រាជធានីភ្នំពេញ ៖ ក្រុមគ្រូពេទ្យ និងអាជ្ញាធរសង្កាត់បឹងទំពន់ទី១ បានបន្តរកឃើញអ្នកវិជ្ជមានកូវីដ១៩ ចំនួន១២នាក់ទៀតហើយ នៅក្នុងមូលដ្ឋានសង្កាត់បឹងទំពន់ទី១ នៃខណ្ឌមានជ័យ នៅវេលាថ្ងៃទី០៨ ខែកក្កដា ឆ្នាំ២០២១ ប៉ុន្តែអ្នកទាំង១២នោះ ពុំត្រូវបានដឹកយកទៅព្យាបាលនៅមន្ទីរពេទ្យ ឬទីតាំងសម្រាប់សម្រាកព្យាបាលឡើយ គឺក្រុមគ្រូពេទ្យអនុញ្ញាតអោយមានការព្យាបាលដោយខ្លួនឯងនៅក្នុងផ្ទះរៀងៗខ្លួន ។
អ្នកវិជ្ជមានទាំង១២នាក់នោះ គឺរស់នៅក្នុងភូមិចំនួន៣ នៃសង្កាត់បឹងទំពន់ទី១ មានភូមិសន្សំកុសល២ , ភូមិចំរើនផល១ និងភូមិចំរើនផល៤ ។
លោក កុយ សាមឺឌី ស្មៀនសង្កាត់បឹងទំពន់ទី១ បានប្រាប់អោយដឹងថា អ្នកវិជ្ជមានកូវីដ១៩ ទាំង១២នាក់ ដែលត្រូវក្រុមគ្រូពេទ្យអនុញ្ញាតអោយព្យាបាលដោយខ្លួនឯងនៅក្នុងផ្ទះ គឺក្រុមគ្រូពេទ្យបានធ្វើការពិនិត្យលើអាការៈសុខភាព ឃើញថា មានសុខភាពមាំទាំល្អ ហើយទីសំណាក់របស់ពួកគេ គឺមានលក្ខណៈធំទូលាយ មានខ្យល់គ្រប់គ្រាន់ចេញ-ចូល ទើបក្រុមគ្រូពេទ្យសម្រេចអនុញ្ញាតអោយសម្រាកនៅផ្ទះព្យាបាល ដោយគោរពតាមគោលការណ៍ណែនាំមួយចំនួន ជាពិសេសវិធានសុខាភិបាល ។
លោកស្មៀនសង្កាត់ដដែលបន្តថា អ្នកវិជ្ជមានទាំង១២នាក់ ត្រូវបានណែនាំអោយដាក់ខ្លួននៅដាច់ដោយឡែកពីសមាជិកក្នុងគ្រួសារ ហើយត្រូវពាក់ម៉ាស់ បាញ់អាល់កុលអោយទៀងទាត់ ត្រូវនៅកន្លែងដែលមានខ្យល់ចេញ-ចូល ធ្វើលំហាត់ប្រាណជាប្រចាំ សម្រាក និងញុំាម្ហូបអាហារដែលមានជីវជាតិគ្រប់គ្រាន់ ក៏ដូចជាញុំាទឹកអោយបានច្រើន ហើយពិសេសនោះ បើក្នុងករណីអាការៈសុខភាពមានការធ្វើទុក្ខណាមួយនោះ គឺត្រូវទំនាក់ទំនងទៅកាន់ក្រុមគ្រូពេទ្យដែលប្រចាំការក្នុងមូលដ្ឋានសង្កាត់ ដើម្បីចុះពិនិត្យតាមដានអាការៈសុខភាពបន្តទៀត ។
លោកបានបន្តថា ចំពោះកុមារតូចៗ ឬមនុស្សចាស់ជរានោះ គឺពុំត្រូវអនុញ្ញាត្តិអោយមានការសម្រាកព្យាបាលនៅផ្ទះឡើយ គឺត្រូវដឹកយកទៅព្យាបាល លើកលែងតែជាមនុស្សជំទង់ មានសុខភាពមាំទាំ ពេញកម្លាំងប៉ុណ្ណោះដែលត្រូវបានអនុញ្ញាត ។
ទន្ទឹមនឹងការអនុញ្ញាតអោយសម្រាកនៅផ្ទះដោយខ្លួនឯងនោះ គឺពុំមានការផ្តល់ថ្នាំសម្រាប់លេបឡើយ ដោយសារមិនទាន់មានគោលការណ៍ក្នុងការផ្តល់ជូនសម្រាប់លេប ។ ក្នុងនោះក្រុមគ្រូពេទ្យបានណែនាំអោយអ្នកជំងឺអាចពឹងពាក់បងប្អូនសាច់ញាតិ ឬអ្នកស្គាល់គ្នា ជួយទិញថ្នាំតាមឱសថស្ថានមកលេបដោយខ្លួនឯង ឧទាហរណ៍ថា បើមានអាការៈឈឺ.ក សូមទិញថ្នាំឈឺ.ក មានឈឺក្បាលសូមទិញថ្នាំព្យាបាលជាដើម ។
សូមបញ្ជាក់ថា ចំពោះទីតាំងដែលត្រូវរកឃើញមានអ្នកវិជ្ជមានកូវីដ១៩ហើយនោះ ក្រុមអាជ្ញាធរបានសម្រេចធ្វើការឃ្លុំប៉េទីតាំងជាបណ្តោះអាសន្ន ។ ក្នុងនោះដែរ សមាជិកដែលនៅក្នុងទីតាំង ក្រោយតេស្តសំណាកឃើញថា អវិជ្ជមានហើយនោះ គឺត្រូវតម្រូវអោយធ្វើចត្តាឡីស័ក១៤ថ្ងៃទាំងអស់គ្នា ។
គួរបញ្ជាក់ទៀតថា ចំពោះការអនុញ្ញាតអោយអ្នកជំងឺសម្រាកព្យបាលនៅផ្ទះដោយខ្លួនឯងនោះ គឺពុំមែនជាការអនុញ្ញាត្តិអោយឯកឯងពីសំណាក់ក្រុមគ្រូពេទ្យឡើយ គឺដោយមានការស្នើសុំពីអ្នកជំងឺ ហើយបន្ទាប់ពីមានការស្នើសុំរួច ក្រុមគណៈកម្មាការ មានគ្រូពេទ្យ និងអាជ្ញាធរតំបន់ នឹងពិនិត្យ រួចធ្វើការវាយតម្លៃទៅលើអាការៈអ្នកជំងឺ ទីតាំងសំណាក់ដែលកំពុងរស់នៅ បូករួមជាមួយចំនួនសមាជិកក្នុងគ្រួសារជាដើម មុននឹងឈានដល់ការអនុញ្ញាតអោយសម្រាកព្យាបាលនៅផ្ទះដោយខ្លួនឯង ។ ហើយវិធាននៃការព្យាបាល និងការពារ គឺដូចបានរៀបរាប់នៅខាងលើ ៕
ចែករំលែកព័តមាននេះ