ភ្នំពេញ៖ មកដល់ដើមខែកក្កដានេះ អាជ្ញាធររាជធានីភ្នំពេញ បានប្រកាសថា ប្រតិបត្តិការរំដោះទន្លេចេញពីផ្ទះបណ្តែតទឹក និងបែចិញ្ចឹមត្រី នៅក្នុងភូមិសាស្ត្ររាជធានីភ្នំពេញ កាលពីដើមខែមិថុនា សម្រេចបានស្ទើរទាំងស្រុងហើយ។ ប៉ុន្តែវិធានការនេះ គួរតែបន្តសកម្មភាពទប់ស្កាត់ និងអនុវត្តដូចភ្លៀងរលឹម ហើយធ្វើព្រមៗគ្នា មិនថា នៅភ្នំពេញ ឬនៅបណ្តាខេត្តនានាទេ ដើម្បីកុំឲ្យក្រុមអ្នកចិញ្ចឹមត្រី និងអ្នករស់នៅលើផ្ទះបណ្តែត ចូលមកបោះទីតាំងឡើងវិញ ឬក៏បន្តមានវត្តមានលើទន្លេរបស់យើងតទៅទៀត។
នៅក្នុងកិច្ចប្រជុំ លើកទី២៦ របស់ក្រុមប្រឹក្សារាជធានីភ្នំពេញ កាលពីព្រឹកថ្ងៃទី៨ ខែកក្កដា ឆ្នាំ២០២១ នៅសាលារាជធានីភ្នំពេញ អាជ្ញាធររាជធានីភ្នំពេញ បានលើកបង្ហាញរបាយការណ៍ពាក់ព័ន្ធនឹងការអនុវត្តវិធានការរៀបចំសណ្តាប់ធ្នាប់ របៀបរៀបរយ ទៅលើបែរត្រី ផ្ទះបណ្ដែតទឹក និងសំណង់មិនរៀបរយ នៅលើផ្ទៃទន្លេ នៅរាជធានីភ្នំពេញ ដែលគិតដល់ពេលនេះ អាជ្ញាធររាជធានីភ្នំពេញ អនុវត្តការងាររបស់ខ្លួន សម្រេចបានប្រមាណ ៩៥ ភាគរយហើយ។
អាជ្ញាធររាជធានីភ្នំពេញ ចាត់ទុកថា នេះជាការអនុវត្តវិធានការរៀបចំសណ្ដាប់ធ្នាប់លើផ្ទៃទន្លេ បានយ៉ាងរលូន និងទទួលបានជោគជ័យ។ នោះគឺរាជធានីភ្នំពេញ មានខណ្ឌចំនួន៦ ដែលមានផ្ទះ បណ្ដែតទឹក បែត្រី និងសំណង់មិនរៀបរយ នៅតាមដងទន្លេ រួមមាន៖ ខណ្ឌព្រែកព្នៅ ខណ្ឌជ្រោយចង្វារ ខណ្ឌឫស្សីកែវ ខណ្ឌចំការមន ខណ្ឌមានជ័យ និងខណ្ឌច្បារអំពៅ។ ផ្ទះបណ្ដែតទឹក បែត្រី និងសំណង់មិនរៀបរយ នៅតាមដងទន្លេ មានចំនួន រហូតដល់ ១.៤៧២ ទីតាំង ចែកចេញជា ៤ ប្រភេទ ក្នុងនោះ មានប្រភេទជាបែត្រី សំណង់មិនរៀបរយ ដាយត្រី និងទូកនេសាទ ក្នុងចំនួននេះ មានបងប្អូនប្រជាពលរដ្ឋ បានស្ម័គ្រចិត្តរុះរើចេញមកលើគោក មានចំនួន ១.២៤២ ទីតាំង។
ក្នុងវិធានការកន្លងមកនេះ អាជ្ញាធររាជធានីភ្នំពេញ បានរៀបចំឲ្យក្រុមអ្នកចិញ្ចឹមត្រីជាបណ្តោះអាសន្នមួយចំនួន ទៅតាំងទីចល័ត នៅ ២ទីតាំងផ្សេងគ្នា។ ទីតាំងទី១ នៅជាប់ព្រំប្រទល់រវាងស្រុកពញាឮ និងខណ្ឌព្រែកព្នៅ មានចំនួន ១៩៤បែចិញ្ចឹមត្រី។ ទីតាំងទី២ នៅជាប់នឹងស្រុកលើកដែក ខេត្តកណ្តាល ចំនួន ១៩បែចិញ្ចឹមត្រី។
រដ្ឋបាលរាជធានីភ្នំពេញ លើកឡើងថា ការអនុវត្តនូវវិធានការរៀបចំសណ្តាប់ធ្នាប់ របៀបរៀបរយ ទៅលើបែចិញ្ចឹមត្រី ផ្ទះបណ្ដែតទឹក និងសំណង់មិនរៀបរយ នៅលើផ្ទៃទឹក តាមដងទន្លេ នៅរាជធានីភ្នំពេញនេះ ទទួលបានជោគជ័យ គឺដោយសារយើងមានវិធានការចំពោះមុខល្អប្រសើរ សហការបានល្អ ជាមួយដៃគូពាក់ព័ន្ធ និងមានការគាំទ្រពីមហាជនយ៉ាងពេញទំហឹង។
កាលពីថ្ងៃទី១២ ខែមិថុនា ឆ្នាំ២០២១ កន្លងមកនេះ អាជ្ញាធររាជធានីភ្នំពេញ តាមរយៈបណ្តាខណ្ឌជាប់ដងទន្លេ បានប្រើវិធានការរដ្ឋបាល ចុះទៅរុះរើបែចិញ្ចឹមត្រី ផ្ទះបណ្តែតទឹក ផ្ទះតូចៗ និងសំណង់មិនរៀបរយ នៅលើផ្ទៃទន្លេ ដើម្បីបើកផ្លូវនាវាចរ កុំអោយប៉ះពាល់ដល់ប្រព័ន្ធអេកូឡូហ្ស៊ី មានចរន្តទឹកហូរ គោករាក់ ពិសេសកុំអោយបន្តការប្រើប្រាស់ចំណី សម្រាប់ចិញ្ចឹមត្រី និងការបញ្ចេញកាកសំណល់ ការបន្ទោរបង់ ពាសវាលពាសកាល ក្នុងទន្លេ ធ្វើឱ្យខូចខាតយ៉ាងធ្ងន់ធ្ងរ ដល់ជីវៈចម្រុះក្នុងទឹក ខូចគុណភាពទឹក បំពុល បរិស្ថាន និងប៉ះពាល់ដល់សោភ័ណភាព រាជធានីភ្នំពេញ ព្រមទាំងប៉ះពាល់ដល់សុខភាពប្រជាពលរដ្ឋ ដែលបានប្រើប្រាស់ទឹកមិនស្អាតផងដែរ។ ការងារនេះ ទទួលបាននូវការគាំទ្រយ៉ាងពេញទំហឹងពីប្រជាពលរដ្ឋគ្រប់មជ្ឈដ្ឋាន។
យ៉ាងណាក៏ដោយ នៅមានបែចិញ្ចឹមត្រី ផ្ទះបណ្តែតទឹក និងសំណង់មិនរៀបរយ នៅលើផ្ទៃទន្លេ ក្នុងភូមិសាស្ត្ររាជធានីភ្នំពេញ ៥% មិនទាន់រុះរើចេញ ពិសេសបែចិញ្ចឹមត្រីសរុប ២១៣បែចិញ្ចឹមត្រី ដែលបន្តវត្តមាននៅបឹងទន្លេសាប ក្នុងភូមិសាស្ត្រជាប់ស្រុកពញាឮ ខេត្តកណ្តាល និងនៅទន្លេមេគង្គក្រោម ក្នុងភូមិសាស្ត្រជាប់ស្រុកលើកដែក ខេត្តកណ្តាល។
វត្តមានបែចិញ្ចឹមត្រី ផ្ទះបណ្តែតទឹក និងសំណង់មិនរៀបរយ បន្តនៅលើផ្ទៃទន្លេទាំងនោះ នៅតែអាចបង្កផលប៉ះពាល់ដល់ប្រព័ន្ធអេកូឡូហ្ស៊ី ដោយសារតែការបន្តប្រើប្រាស់ចំណី សម្រាប់ចិញ្ចឹមត្រី និងការបញ្ចេញកាកសំណល់ ការបន្ទោរបង់ក្នុងទន្លេ ធ្វើឱ្យខូចខាតយ៉ាងធ្ងន់ធ្ងរ ដល់ជីវៈចម្រុះក្នុងទឹក ខូចគុណភាពទឹក និងបំពុលបរិស្ថាន ជាដើម។
យ៉ាងណាក៏ដោយ វិធានការគួរឲ្យអបអរសាទររបស់រដ្ឋបាលរាជធានីភ្នំពេញ ពេលនេះ ក៏ចាត់ទុកថា ជាសមិទ្ធផលថ្មីមួយទៀត ប្រសើរជាងការមិនបានធ្វើអ្វីសោះ។ តែដើម្បីឲ្យទន្លេរបស់យើង ត្រូវរំដោះបានទាំងស្រុង ហើយរក្សាបាននូវគុណភាពទឹក ជីវៈចម្រុះក្នុងទឹក និងកុំឲ្យមានការបំពុលបរិស្ថានតទៅទៀតនោះ គួរតែបញ្ចប់ទាំងស្រុងតែម្តង ឈប់ឲ្យមានអ្នករស់នៅលើទឹក និងការចិញ្ចឹមត្រីលក្ខណៈអាជីវកម្មធំៗ តាមបែចិញ្ចឹមត្រីរាប់រយពាន់ត្រីក្នុង១បែៗ នៅក្នុងទន្លេរបស់យើងតទៅទៀត មិនថា នៅភ្នំពេញ ឬនៅតាមខេត្តណាណានោះទេ។
វិធានការរំដោះទន្លេនេះ ត្រូវតែធ្វើរួមគ្នា ទាំងនៅភ្នំពេញ និងទាំងនៅតាមបណ្តាខេត្តជាប់ដងទន្លេទាំងអស់ រាប់ទាំងទន្លេសាប រហូតដល់ទន្លេបាសាក់ និងទន្លេមេគង្គ ទាំងមេគង្គលើ និងទាំងមេគង្គក្រោមតែម្តង។
គ្មានអ្វីធ្វើមិនបានទេ បើសិនជារាជរដ្ឋាភិបាល និងអាជ្ញាធររាជធានីខេត្តទាំងអស់ ព្រមព្រៀងគ្នា ថានឹងធ្វើ។ ដូចករណីនៅភ្នំពេញ ក្នុងយុទ្ធនាការកាលពីខែមិថុនាកន្លងមកថ្មីៗនេះ ជាឧទាហរណ៍ស្រាប់។
ប៉ុន្តែវិធានការរបស់រដ្ឋបាលរាជធានីភ្នំពេញ នឹងមិនជោគជ័យទាំងស្រុងឡើយ បើសិនជាបន្តឲ្យមានអ្នករស់នៅផ្ទះបណ្តែតទឹក និងបន្តមានបែចិញ្ចឹមត្រី ទោះជាថា ពេលនេះ បានអូសចល័តចេញពីកន្លែងចាស់ហើយក៏ដោយ។
មិនយូរមិនឆាប់ទេ បើសិនជាមិនមានវិធានការស្រង់យកអ្នកចិញ្ចឹមត្រី និងអ្នករស់នៅលើផ្ទះបណ្តែតទឹក និងអ្នករស់នៅលើទូក យកមកលើគោក។ គឺដូចជាចក ឬកំផ្លោក យូរៗនឹងរសាត់អណ្តែត ហើយកកើតជាសហគមន៍ច្រើននាក់ឡើងវិញ ជាមិនខាន បើសិនជាអាជ្ញាធរមូលដ្ឋាន ភ្លេចខ្លួន ឬក៏ទទួលលុយកាក និងផលប្រយោជន៍ពីក្រុមអ្នករស់នៅ និងអ្នកចិញ្ចឹមត្រីទាំងនោះ។
ដើម្បីឲ្យទឹកទន្លេ និងបរិស្ថានល្អស្អាត នៅតាមដងទន្លេ គួរតែរាជរដ្ឋាភិបាល ក្រសួងពាក់ព័ន្ធ ពិសេសអាជ្ញាធររាជធានីខេត្ត ក៏មិនត្រូវភ្លេចចំពោះក្រុមអ្នកសាងសង់ផ្ទះរស់នៅតាមច្រាំងទន្លេ ដែលសព្វថ្ងៃ មានកាន់តែច្រើនទៅៗ មិនថា នៅភ្នំពេញ ឬតាមខេត្តនោះឡើយ។ អ្នកទាំងនោះ បង្ហូរកាកសំណល់ ទឹកលូបង្គន់ចូលទន្លេតែម្តង។
ម្យ៉ាងទៀត លូបង្ហូរទឹកស្អុយ ចូលទន្លេ ក៏គួរតែគិតគូឡើងវិញផងដែរ។ នៅភ្នំពេញ ក៏មានច្រើន មានទាំងប្រឡាយទឹកស្អុយ កខ្វក់ថែមទៀត ត្រូវបានបង្ហូរចូលទន្លេរាប់ឆ្នាំមកហើយ។ ចំណុចនេះ មិនត្រូវមើលរំលងនោះទេ ខណៈដែលកាកសំណល់សំរាម ក៏ត្រូវបានគេបោះចោលតាមច្រាំងទន្លេ និងអណ្តែតតាមមាត់ទឹកច្រើនគួរសម កាន់តែច្រើនទៅៗ។
ជាសរុបមក វិធានការរបស់រដ្ឋបាលរាជធានីភ្នំពេញកន្លងមក ហាក់ដូចជាការចាប់ផ្តើម ក្នុងយុទ្ធនាការរំដោះទន្លេពីក្រុមអ្នករស់នៅបណ្តែតទឹក និងក្រុមអ្នកចិញ្ចឹមត្រី ដែលភាគច្រើន ជាជនជាតិវៀតណាម។ តែយុទ្ធនាការនេះ នឹងត្រូវការពេលយូរថែមទៀត បូករួមនឹងគោលនយោបាយច្បាស់លាស់ជាងនេះ ជាជាងគ្រាន់តែរុញច្រានបែត្រី ផ្ទះបណ្តែតទឹក និងទូក ចេញតែពីទីតាំងចាស់។
ករណីនៅខេត្តកំពង់ឆ្នាំង និងសហគមន៍តាមទន្លេសាបជាច្រើនទៀត ជាឧទាហរណ៍ ដែលយូរឆ្នាំមកហើយ បន្តដល់សព្វនៅតែមានក្រុមអនិកជនវៀតណាម រស់នៅលើទឹក និងចិញ្ចឹមត្រី ហើយជាលទ្ធផលទន្លេយើង កាន់តែក្សត់ត្រីពីមួយឆ្នាំទៅមួយឆ្នាំ ដោយសារតែការបំពុលបរិស្ថាន និងការប៉ះពាល់ដល់ជីវចម្រុះក្នុងទឹកនេះឯង៕
ចែករំលែកព័តមាននេះ