា ជាការពិតមិនត្រូវអោយមានម៉ូតូបើកមុខឡានសារ៉ែនទេ។ ប៉ុន្តែបច្ចុប្បន្ននេះ បើមាន គឺល្អ ដោយសារពលរដ្ឋខ្មែរយើង ស្ទើរតែ ៩០% អត់ចេះបើកបរ និងមិនស្គាល់គន្លងផ្លូវ ហើយមិនស្តាប់សំឡេងឡានពេទ្យ។ ពេលខ្លះ អោយឡានពេទ្យ គេចគាត់វិញ បើឡានពេទ្យ ចង់ទៅមុន។
ក៏មានអ្នកកត់សម្គាល់ថា កន្លងមក ក្រុមអ្នកបើកម៉ូតូនាំមុខឡានពេទ្យនេះ ដូចមានម្តង គ្រោះថ្នាក់ ស្លាប់ខ្លួនឯងទៀត។ ដូច្នេះគួរមានចំណាត់ការយូរហើយ ចំពោះពួកនេះ ដែលបើកម៉ូតូ នាំផ្លូវឡានពេទ្យ ដែលខ្លះ ធ្វើឫកដូចមានតែឯង។
ឡានពេទ្យ មានស៊ឺរ៉ែន ហើយមានម៉ូតូបើកស៊ឺរ៉ែននាំផ្លូវទៀត វាបង្ហាញអោយបរទេសមើលមកថា អ្នកបើកបរខ្មែរយើង មិនគោរពច្បាប់។ ខ្មែរគ្មានសីលធម៌ក្នុងខ្លួន ព្រោះសូម្បីតែឡានស៊ឺរ៉ែន ដឹកអ្នកជំងឺ នៅមិនផ្ដល់អាទិភាពអោយទៅមុនទេ។
បើសិនជាបងប្អូន ដែលបើកម៉ូតូ សម្រួលចរាចរណ៍មុខឡានពេទ្យទាំងនោះ ជួបគ្រោះថ្នាក់ នៅពេលកំពុងសម្រួលចរចរណ៍ តើអ្នកណា ទទួលខុសត្រូវ ជូនពួកគាត់? រដ្ឋ ខាងមន្ទីពេទ្យ ឬក៏ត្រូវដោះស្រាយដោយខ្លួនឯង? ដូច្នេះបើអាចឈប់បាន ឈប់ទៅ ព្រោះឡានពេទ្យ មានស៊ឺរ៉ែន ដែលច្បាប់ បានកំណត់ជាអាទិភាព ដូចឡានទឹក សម្រាប់ពន្លត់អគ្គិភ័យរួចទៅហើយ។
កាលពីទសវត្ស៨០ ការងារសង្គម ជួយសម្រួលចរាចរណ៍ ក្រៅពីនគរបាលចរាចរណ៍ និងសមត្ថកិច្ច គេប្រើកុមារឈានមុខ។ បច្ចុប្បន្ន គេប្រើក្រុមកាយឫទ្ធិ ដែលសុទ្ធតែមានអង្គភាព មានមេ មានកើយដឹកនាំ និងទទួលខុសត្រូវ។ ចុះក្រុមស្ម័គចិត្តបើកម៉ូតូមុខឡានពេទ្យនេះ ពេលបើកលឿន បង្កគ្រោះថ្នាក់ អ្នកណាទទួលខុសត្រូវ? ព្រោះពេលខ្លះ ឃើញពួកគាត់បើកលឿនៗណាស់ វ៉ាជ្រែគេជ្រែឯង។ ពេលខ្លះ ស្រែកឡូឡាពេញផ្លូវសាធារណៈ ធ្វើអោយអ្នកដំណើរខ្លះ មានការភ័យខ្លាច។
ប៉ូលិស ក៏គាំទ្រនូវការឈប់ឲ្យមានក្រុមម៉ូតូបើកផ្លូវ មុខឡានពេទ្យនេះដែរ។ តែបញ្ហាធំ គឺប្រជាពលរដ្ឋ ដែលជាអ្នកប្រើប្រាស់ផ្លូវ មិនថា ថ្មើរជើង អ្នកបើកបរម៉ូតូ ឬរ៉ឺម៉កកង់បី និងឡាននោះទេ ទាំងអស់គ្នា ត្រូវតែគោរពច្បាប់ចរាចរណ៍ និងផ្តល់អាទិភាពដល់ឡានពេទ្យ ឡានស៊ឺរ៉ែន។
ការលើកឡើងថា អ្នកជិះតាមផ្លូវ មិនគោរពច្បាប់ គឺជារឿងបុគ្គល។ ប៉ុន្តែក្រុមអ្នកបើកម៉ូតូនាំមុខឡានពេទ្យ គឺនាំគ្នាធ្វើខុសទាំងក្រុម ដោយជិះឆ្វេចឆ្វាច គឺខុសជាក្រុមតែម្តង។
ក៏ប៉ុន្តែក៏មានអ្នកលើកឡើងថា បើគួរផ្អាក គឺផ្អាកតែក្រុម ដែលរញ៉េរញ៉ៃ។ ចំពោះក្រុម ដែលល្អ មានវិន័យត្រឹមត្រូវ គួរបង្ហាត់បង្រៀនពួកគាត់បន្ថែម ដើម្បីជួយសង្គមយើងទាំងអស់គ្នា។ គេអាចបង្ហាត់បង្រៀនពួកគាត់បន្ថែម បើពួកគាត់មានឆន្ទៈល្អមែន។
មានការលើកយកករណី នៅប្រទេសឥណ្ឌូនេស៊ី ដែលមានក្រុមយុវជនស្ម័គ្រចិត្ត មានឯកសណ្ឋាន មានការបណ្តុះបណ្តាល និងទទួលស្គាល់ត្រឹមត្រូវពីអាជ្ញាធរសមត្ថកិច្ច ជិះម៉ូតូបើកផ្លូវចរាចរណ៍ នៅទីក្រុងដ៏មមាញឹក ដើម្បីឲ្យឡានពេទ្យ នាំយកអ្នកជំងឺ ទៅកាន់មន្ទីរពេទ្យ។
នោះគឺរាជរដ្ឋាភិបាល តាមរយៈក្រសួងមហាផ្ទៃ អគ្គស្នងការដ្ឋាននគរបាលជាតិ ក្រសួងសុខាភិបាល ក្រសួងសាធារណការ និងដឹកជញ្ជូន រួមទាំងអាជ្ញាធរសមត្ថកិច្ចរាជធានីខេត្ត គួរតែមានក្រុមអ្នកបើកផ្លូវពិសេស ឬនាំមុខឡានសង្រ្គោះបន្ទាន់ បន្ថែមលើកម្លាំងប៉ូលិសចរាចរណ៍ ឬប៉េអឹម ដែលយើងមានសព្វថ្ងៃ ឈរជើង ប្រចាំការតាមគោលដៅ។
បើមិនដូច្នេះទេ ក៏គួរតែចាត់ចែងក្រុមសមត្ថកិច្ច គឺប៉ូលិសចរាចរណ៍ ឬក៏ប៉េអឹម រង់ចាំសារ៉េចរាចរណ៍ នៅផ្លូវកកស្ទះ ហើយអាចមានម៉ូតូសបើកផ្លូវ នាំឡានពេទ្យ នៅតំបន់ ដែលកកស្ទះខ្លាំង។ ជាងនេះទៅទៀត មូលហេតុចម្បងនៃការដែលអ្នកបើកបរយានយន្ត មិនជៀសផ្លូវឡានពេទ្យ គឺដោយច្រើន មកពីការកកស្ទះចរាចរណ៍នេះតែម្តង ព្រោះអ្នកបើកបរយើង មិនមែនដល់ថ្នាក់ឃើញឡានស៊ឺរ៉ែន ឡានពេទ្យ មកពីក្រោយហើយ មិនគេច មិនអែបខាងស្តាំ ឲ្យឡានអាទិភាពទាំងនោះ ទៅមុនឡើយ។ បើមាន ក៏សឹងតែ ១០០នាក់ មាន ១ប៉ុណ្ណោះ ដែលបើកបរទំនើង មិនគោរពសិទ្ធិអាទិភាពរបស់ឡានពេទ្យ ឡានស៊ឺរ៉ែន។ តែបើផ្លូវនោះ កំពុងកកស្ទះចរាចរណ៍ សួរថា តើឲ្យអ្នកបើកឡាន បើកម៉ូតូ ជៀសទៅណារួច? នេះជាបញ្ហា។
មួយវិញទៀត ឡានពេទ្យ មិនថា ឡានពេទ្យឯកជន ឬឡានពេទ្យរដ្ឋទេ គឺមានបំពាក់ស៊ឺរ៉ែន និងទទួលស្គាល់ត្រឹមត្រូវ ហើយមានសិទ្ធិអាទិភាពគ្រប់គ្រាន់ ដែលមិនទាមទារឲ្យមានម៉ូតូរបស់ក្រុមយុវជនណា មកបើកផ្លូវ មកហែកផ្លូវឲ្យទៀតនោះទេ។ អ្នកបើកបរទាំងអស់ មានត្រឹមតែស្មារតីទទួលខុសត្រូវ និងគោរពច្បាប់ ព្រមទាំងមានសីលធម៌ និងគុណធម៌ គឺអាចឲ្យឡានពេទ្យ នាំអ្នកជំងឺទៅសង្គ្រោះបន្ទាន់ នៅមន្ទីរពេទ្យបានហើយ។ សំខាន់បំផុត ក្រុមប៉ូលិសចរាចរណ៍ ធ្វើម៉េច កុំឲ្យតែផ្លូវកកស្ទះចរាចរណ៍បានហើយ៕
ចែករំលែកព័តមាននេះ