រាជធានីភ្នំពេញ ៖ អាជ្ញាធរ សង្កាត់ គោករការ ត្រូវបានគេចោទប្រកាន់បានផ្តួចផ្តើមគំនិត ដោយមានការផ្តិតមេដៃឯកភាពពីអ្នកភូមិចំនួនជាង៩គ្រួសារនាំគ្នាលក់ដីស្រះរួមមួយកន្លែងទំហំប្រមាណជាង៤ពាន់ម៉ែត្រការ៉េក្នុងតម្លៃជិត១លានដុល្លារ ដើម្បីចែក និងបានអះអាងថា ទុកមួយចំនួន ដើម្បីស្ថានបនាផ្លូវ ។ ការលក់ដីរួមគ្នាត្រូវគេដឹងថា មានភ្លើង ខៀវ ពីលោកសុខ សម្បត្តិ អភិបាលខណ្ឌព្រែកព្នៅផងដែរ នេះបើតាមការបង្ហើបអោយដឹងពីមូលដ្ឋាន។
អ្វីដែលមានការចាប់អារម្មណ៍ អ្នកខ្លះបានធ្វើការចោទប្រកាន់ថា អ្នកទិញជាក្រុមហ៊ុនលោក សន ស៊ិន ចៅសង្កាត់ គោករការតែម្តង ។ ដីស្រះដែលត្រូវអាជ្ញាធរ រួមនិងអ្នកភូមិលក់នោះត្រូវគេដឹងថា មានទំហំ៤២៥៧ម៉ែត្រការ៉េ ជាដីស្រះត្រពាំងអង្គ ហៅថាទួលអង្គលោកតា ស្ថិតនៅក្នុងភូមិបែកបក សង្កាត់គោករកា ខណ្ឌព្រែកព្នៅ រាជធានីភ្នំពេញ។
តាមប្រវត្តិដីនេះ អ្នកស្រុកអោយដឹងថា ដីត្រពាំងអង្គនេះជាដីរួមភូមិ សម្រាប់គោរពបូជាតាំងពីដូនតា ។ទីនោះ មានទួលអង្គបុរាណ ដែលមានដើមឈើ និងស្រះទឹកព័ទ្ធជុំវិញ។ ក្រោយមកដីនោះ ខ្លះត្រូវបានកាន់កាប់អាស្រ័យផលនិងបានក្លាយជាកម្មសិទ្ធិបុគ្គល នៅសល់តែស្រះទឹកនិងទីទួល ហើយពេលនោះ ត្រូវបានអាជ្ញាធរលក់ចែកគ្នា និងបានចាក់ដីរួចរាល់ហើយកាលពីប៉ុន្មានថ្ងៃមុននេះ ។ តាមព័ត៌មានបានអោយដឹងថា ដីស្រះនោះ លក់ក្នុងតម្លៃ១ម៉ែត្រការ៉២០០ដុល្លារ គុណនឹង៤២៥៧ម៉ែត្រការ៉េ ស្មើ៨៥១.៤០០ដុល្លារ។
នៅក្នុងការផ្តួចផ្តើមលក់ដូរក្រោមរូបភាពដោយអោយប្រជាពលរដ្ឋចំនួន៩៥គ្រួសារបានផ្តិតមេដៃ ឯកភាពលក់ដោយបានបែងចែកជាចំណែក ១-អាជ្ញាធរសង្កាត់យក៣០$ក្នុងមួយម៉ែត្រការ៉េ ដោយលើកហេតុផលថា សេវារត់ការ និងទុកធ្វើផ្លូវ, ២-អ្នកតំណាងពលរដ្ឋជាង១០នាក់ បានចំណែក២០$និង៣.សល់១៥០$ ក្នុងមួយម៉ែត្រការ៉េធ្វើការបែងចែក។
តាមព័ត៌មានអោយដឹងទៀតថា បន្ទាប់ពីធ្វើការបែងចែក មានអ្នកភូមិចំនួន៦គ្រួសារ ក្នុងចំណោមអ្នកភូមិ៩៥គ្រួសារ មិនព្រមផ្តិតមេដៃនោះទេ តែក្រោយមក អាជ្ញាធរសង្កាត់ហៅទៅជួបសម្របសម្រួល ទំនង់ជាបានរាងសើមមាត់បន្តិច និងម្យ៉ាងទៀតដឹងថា ពាក់ព័ន្ធលោកចៅសង្កាត់ក៏បានឯកភាព។ នៅក្នុងការលក់ដីរួមនេះ ក៏មានការដឹងឭពីថ្នាក់ខណ្ឌ រាជធានីភ្នំពេញផងដែរ។
លោកសន ស៊ិន ចៅសង្កាត់គោករការ បានអោយដឹងថា មានការលក់ដីរួមនោះពិតមែន តែមិនមែនលោកជាអ្នកលក់ទេ គឺប្រជាពលរដ្ឋនាំគ្នា ផ្តិតមេដៃស្នើរមកលក់ ។ ចំណែកអ្នកទិញក៏៏មិនមែនលោកដែរ។ ដីលក់នោះ លក់ក្នុងតម្លៃក្នុង១ម៉ែត្រការ៉េតែ១៥០ដុល្លារ មិនមែន២០០ដុល្លារនោះទេហើយចែកគ្នាបានម្នាក់ជាង១ពាន់ដុល្លារ ។ លោកចៅសង្កាត់ក៏បានអោយដឹងទៀតថា ដីរួមនោះនៅសល់មួយចំនួនទៀត ហើយទីទួលកំពុងតែមានទំនាស់គ្នា៣គ្រួសារ។
ជុំវិញការលក់ដីរួម មន្ត្រីសាលាខណ្ឌម្នាក់ក៏បានបង្ហើបអោយដឹងដែរថា សូម្បីតែឯកសារដីក៏មិនឃើញនិងអោយបែកធ្លាយឡើយ ។ ចំណែកលោកសុខ សម្បត្តិ អភិបាលខណ្ឌព្រែកព្នៅ ដែលជាអ្នកស៊ីញ៉េលក់ដីរួមនោះ ពុំអាចទទួលការបំភ្លឺបានឡើយ ដោយទូរស័ព្ទលោកតេចូលតែពុំលើក ។
ព័ត៌មានបន្ថែមនឹងមានផ្សាយជូនលើកាសែតកោះសន្តិភាព ។
ចែករំលែកព័តមាននេះ