- ភ្នំពេញ
ភ្នំពេញ៖ ក្រសួងសាធារណការ និងដឹកជញ្ជូន បានចាត់វិធានការយូរមកហើយ លើរថយន្តធុនធ្ងន់ ដឹកលើសទម្ងន់ តាមរយៈការដាក់ជញ្ជីងថ្លឹងរថយន្ត នៅតាមបណ្តាផ្លូវជាតិសំខាន់ៗ រួមទាំងជញ្ជីងចល័តជាច្រើនថែមទៀត។ ប៉ុន្តែមកដល់ពេលនេះ…
ភ្នំពេញ៖ ក្រសួងសាធារណការ និងដឹកជញ្ជូន បានចាត់វិធានការយូរមកហើយ លើរថយន្តធុនធ្ងន់ ដឹកលើសទម្ងន់ តាមរយៈការដាក់ជញ្ជីងថ្លឹងរថយន្ត នៅតាមបណ្តាផ្លូវជាតិសំខាន់ៗ រួមទាំងជញ្ជីងចល័តជាច្រើនថែមទៀត។ ប៉ុន្តែមកដល់ពេលនេះ បញ្ហារថយន្តដឹកទំនិញលើសទម្ងន់ នៅតែកើតឡើងមាននៅឡើយ។ ដូច្នេះសំណួរ សួរថា មកពីហេតុអ្វី មិនអាចលុបបំបាត់ករណីឡានដឹកលើសទម្ងន់បាន នៅប្រទេសយើង?
ជាថ្មីម្តងទៀត នៅពេលនេះ ក្រសួងសាធារណការ និងដឹកជញ្ជូន បានរំលឹកជាថ្មីដល់ម្ចាស់រោងចក្រស៊ីម៉ង់ត៍ ការដ្ឋានផលិតថ្ម ដេប៉ូខ្សាច់ ម្ចាស់ក្រុមហ៊ុនដឹកជញ្ជូន ម្ចាស់រថយន្តធុនធ្ងន់ និងអ្នកបើកបររថយន្តធុនធ្ងន់ថា ក្រសួងនឹងបន្តអនុវត្តតាមច្បាប់យ៉ាងតឹងបំផុត ដោយគ្មានការលើកលែងឡើយ។ នោះគឺក្រៅពីផាកពិន័យតាមច្បាប់ហើយនោះ ក្រសួងត្រូវឃាត់ទុករថយន្តដឹកលើសទម្ងន់នោះ រយៈពេល ១ឆ្នាំថែមទៀត។
មន្ត្រីជំនាញរបស់ក្រសួងសាធារណការ និងដឹកជញ្ជូន បានអនុវត្តច្បាប់ និងសេចក្ដីជូនដំណឹង ចំពោះយានយន្តដឹកជញ្ជូនលើសទម្ងន់ ដោយគិតចាប់ពីខែវិច្ឆិកា ឆ្នាំ២០២០ ដល់ខែកក្កដា ឆ្នាំ២០២១នេះ បានផាកពិន័យ និងឃាត់រក្សាទុករថយន្តរយៈពេលមួយឆ្នាំ ចំនួន ១៤៣គ្រឿង។ រថយន្តទាំងនេះ ជារថយន្តដឹកជញ្ជូនលើសទម្ងន់ លើសពី ២០% នៃទម្ងន់អនុញ្ញាត។
ក្រសួងសាធារណការ និងដឹកជញ្ជូន ប្រកាសថា រថយន្តដឹកលើសទម្ងន់ទាំងនោះ ត្រូវបានឃាត់ទុកដោយក្រុមការងារក្រសួងចល័តចម្រុះ សម្រាប់ឆ្មក់ត្រួតពិនិត្យយានយន្តលើសទម្ងន់ ដែលចុះតាមបណ្តាខេត្តនានា និងគោលដៅដើមទី នៅខេត្តបាត់ដំបង និងស្ថានីយជញ្ជីងអចល័តទូទាំងប្រទេស។
ក្នុងពេលចុះពិនិត្យវឌ្ឍនភាពផ្លូវជាតិលេខ៣ កាលពីពេលថ្មីៗនេះ លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានព្រមានថា ក្រសួង នឹងចាត់វិធានការតាមនីតិវិធី ដោយគ្មានយោគយល់ខ្សែនរណាឡើយ ហើយសកម្មភាពនៃការចុះប្រតិបត្តិការនេះ នឹងធ្វើជាបន្តបន្ទាប់ទូទាំងប្រទេស ដូចភ្លៀងរលឹម ដើម្បីរឹតបន្តឹងការដឹកជញ្ជូនឲ្យស្របតាមច្បាប់ ការពារមិនឲ្យមានជនខិលខូច ដឹកលើសទម្ងន់ឡើយ។
លោករដ្ឋមន្ត្រី បន្ថែមថា ក្រសួងនៅតែបន្តអនុវត្តវិធានការនេះ បន្តទៀត ដោយមិនយោគយល់ ចំពោះឡានអ្នកក្រ ឡានអ្នកមាន អ្នកមានខ្នង ឬឡានអ្នកអត់ខ្នងអ្វីឡើយ ព្រោះរថយន្តដឹកលើសទម្ងន់ទាំងអស់នោះ ធ្វើឱ្យខូចផ្លូវដូចគ្នា។
លោករដ្ឋមន្ត្រី ក៏បានទទួលស្គាល់ថា រថយន្តដឹកទំនិញ ដែលដឹកលើសទម្ងន់នៅកម្ពុជាយើង ១គ្រឿង ត្រូវទៅសាងប្តូរទំនិញនៅព្រំដែនវៀតណាម ដោយប្រើឡានទំហំដូចគ្នា ចំនួន ២គ្រឿង ទើបដាក់អស់។
យើងដឹងជាទូទៅហើយថា ការដឹកជញ្ជូនលើសទម្ងន់ បង្កឱ្យផ្លូវឆាប់ខូចមុនអាយុកាលកំណត់ និងក៏អាចបង្កគ្រោះថ្នាក់ចរាចរណ៍ទៀតផង។ ករណីនេះ ក៏ត្រូវបានក្រសួងសាធារណការ និងដឹកជញ្ជូន ចាត់វិធានការយូរយារណាស់មកហើយ តែមកដល់សព្វថ្ងៃ ករណីរថយន្តដឹកលើសទម្ងន់ នៅតែបន្តមានដដែល។
បញ្ហារថយន្តដឹកជញ្ជូនលើសទម្ងន់ ដែលបំផ្លាញផ្លូវ និងបង្កគ្រោះថ្នាក់ចរាចរណ៍នោះ មួយផ្នែក ក៏បានកើតឡើងដោយសារតែមន្ត្រីជំនាញមួយចំនួនរបស់ក្រសួងសាធារណៈការ និងដឹកជញ្ជូន ប្រចាំការនៅតាមស្ថានីយជញ្ជីងថ្លឹងរថយន្ត ឃុបឃិត ត្រូវរ៉ូវនឹងឈ្មួញ។ តែមួយផ្នែកទៀត ក៏បង្កឡើងដោយឈ្មួញដឹកជញ្ជូនទំនិញលើសទម្ងន់ទាំងនោះ មានខ្សែក្រាស់ៗ ដែលបានកាងឡានដឹកទំនិញលើសទម្ងន់នោះ មិនឲ្យចូលជញ្ជីងថ្លឹង ក៏ធ្លាប់កើតមានដែរ។
កន្លងមកថ្មីៗនេះ រដ្ឋមន្ត្រីក្រសួងសាធារណការ និងដឹកជញ្ជូន លោកទេសរដ្ឋមន្ត្រី ស៊ុន ចាន់ថុល បានសម្រេចកែសម្រួល ដែលជារបៀបវះកាត់ទ្រង់ទ្រាយធំ លើមន្ត្រីបម្រើការនៅស្ថានីយថ្លឹងរថយន្ត ដើម្បីរឹតបន្តឹងការអនុវត្តច្បាប់ និងបង្កើនវិធានការយ៉ាងម៉ឺងម៉ាត់ លើយានយន្តដឹកជញ្ជូនលើសទម្ងន់ផងដែរ។
ក្រៅពីកែប្រែសមាសភាពមន្ត្រីតាមស្ថានីយថ្លឹងរថយន្តហើយនោះ ក្រសួងសាធារណការ និងដឹកជញ្ជូន ក៏បានបំពាក់ប្រព័ន្ធបច្ចេកវិទ្យាថ្មី ដោយប្រើប្រាស់កាមេរ៉ា និងជញ្ជីងស្វ័យប្រវត្តិ ដើម្បីជាយន្តការទប់ស្កាត់ និងត្រួតពិនិត្យយានយន្តដឹកជញ្ជូន ដែលអាចបញ្ជូនព័ត៌មានបានយ៉ាងរហ័ស ដល់ថ្នាក់ដឹកនាំ និងសមត្ថកិច្ចពាក់ព័ន្ធ។
ជាមួយគ្នានេះ ក្រសួងសាធារណការ ក៏បង្កើតកម្មវិធីរាយការណ៍យានយន្តដឹកលើសទម្ងន់ និងគ្រោះថ្នាក់ចរាចរណ៍ តាមរយៈទូរស័ព្ទដៃ ដូចកម្មវិធីថែទាំផ្លូវ Road Care Mobile App ដែរ។
កន្លងមក ដើម្បីទប់ស្កាត់បទល្មើសនៃការដឹកលើសទម្ងន់កម្រិតកំណត់ ក្រសួងសាធារណការ និងដឹកជញ្ជូន បានដាក់ពង្រាយស្ថានីយជញ្ជីងថ្លឹងរថយន្ត ចំនួន ២៧កន្លែង នៅទូទាំងរាជធានីខេត្ត នៅតាមផ្លូវជាតិសំខាន់ៗ។ ក្នុងនោះ ក៏មានជញ្ជីងថ្លឹងរថយន្តចល័ត តាមផ្លូវជាតិសំខាន់ៗ ផងដែរ។
ប៉ុន្តែនៅរៀងរាល់ខែ ក្រុមការងាររបស់ក្រសួងសាធារណការ និងដឹកជញ្ជូន ផ្នែកជញ្ជីងថ្លឹងរថយន្ត ក៏បានបន្តចាប់ឃាត់រថយន្តផ្ទុកលើសចំណុះ ពិសេសរថយន្តដឹកទំនិញធុនធ្ងន់ធំៗ ហើយបើតាមរបាយការណ៍ គឺរថយន្តទាំងនោះ បានផ្ទុកលើសទម្ងន់ ចាប់ពី ៥តោន រហូតដល់ ៣២តោន ក្នុង ១គ្រឿងៗ។
ការផ្ទុកទំនិញលើសទម្ងន់នេះ បានបង្កមហន្តរាយធ្ងន់ធ្ងរច្រើនយ៉ាង។ ទី១-រថយន្តផ្ទុកទំនិញលើសទម្ងន់ បង្កមហន្តរាយខ្លាំងជាងគេ គឺធ្វើឲ្យខូចផ្លូវ បាក់ស្ពាន។ ទី២-រថយន្តដឹកទំនិញលើសទម្ងន់កំណត់នេះ ក៏ពេលខ្លះ បានបង្កគ្រោះថ្នាក់ចរាចរណ៍ធ្ងន់ធ្ងរ ដូចជា ករណីនៅលើស្ពានអ្នកលឿង កាលពីប៉ុន្មានឆ្នាំមុន គឺករណីគ្រោះថ្នាក់ចរាចរណ៍ នៅកំណត់ផ្លូវជាតិលេខ៤ បណ្តាលឲ្យខូចខាតស្ពាន បណ្តាលឲ្យស្លាប់ និងរបួសជាច្រើននាក់ ដោយសារតែរថយន្តដឹកធ្ងន់។
ជាដំណោះស្រាយ មន្ត្រីជំនាញខាងជញ្ជីងថ្លឹង ត្រូវតែស្មោះត្រង់ មានភាពទទួលខុសត្រូវ ធ្វើការដោយវិជ្ជាជីវៈ មិនត្រូវបន្តបណ្តែតបណ្តោយឲ្យរថយន្តដឹកលើសទម្ងន់ បន្តបើកបរឆ្លងកាត់ផ្លូវ ពិសេសនៅកន្លែងជញ្ជីងថ្លឹងរថយន្ត ដោយគ្រាន់តែក្រុមឈ្មួញអ្នករកស៊ីដឹកជញ្ជូនទាំងនោះ បង់លុយ ដាក់ខែឲ្យ ហើយឡានធំៗ ដឹកទំនិញ ចង់ផ្ទុកទំនិញលើសប៉ុន្មានតោន ក៏ស្រេចតែឡានទាំងនោះ ទៀតឡើយ។
ករណីមន្ត្រីជំនាញខាងជញ្ជីងថ្លឹង បណ្តែតបណ្តោយ និងស៊ីលុយរបស់ក្រុមហ៊ុនដឹកជញ្ជូននេះ ត្រូវបានក្រសួងសាធារណការ និងដឹកជញ្ជូន ចាត់វិធានការ ដកមន្ត្រីខិលខូចទាំងនោះ បញ្ឈរជើង ហើយក៏មានករណីខ្លះ ក្រសួងបានកសាងសំណុំរឿង បញ្ជូនទៅតុលាការផងដែរ។
ចំណែកឈ្មួញរកស៊ីឡានដឹកជញ្ជូនទំនិញ ក៏គួរតែដល់ពេលភ្ញាក់រលឹកផង។ ខ្លួនរកស៊ីដឹកជញ្ជូន ធ្វើមាន ធ្វើបាន ហើយបែរជាផ្ទុកទំនិញលើសចំណុះ បណ្តាលឲ្យខូចផ្លូវ និងពេលខ្លះ បង្កជាគ្រោះថ្នាក់ ប៉ះពាល់ដល់ទ្រព្យសម្បត្តិ និងអាយុជីវិតអ្នកធ្វើដំណើរតាមផ្លូវ តើសមដែរ ឬទេ? គួរតែរកស៊ីតាមផ្លូវធម៌ សុច្ចរិត ក៏អាចមានបាន ហើយក៏អាចឲ្យគេបានសុខជាមួយខ្លួនផង។
ផ្ទុយទៅវិញ នៅពេលផ្ទុកលើសចំណុះ បើមន្ត្រីជំនាញ ចាប់បាន នឹងត្រូវខាតពេលវេលាផង និងត្រូវរើទំនិញលើសចំណុះនោះ ចេញផង ហើយក៏ត្រូវផាកពិន័យលុយថែមទៀត។ នៅពេលនេះទៀត ក៏ត្រូវក្រសួង ចាប់ឃាត់ទុករថយន្តនោះ ១ឆ្នាំទៀតផង។
មួយវិញទៀត ក៏ធ្លាប់មានការលើកឡើងថា កន្លងមក ក្រុមហ៊ុនដឹកជញ្ជូនធំៗមួយចំនួន សុទ្ធតែមានខ្នងក្រាស់ៗ នៅកាងពីក្រោយ គឺថ្នាក់នាយឧត្តមសេនីយ៍ ឧត្តមសេនីយ៍ និងឈ្មួញធំៗ ដោយមន្ត្រីជំនាញខាងជញ្ជីងថ្លឹងរថយន្ត ត្អូញត្អែរថា មិនអាចប៉ះបានឡើយ។ រថយន្តដឹកជញ្ជូនទំនិញទាំងនោះ ក៏មិនចូលជញ្ជីងថ្លឹងទេ ហើយក៏មិនខ្លាចញញើតនឹងមន្ត្រីជំនាញផ្នែកត្រួតពិនិត្យទម្ងន់ដែរ ចង់ដាក់លើសប៉ុន្មានតោន ក៏បាន ស្រេចតែចិត្ត។ ករណីនេះ ប្រហែលជាសូម្បីរដ្ឋមន្ត្រីក្រសួងសាធារណការ និងដឹកជញ្ជូន ក៏មិនមានឥទ្ធិពល អាចចាប់ឡានទាំងនោះ យកមកពិនិត្យបានផង។
ដូច្នេះ បើសិនជាមន្ត្រីអនុវត្តច្បាប់ ពោលគឺមន្ត្រីជញ្ជីងថ្លឹងរថយន្តរបស់ក្រសួងសាធារណការ និងដឹកជញ្ជូន អនុវត្តច្បាប់ត្រឹមត្រូវ និងតឹងរឹង គឺនឹងមិនមានរថយន្តដឹកលើសទម្ងន់ទេ។ រថយន្តទាំងអស់ នៅពេលផ្ទុកទំនិញ មុនចេញដំណើរពីក្រុមហ៊ុន គឺមន្ត្រីជំនាញ គួរតែថ្លឹងម្តង ហើយនៅតាមផ្លូវជាតិធំៗ គឺត្រូវចាប់រថយន្តដឹកទំនិញទាំងអស់ ត្រួតពិនិត្យ ថ្លឹងម្តងទៀត និងនៅពេលចូលដល់កន្លែងទម្លាក់ទំនិញ ក៏ត្រូវថ្លឹងម្តងទៀត ដើម្បីផ្ទៀងផ្ទាត់។ នេះជាវិធីងាយៗ ដែលមន្ត្រីជំនាញ អាចធ្វើបាន ក្នុងបំណងទប់ស្កាត់រថយន្តដឹកលើសទម្ងន់។
ជាមួយគ្នានោះ រដ្ឋាភិបាលគួរតែកាច់ថ្មុងក្រុមនាយឧត្តមសេនីយ៍ ឧត្តមសេនីយ៍ និងឈ្មួញដ៏មានឥទ្ធិពលខិលខូចមួយចំនួន ដែលការពារកាងពីក្រោយរថយន្តដឹកទំនិញ មិនចូលជញ្ជីងថ្លឹង។
រដ្ឋាភិបាលត្រូវវះកាត់ ដើម្បីឲ្យប្រាកដថា រថយន្តដឹកទំនិញទាំងអស់ មិនផ្ទុកលើសទម្ងន់កំណត់ ដែលបង្កបញ្ហាមុនគេ គឺខូចផ្លូវ និងស្ពាន ហើយធ្ងន់ធ្ងរជាងនេះទៅទៀត គឺរថយន្តដឹកលើសទម្ងន់នេះ ក៏អាចបង្កគ្រោះថ្នាក់ចរាចរណ៍ បណ្តាលឲ្យស្លាប់ និងរបួសអ្នកដំណើរផ្សេងទៀតផងដែរ៕
ចែករំលែកព័តមាននេះ