ខេត្តព្រៃវែង ៖ ប្រជាពលរដ្ឋប្រមាណជា៥គ្រួសារនៅភូមិព្រែករាំង ឃុំបន្លិចប្រាសាទ ស្រុកពាមរក៌ កំពុងតែព្រួយបារម្ភជាខ្លាំង រឿងអត់មានផ្លូវធ្វើដំណើរទៅធ្វើស្រែ និងទៅវត្ត ដោយសារតែផ្លូវដែលពួកគាត់ធ្លាប់ប្រើប្រាស់រាល់ថ្ងៃ រាប់សិបឆ្នាំមកហើយនោះ ពេលនេះ ត្រូវមន្ត្រីអាវុធហត្ថបុណ្យស័ក្តិធំម្នាក់ ចាក់ដីធ្វើរបងបិទជិតអស់ហើយ។
ពលរដ្ឋទាំងនោះបានអោយដឹងថា ផ្លូវ១ខ្សែនេះ ជាប្រភេទផ្លូវលំមានទទឹង៤ម៉ែត្រ ស្ថិតនៅតាមបណ្តោយដងទន្លេតូច តភ្ជាប់ពីចំណុចកំពង់ដរ…. ចាក់រហូតទៅដល់ទីរួមស្រុកពាមរក៌ ដែលមានប្រវែងជាង១០គីឡូម៉ែត្រ និងមានប្រជាពលរដ្ឋរាប់ពាន់គ្រួសារ ប្រើប្រាស់ផ្លូវនេះធ្វើដំណើរឆ្លងកាត់រាល់ថ្ងៃ។ ប៉ុន្តែប៉ុន្មានខែមុននេះ មានមន្ត្រីអាវុធហត្ថម្នាក់ឈ្មោះ រស់ សុធី ជាមេបញ្ជាការរងកងរាជអាវុធហត្ថខេត្តព្រៃវែង មានដីមួយកន្លែងនៅជាប់ផ្លូវនេះ ចំងាយប្រមាណជា ជិត៥០ម៉ែត្រពីកំពង់ដរ គេបានចាក់ដីលើកភូមិរបស់គេ ហើយក៏ចាក់បង្ហួសរហូតដល់មាត់ទន្លេ រំលោភយកដីផ្លូវទាំងមូល និងបានធ្វើរបងចាក់សោរបិទជិតតែម្តង។
ប្រភពដដែលនេះបានបន្តទៀតថា សំរាប់ប្រជាពលរដ្ឋដែលនៅខាងលិចដីគេចាក់បិទនេះ គឺមិនពិបាកទេ គឺអាចធ្វើដំណើរទៅស្រែចំការ ទៅធ្វើការប្រកបមុខរបរផ្សេងៗបានជាធម្មតា ប៉ុន្តែសំរាប់ពួកគាត់៤-៥គ្រួសារ ដែលនៅខាងកើតដីគេចាក់បិទនេះ គឺពិបាកខ្លាំងណាស់ ព្រោះដីស្រែនៅខាងលិច ចង់ទៅស្រែ ឬចង់ដឹកគោក្របីទៅវាល ត្រូវដឹកដើរតាមដីជំរាលជ្រៅ ដែលគេទើបចាក់សុទ្ធតែភក់ល្បាប់ នៅជាប់មាត់ទឹកទន្លេ ទំហំមិនដល់២តឹកផងទេ គឺពិបាកខ្លាំងណាស់។
ជុំវិញរឿងរ៉ាវខាងលើនេះ លោក កង សុខាន់ មេឃុំបន្លិចប្រាសាទ បានអោយដឹងថា ការចាក់ដីរបស់លោក រស់ សុធី នោះគឺគាត់ស្នើសុំមកខាងឃុំ សុំចាក់ដីធ្វើផ្លូវអោយ ដើម្បីងាយស្រួលធ្វើដំណើរឆ្លងកាត់ទាំងអស់គ្នា ប៉ុន្តែក្រោយពីចាក់ដីហើយស្រាប់តែលឺមានប្រជាពលរដ្ឋប្តឹង ថាចាក់ដីរំលោភយកផ្លូវ ទើបអាជ្ញាធរស្រុកនិងឃុំ បានចុះទៅពិនិត្យមើលជាក់ស្តែងម្តងដែរ តែពេលទៅដល់ម្ចាស់ដីមិននៅ គឺបានត្រឹមធ្វើរបាយការណ៌ ទៅអោយលោកស្រីអភិបាលស្រុកប៉ុណ្ណោះ ហើយមកដល់ពេលនេះ ក៏មិនទាន់មានគោលការណ៌ដោះស្រាយយ៉ាងម៉េចដែរ។
ដោយឡែក លោក វ៉ា ធីម អភិបាលរងស្រុកពាមរក៌ ទទួលបន្ទុកដោះស្រាយទំនាស់ដីធ្លី បានអោយដឹងនៅព្រឹកថ្ងៃទី៨ កក្កដា នេះថា រឿងលោក រស់ សុធី មេបញ្ជាការរងកងរាជអាវុធហត្ថខេត្តព្រៃវែង ចាក់ដីរំលោភយកផ្លូវសាធារណៈនេះ គឺមានប្រជាពលរដ្ឋបានដាក់ពាក្យប្តឹងមកខាងអាជ្ញាធរ ហើយរូបលោកបានដឹកនាំមន្ត្រីស្រុកនិងឃុំ ចុះទៅពិនិត្យមើលជាក់ស្តែងឃើញថា គាត់ពិតជាបានចាក់ដីរំលោភយកផ្លូវសាធារណៈមែន មិនត្រឹមតែប៉ុណ្ណឹង គឺថែមទាំងរំលោភយកទាំងដីចំណីទន្លេថែមទៀតផង ហើយលោកក៏បានស្នើសុំគោលការណ៌ ទៅលោកស្រីអភិបាលស្រុក ដើម្បីចេញលិខិតកោះហៅលោក រស់ សុធី ជាភាគីរំលោភអោយចូលខ្លួនមកដោះស្រាយផងដែរ ប៉ុន្តែដោយភ្លាមៗនោះនៅតំបន់អ្នកលឿង ស្រុកពាមរក៌ មានផ្ទុះកើតជម្ងឺកូវីដ១៩ ទើបរូបលោកនិងអាជ្ញាធរពាក់ពន្ធ័ ត្រូវជាប់ដៃរឿងកូវីដនេះសិនទៅ។
ទោះជាយ៉ាងណាក៏ដោយ លោក វ៉ា ធីម បានបញ្ជាក់ថា ក្នុងនាមអាជ្ញាធរស្រុកលោកមិនបណ្តែតបណ្តោយអោយជនខិលខូច លួចរំលោភបំពានយកសម្បត្តិសាធារណៈរបស់រដ្ឋ ស្រេចតែអំពើចិត្តបែបនេះទេ ដោយលោកនិងតម្រូវអោយលោក រស់ សុធី រុះរើរបងដែលសង់រំលោភយកដីផ្លូវ និងដីចំណីទន្លេចេញអោយអស់ មិនទុកអោយនៅជាគំរូអាក្រក់ដល់អ្នកដទៃ បែបនេះទេ ប៉ុន្តែការងារនេះលោកនិងចុះធ្វើ នៅពេលដែលស្ថានភាពការឆ្លងរាលដាលជំងឺកូវីដ១៩ នៅក្នុងមូលដ្ឋាន មានភាពប្រសើរឡើងវិញសិន។
ព័ត៌មានបន្ថែមនឹងមានផ្សាយជូនបន្តលើកាសែតកោះសន្តិភាព ។
ចែករំលែកព័តមាននេះ