គុនល្បុក្កតោ រំពឹងទទួលការគាំទ្រខ្លាំង ក្នុងព្រឹត្តិការណ៍ជើងឯកអាស៊ីអាគ្នេយ៍
- ភ្នំពេញ
រាជធានីភ្នំពេញ ៖ ក្រោយពីសហព័ន្ធកីឡាគុនល្បុក្កតោកម្ពុជា ប្រកាសពីគម្រោងរៀបចំការប្រកួតកីឡាគុនល្បុក្កតោជើងឯក អាស៊ី
រាជធានីភ្នំពេញ ៖ ក្រោយពីសហព័ន្ធកីឡាគុនល្បុក្កតោកម្ពុជា ប្រកាសពីគម្រោងរៀបចំការប្រកួតកីឡាគុនល្បុក្កតោជើងឯក អាស៊ីអាគ្នេយ៍ ជាលើកដំបូង នាខែតុលា ឆ្នាំ២០២១ បានធ្វើអោយមានចាប់អារម្មណ៍មិនតិចទេ ស្របពេលដែលកីឡាករគ្រប់ផ្នែកក៏បង្ហាញពីការត្រៀមខ្លួន យ៉ាងយកចិត្តទុកដាក់ផង។ មានការរំពឹងយ៉ាងខ្លាំងថា ព្រឹត្តិការណ៍ដែលនឹងមានកីឡាករកីឡាការិនី មកពី នៅ៤ប្រទេសផ្សេងគ្នាមកប្រកួតដណ្ដើមមេដាយមាសនេះ នឹងធ្វើអោយកីឡាដូនតាខ្មែរមួយនេះ ខ្ទរខ្ទារល្បីល្បាញខ្លាំងឡើង។
លោក អ៊ូ តារា អគ្គលេខាធិការរងសហព័ន្ធកីឡាគុនល្បុក្កតោកម្ពុជា ធ្លាប់បានបញ្ជាក់ថា សហព័ន្ធកំពុងដុតដៃដុតជើង ក្នុងការទទួលរៀបចំធ្វើជាម្ចាស់ផ្ទះសម្រាប់ការប្រកួតមួយនេះ។ នេះក៏ចាត់ទុកជាការបន្សាយកេរ្តិ៍ឈ្មោះ គុនល្បុក្កតោនៅក្នុងតំបន់អាស៊ីអាគ្នេយ៍ បន្ទាប់ពីប្រទេសមួយចំនួនបានមកហ្វឹកហាត់ក្បាច់គុនល្បុក្កតោនៅកម្ពុជា និង បន្ទាប់ពីអ្នកជំនាញខ្មែរ ត្រូវបានប្រទេសទាំងនោះ អញ្ជើញអោយទៅបង្វឹកក្បាច់គុនល្បុក្កតោ ប្រកបដោយគុណភាពផងដែរ។ ដ្បិតតែកម្ពុជា គឺជាម្ចាស់ក្បាច់គុណ តែមិនប្រាកដថា ប្រទេសដែលបានបង្វឹកបន្តពីកម្ពុជា មិនខ្លាំង មិនល្អនោះទេ ទើបមានការប្រកួតជើងឯកអាស៊ីអាគ្នេយ៍នៅពេលខាងមុខ នឹងអាចកាត់ក្ដីលទ្ធផលបាន។ លោកថានេះ គឺជាកិច្ចការធំមួយរបស់សហព័ន្ធដែលត្រូវបំពេញ ក្នុងនោះការបណ្តុះបណ្តាលអាជ្ញាកណ្តាល ចៅក្រមអន្តរជាតិ និង ការបញ្ជូនអ្នកជំនាញគុនល្បុក្កតោទៅបង្វឹកកីឡាករ កីឡាការិនីនៃបណ្តាប្រទេសដែលជាសមាជិកក្នុងអាស៊ីអាគ្នេយ៍ គឺជារឿងត្រូវបន្តធ្វើ។
កម្ពុជា ក្នុងនាមជាម្ចាស់ក្បាច់គុនព្រលឹងវប្បធម៌មួយនេះ ក៏ត្រូវតែពង្រឹងគុណភាពបន្ថែមលើមន្ត្រីគណៈកម្មការរៀបចំការប្រកួត មន្ត្រីគណៈកម្មការបច្ចេកទេស អាជ្ញាកណ្តាល ចៅក្រម កីឡាករ កីឡាការិនីជម្រើសជាតិដូចគ្នា ដោយមិនអាចមើលស្រាលបានឡើយ។ អគ្គលេខាធិការរងរូបនេះបន្ថែមថា បណ្តាប្រទេសដែលគ្រោងនឹងចូលរួមប្រកួតប្រជែងមេដាយនៅក្នុងព្រឹត្តិការណ៍នេះ គឺម្ចាស់ផ្ទះកម្ពុជា ហ្វីលីពីន ឡាវ វៀតណាម និងមីយ៉ាន់ម៉ា ដែលគ្រោងនឹងប្រកួតលើ២០វិញ្ញាសា ក្នុងនោះមានវិញ្ញាសាសម្តែងទម្រង់មេគុន និងវិញ្ញាសាប្រយុទ្ធ។
ជាទូទៅ តាមគោលការណ៍របស់ក្រសួងអប់រំ យុវជន និងកីឡា ដែលអនុញ្ញាតឲ្យសហព័ន្ធកីឡាគុនល្បុក្កតោកម្ពុជា ក្នុងការដឹកនាំ គ្រប់គ្រង និងរៀបចំកីឡាគុនល្បុក្កតោ គឺឆ្ពោះទៅមុខ ដែលក្នុងរយៈពេលខ្លី គឺការប្រកួតជើងឯកអាស៊ីអាគ្នេយ៍នេះ នាចុងឆ្នាំ២០២១នេះ ហើយតម្រង់ទិសឆ្ពោះ ទៅទទួលធ្វើម្ចាស់ផ្ទះ ស៊ីហ្គេម លើកទី៣២ ឆ្នាំ២០២៣។ រាល់ការប្រកួតជ្រើសរើសជើងឯកថ្នាក់ជាតិ បូករួមទាំងការប្រកួតអន្តរជាតិនានា សហព័ន្ធនៅតែមានគោលដៅធំចម្បងគឺពង្រឹងគុណភាពអោយច្បាស់ ឆ្ពោះទៅកាន់ស៊ីហ្គេម ឆ្នាំ២០២៣ ដែលកម្ពុជាធ្វើជាម្ចាស់ផ្ទះ ព្រោះបើកម្ពុជាមិនសកម្មក្នុងការបញ្ជូនអ្នកជំនាញទៅពង្រឹងសមត្ថភាពដល់កីឡាករប្រទេសជាសមាជិក គឺទោះជាកម្ពុជា ដណ្ដើមបានមេដាយច្រើន លើប្រភេទកីឡានេះ ក៏មិនមែនជារឿងអស្ចារ្យផងដែរ។ គម្រោងប្រកួតជើងឯកល្បុក្កតោ អាស៊ីអាគ្នេយ៍នោះ ក៏ជាជំរុញ និង បំផុស អោយប្រទេសនៅ អាស៊ាន មានកីឡាករចេះជំនាញល្បុក្កតោ ហើយបញ្ជូនមកប្រកួតនៅឆ្នាំ២០២៣ អោយបានគ្រប់ប្រទេសផងដែរ ដើម្បីអាចអោយកម្ពុជា ឈ្នះបានមេដាយច្រើន ដោយកិត្តិយស។
នៅក្នុងការរៀបចំជើងឯកអាស៊ីអាគ្នេយ៍កីឡាគុនល្បុក្កតោ ជាលើកដំបូងនេះ ត្រូវបាន លោក អ៊ូ តារា បង្ហាញថា ម្ចាស់ផ្ទះ ម្ចាស់ក្បាច់គុនព្រលឹងវប្បធម៌ អត្តសញ្ញាណជាតិខ្មែរមួយនេះនឹងអាចជួបការលំបាកខ្លះៗ ដោយយើងត្រូវបំពេញបន្ថែមនូវចំណុចខ្វះខាតមួយចំនួន ដូចជាក្រុមបច្ចេកទេសជាងធ្វើទីលានប្រកួត ដើម្បីសម្រួលឲ្យកាន់តែមានសុវត្ថិភាពដល់ការប្រកួត និងផ្តល់ភាពងាយស្រួលដល់ក្រុមការងារបច្ចេកទេសផងដែរ។ ហើយបញ្ហាកូវីត១៩ ក៏ជាឧបសគ្គផងដែរ ប៉ុន្តែសហព័ន្ធនឹងពុះពាររៀបចំការប្រកួតនេះ អោយទទួលជោគជ័យ បើទោះជាពេលវេលាប្រកួត អាចនឹងត្រូវប្រែប្រួល។
ដកស្រសម្ដីនាពេលកន្លងទៅ លោក អ៊ូ តារា សង្កត់ធ្ងន់យ៉ាងដូច្នេះថា «មែនទែនទៅ ប្រភេទកីឡាគុនល្បុក្កតោរបស់កម្ពុជាយើង ក៏ដូចជាបណ្តាប្រទេសនានា ជាពិសេសក្នុងអាស៊ាននេះ យើងធ្លាប់បានសិក្សាស្វែងយល់ពីគ្នាទៅវិញទៅមកជាមួយគ្នាយូរឆ្នាំណាស់មកហើយដែរ ដែលយើងធ្លាប់បានជួបគ្នាទាំងគ្រូបង្វឹក កីឡាករ កីឡាការិនី នៅក្នុងព្រឹត្តិការណ៍ប្រកួតកីឡាយុទ្ធសិល្ប៍ពិភពលោក (World Martial Arts) ដែលរៀបចំឡើងដោយសម្ព័ន្ធកីឡាយុទ្ធសិល្ប៍ពិភពលោក នៅសាធារណរដ្ឋកូរ៉េ កន្លងទៅ។ ដូច្នេះគេក៏បានសិក្សាពីក្បាច់គុនរបស់យើង ហើយយើងក៏បានសិក្សាពីក្បាច់គុនប្រពៃណីរបស់គេដែរ ដែលនៅក្នុងទម្រង់ក្បាច់គុនបុរាណ នៅក្នុងអាស៊ីអាគ្នេយ៍មានភាពប្រហាក់ប្រហែលគ្នា ដោយកីឡាករ កីឡាការិនីរបស់បណ្តាប្រទេសអាស៊ាន អាចហ្វឹកហាត់ក្បាច់គុនល្បុក្កតោរបស់ខ្មែរយើងបាន អាចគោរពនូវបទបញ្ជានៃការប្រកួតរបស់ក្បាច់គុនយើង ហើយអាចមកចូលរួមប្រកួតប្រជែងជាមួយយើងបាន។ ខ្ញុំយល់ថា មិនចោទទេ សម្រាប់បណ្ដាប្រទេសទាំងនោះ» ។
ជារួម លោកថា កីឡាករ កីឡាការិនីរបស់គេ មិនមែនជាមនុស្សថ្មី ដែលលេងកីឡានេះទេ គឺជាអ្នកក្បាច់គុនរួចជាស្រេច ក៏ប៉ុន្តែត្រូវការហ្វឹកហាត់បន្ថែមទៅលើទម្រង់សិល្បៈក្បាច់គុនល្បុក្កតោ ហើយអាចមកប្រកួតដោយគោរពតាមបទបញ្ជាបច្ចេកទេសជាមួយកីឡារបស់កម្ពុជាបាន ៕
ចែករំលែកព័តមាននេះ