ខេត្តព្រៃវែង ៖ នៅព្រឹកថ្ងៃទី១០ កក្កដា ក្រុមគ្រូពេទ្យជំនាញស្រុកពាមរក៌ រួមជាមួយ និងអាជ្ញាធរស្រុកបានចុះទៅយកសំណាកកម្មករកម្មការិនីចំនួន១១១នាក់ ដែលកំពុងធ្វើការ នៅក្នុងសិប្បកម្មដេរ និងបោកគក់សំលៀកបំពាក់ យ៉ុងស៊ីង ( ឃ្លាំង៤៥ ) ដែលស្ថិតនៅតាមបណ្តោយផ្លូវជាតិលេខ១១ ក្នុងភូមិព្រែកខ្សាយ ឃុំព្រែកខ្សាយ(ក) ស្រុកពាមរក៌ ខេត្តព្រៃវែង និងបានរកឃើញកម្មករកម្មការិនីជាច្រើននាក់ មានវិជ្ជមានជម្ងឺកូវីដ១៩ ។
លោកស្រី សេង ទៀង អភិបាលស្រុកពាមរក៌ បានអោយដឹងថា ការចុះយកសំណាកកម្មករនៅក្នុងសិប្បកម្មនេះ គឺបន្ទាប់ពីបានរកឃើញស្ត្រីម្នាក់ ដែលធ្វើការនៅក្នុងសិប្បកម្មនេះ មានលទ្ធផលតេស្តវិជ្ជមានជម្ងឺកូវីដ១៩ កាលពីថ្ងៃទី៨ កក្កដា ។
ហើយភ្លាមៗនោះ អាជ្ញាធរស្រុកបានហ៊ុំព័ទ្ធទីតាំងនេះ ដោយអោយកម្មករកម្មការិនីទាំងអស់នៅ១កន្លែងក្នុងរោងសិប្បកម្មមិនអោយចេញទៅណា ហើយក៏បានទាក់ទងទៅក្រុមគ្រូពេទ្យជំនាញចុះមកយកសំណាកពួកគាត់ទាំងអស់ភ្លាមៗផងដែរ ប៉ុន្តែដោយក្រុមគ្រូពេទ្យជំនាញជាប់ចុះយកសំណាកទីតាំងផ្សេងទើបពន្យាររហូតមកដល់ព្រឹកថ្ងៃទី១០ កក្កដានេះទៅ ។
ចំណែកលោកវិជ្ជបណ្ឌិត អ៊ិន ពៅ ប្រធានការិយាល័យសុខាភិបាលស្រុកពាមរក៌ បានអោយដឹងថា កម្មករកម្មការិនីនៅក្នុងសិប្បកម្មដេរសំលៀកបំពាក់ យ៉ុងស៊ីង នេះមានចំនួនសរុប១១១នាក់ ហើយក្រោយពីយកសំណាកតេស្តរហ័សរួច ក្រុមគ្រូពេទ្យជំនាញបានរកឃើញកម្មករ កម្មការិនីចំនួន៤២នាក់ មានលទ្ធផលតេស្តវិជ្ជមានជម្ងឺកូវីដ១៩ ហើយត្រូវបាននាំយកមកព្យាបាលនៅក្នុងមណ្ឌលព្យាបាល សាលាបឋមសិក្សាសម្តេចតេជោ ហ៊ុន សែន ព្រែកខ្សាយ(ខ) ។
ចំណែកកម្មករកម្មការិនីផ្សេងទៀតមានលទ្ធផលតេស្តអវិជ្ជមានលើកទី១ ត្រូវបានអាជ្ញាធរនាំយកទៅដាក់ធ្វើចត្តាឡីស័ក នៅក្នុងមូលដ្ឋានរបស់ពួកគេរៀងៗខ្លួន ។
គួរបញ្ជាក់ផងដែរថា គិតត្រឹមថ្ងៃទី៩ កក្កដា ២០២១នេះ ខេត្តព្រៃវែង មានអ្នកឆ្លងជម្ងឺកូវីដ១៩សរុប ចំនួន២០៦២នាក់ ក្នុងនោះព្យាបាលជាសះស្បើយចំនួន១៣៣៧នាក់ កំពុងសំរាកព្យាបាលចំនួន៦៩០នាក់ និងស្លា.ប់៣៥នាក់ ៕
ចែករំលែកព័តមាននេះ