រាជធានីភ្នំពេញ ៖ ច្បាស់ការហើយ ទីបំផុតវៀតណាមបានសម្រេចពន្យាពេលស៊ីហ្គេម លើកទី៣១ ឆ្នាំ២០២១ទៅធ្វើនាឆ្នាំ២០២២ខាងមុខវិញ ដោយមិនអាចរៀបចំនៅចុងឆ្នាំ២០២១នេះ។ នេះតាមការបញ្ជាក់របស់លោកវ៉ាត់ ចំរើន អគ្គលេខាធិការ គណៈកម្មាធិការជាតិអូឡាំពិកកម្ពុជា (NOCC) ក្រោយបញ្ចប់កិច្ចប្រជុំក្រុមប្រឹក្សាកីឡាអាស៊ីអាគ្នេយ៍ តាមប្រព័ន្ធអនឡាញ នៅរសៀលថ្ងៃទី៨ ខែកក្កដា ឆ្នាំ២០២១។
លោក វ៉ាត់ ចំរើន បានជម្រាបជូនជាដំណឹងថា ក្រោយបញ្ចប់លទ្ធផលនៃកិច្ចប្រជុំក្រុមប្រឹក្សាកីឡាអាស៊ីអាគ្នេយ៍ ដែលមានគណៈកម្មាធិការជាតិនៃបណ្តាប្រទេសនានាក្នុងអាស៊ីអាគ្នេយ៍ ថ្ងៃនេះ គឺថា គណៈអចិន្ត្រៃយ៍ស៊ីហ្គេម (SEA Games) ចំនួន១១ប្រទេសបានចូលរួមប្រជុំតាម Zoom បញ្ចប់នាម៉ោង៣រសៀល ថ្ងៃទី៨ កក្កដា ២០២១ ដោយមាន២ចំណុចសំខាន់ៗ រួមមាន៖ ១-SEA Games នៅវៀតណាមមិនរៀបចំឆ្នាំ២០២១នេះទេ ដែលឯកភាពជាឯកច្ឆ័ន។ ២-SEA Games នៅវៀតណាម ឯកភាពគ្នាចំនួន១០ប្រទេស រួមទាំងម្ចាស់ផ្ទះអូឡាំពិកវៀតណាម (ហ្វីលីពីនចំថ្ងៃបោះឆ្នោតសកល នាខែឧសភា) លើកទៅចុងខែមេសា ដល់ដើមខែឧសភា ឆ្នាំ២០២២ ប៉ុន្តែអូឡាំពិកវៀតណាមត្រូវស្នើសុំអនុម័ត និងកំណត់ថ្ងៃឲ្យបានច្បាស់លាស់ពីរដ្ឋាភិបាលរបស់ខ្លួន ក្នុងពេលឆាប់ៗនេះ»។
គេនៅចាំបានថា វៀតណាមធ្លាប់បានធ្វើការប្ដេជ្ញាចិត្តពីមុនមកថា ដាច់ខាតរៀបចំការប្រកួតកីឡាស៊ីហ្គេមនៅក្នុងឆ្នាំ២០២១ឲ្យទាល់តែបាន ប៉ុន្តែដោយសារការរីករាលដាលនៃជំងឺកូវីដ-១៩ ធ្ងន់ធ្ងរ បានធ្វើឲ្យម្ចាស់ផ្ទះ វៀតណាម ផ្លាស់ប្ដូគំនិតស្នើសុំដល់បណ្តាប្រទេសនានាក្នុងអាស៊ីអាគ្នេយ៍ជាច្រើនលើក ស្តីពីការពន្យាពេលពីឆ្នាំ២០២១ ទៅឆ្នាំ២០២២វិញ បន្ទាប់ពីកាលពីដំបូង ម្ចាស់ផ្ទះស៊ីហ្គេមលើកទី៣១មួយនេះបានស្នើសុំ១សេណារីយោផ្សេងទៀតថា ចង់ស្នើសុំធ្វើស៊ីហ្គេម នៅឆ្នាំ២០២៥ ឬឆ្នាំ២០២៧ ប៉ុន្តែម្ចាស់ផ្ទះស៊ីហ្គេមទាំងពីរនេះមិនព្រមឡើយ៕ ដោយ ៖ អ៊ុំ សំអូន
ចែករំលែកព័តមាននេះ